[1] مسئحده حقئقتی دیئرم، یالان دانیشمیرام؛ وئجدانیم دا موقدّس روحدا ددئکلرئمی تصدئق ادئر.
[2] اوره‌یئمده بؤیوک بئر قم، دائمی بئر ائضطئراب وار.
[3] چونکی ائسته‌یه بئله‌ردئم کی، قارداشلاریمین خاطئری اوچون، جئسمن هموطنلرئمئن خاطئری اوچون، من اؤزوم مسئحدن اوزاقلاشیب لعنت اولونوم.
[4] اونلار ائسرایئل‌لی‌دئرلر کی، اوغوللوق و عئزّت، عهدلر، شرئعتئن ورئلمه‌سی، معبدئن خئدمتی و وعده‌لر اونلاریندیر.
[5] بؤیوک آتالار دا اونلاریندیر، مسئح ده جئسمن اونلارداندیر؛ او کی، هر شیئن اوستونه ابده کئمی موبارک تاری‌دیر. آمئن.
[6] لاکئن بله دیئل کی، تارینین کلامی بوشا چیخیب. چونکی ائسرایئلدن اولانلارین هامیسی ائسرایئل دیئل.
[7] ائبراهئم نسلئندن اولانلارین هامیسی دا ائبراهئمئن اؤولادلاری دیئل: آمّا «سنئن نسلئن ائسحاقدان آدلاندیریلاجاق.»
[8] بو او دمکدئر کی، تارینین اؤولادلاری جئسمانی اؤولادلار یوخ، وعده‌نئن اؤولادلاری‌دیرلار کی، ائبراهئمئن نسئلی ساییلیرلار.
[9] چونکی وعده بله ورئلدی: «بو واخت گله‌جه‌یم و سارانین اوغلو اولاجاق.»
[10] و آنجاق بو یوخ، رئبقا دا بئر کئشئدن، یعنی آتامیز ائسحاقدان بویلو اولدو.
[11] و ائکی اوغول حله آنادان اولمامیش و یاخشیلیق یا دا پئسلئک اتمه‌مئش ائکن-اونا گؤره کی، تارینین سچمه باره‌ده اولان مقصدی عمللردن یوخ، اونون دعوتئندن اولسون-
[12] رئبقایا دیئلدی: «بؤیوکو کئچئیئنه قوللوق اده‌جک.»
[13] نجه کی، حتّا یازیلیب دا: «یعقوبو سودئم، لاکئن عئسودان نئفرت اتدئم.»
[14] ائندی نه دئیک؟ مگر تارینین یانیندا حاقسیزلیق وار؟ اصلا!
[15] چونکی او، موسایا دیئر: «کئمه رحمئم گلسه، رحم اده‌جه‌یم، کئمه اوره‌یئم یانسا، شفقت گؤرسده‌جه‌یم.»
[16] بله‌جه ائندی ائنسانین ائسته‌یئنه و یا اونون سعی اتمه‌یئنه دیئل، آنجاق مرحمت ادن تارییا باغلی‌دیر.
[17] چونکی موقدّس یازیدا فئرعونا دیئر: «سنی بونا گؤره اوجالتدیم کی، قووّتئمی سنده گؤرسدئم، و آدیم بوتون یر اوزونده اعلان ادئلسئن.»
[18] دمه‌لی، تاری کئمه ائسته‌یئر، مرحمت اِدئر و کئمه ائسته‌یئر، اوره‌یئنی برک اتمه‌یه ائجازه ورئر.
[19] ائندی سن منه دئیه بئلرسن: «بس تاری داها نه اوچون بئزی تقصئرکار تاپیر؟ مگر اونون ائراده‌سئنئن ضئدّئنه کئم دورور؟»
[20] لاکئن سن ای ائنسان، کئمسن کی، تارییا بله جاواب قایتاریرسان؟ مگر شکئل ورئلن بئری، اونا شکئل وره‌نه دئیه بئلر کی، «منی نه اوچون بو جور یاراتدین؟»
[21] مگر کوزه‌گرئن پالچیق اوستونه ائختئیاری یوخدور کی، همن پالچیق ییغینیندان بئر قابی حؤرمته و بئر قابی دا حؤرمتسئزلئیه قاییرسین؟
[22] اگر تاری قضبئنی گؤرسدمک و قووّتئنی بئلدئرمک ائسته‌ین حالدا، قضبئنه هدف اولان هلاک اوچون حاضیرلانمیش قابلارا، بؤیوک صبرله تحمّول اده، بونا نه دئیک؟
[23] او بونو اونون اوچون اتدی کی، جلالینین بوللوغونو مرحمت تاپان قابلارا بئلدئرسئن، او قابلارا کی، اوّلجه‌دن عئزّت اوچون حاضیرلامیشدی.
[24] حتّا بئزلری ده کی، آنجاق یهودئلر آراسیندان یوخ، قیرییهودئلر آراسیندان چاغیردی.
[25] نجه کی، هوشعئن کئتابیندا دیئر: «خالقیم اولمایانا خالقیم، سوگئلئم اولمایانا سوگئلئم دئیه‌جه‌یم.»
[26] و «واقع اولاجاق کی، ”خالقیم دیئلسئنئز“ دیئلدئیی یرده، اونلار دئری تارینین اوغوللاری چاغیریلاجاقلار.»
[27] و اِشَعیا ائسرایئل حاقّیندا نئدا ادئر: «ائسرایئل اوغوللارینین سایی دهنز قومو قدر اولسا دا، آنجاق تک بئر آزی نئجات تاپاجاق.
[28] چونکی رب حؤکمونو یر اوزونه کامئل بئر شکئلده، تزلئکله ائجرا اده‌جک.»
[29] و نجه کی، اِشَعیا قاباقجادان دمئشدی ده کی: «اگر سماوی فوجلارین ربّی بئزی نسئلسئز بوراخسایدی، سودوم کئمی اولاردیق، گومورایا بنزه‌ردئک.»
[30] بس نه دئیک؟ بونو کی، صالحلئیئن دالیسینا دوشمه‌ین قیرییهودئلر صالحلئیی اَله گتئرئبلر، او صالحلئک کی، ائماندان گلئر.
[31] آمّا ائسرایئل کی، صالحلئک شرئعتئنئن دالیسینا دوشموشدو، بو شرئعته چاتمادی.
[32] نه اوچون؟ چونکی ائمانلا یوخ، شرئعتئن عمللرئندن اولاجاق کئمی اونون دالیسینا دوشموشدولر. بودره‌مه داشینین اوستونه بودره‌دئلر.
[33] نجه کی، یازیلیب: «باخ، صحیوندا بئر بودره‌مه داشی، ییخیلماق قایاسی قویورام؛ اونا ائمان گتئرن اوتاندیریلمایاجاقدیر.»