[1] هرکس حؤکومت منصبلرئنه تابع اولسون، چونکی اِله بئر حؤکومت یوخدور کی، تاری طرفئندن اولماسین و مؤوجود اولان حؤکومتلر ده تاری طرفئندن تعیئن اولونوب.
[2] بونا گؤره ده حؤکومته ضئدّ دوران، تارینین تعیئن اتدئیئنه ضئدّ دورور و ضئدّ دورانلار اؤزلرئنه محکومئیّت گتئره‌جکلر.
[3] چونکی حاکئملر یاخشی رفتارلار اوچون یوخ، پئس رفتارلار اوچون قورخولودورلار. ائسته‌یئرسن کی، حؤکومتدن قورخمایاسان؟ یاخشی ائش گؤر و او، سنی تعرئفله‌یر.
[4] چونکی او سنئن خیئرئن اوچون تارینین خئدمتچئسی‌دئر. لاکئن اگر پئس ائش گؤره‌سن، قورخ! چونکی او، بوش یره قیلینج داشیمیر؛ او تارینین خئدمتچئسی‌دئر، ائنتئقام آلاندیر کی، پئس ائش گؤره‌نه تارینین قضبئنی گتئرئر.
[5] بو سببدن آنجاق قضبه گؤره یوخ، وئجدانین خاطئرئنه گؤره ده تابع اولماق لازیمدیر.
[6] ورگئنی ده بونا گؤره ورئرسئنئز؛ چونکی حاکئملر تارینین خئدمتچئسی‌دئرلر و اؤزلرئنی محض بو ائشه وقف ادئبلر.
[7] هرکسه حاقّینی ورئن؛ اگر باجدیر، باجی؛ اگر ورگئدئر، ورگئنی؛ اگر قورخودور، قورخونو؛ اگر احتئرامدیر، احتئرامی.
[8] بئربئرئنئزی سومکدن باشقا هچ کئمه بورجلو اولمایین، چونکی اؤزگه‌نی سِوَن شرئعتی یرئنه یتئرئب.
[9] چونکی «زئنا اتمه»، «آدام اؤلدورمه»، «اوغورلوق اتمه»، «طاماحکارلیق اتمه» و بوندان باشقا نه امر وار، بو کلامدا خولاصه اولور: «قونشونو اؤزون کئمی سِو.»
[10] محبّت قونشویا یامانلیق اِتمز، اونا گؤره ده محبّت شرئعتئن یرئنه یتئرئلمه‌سی‌دئر.
[11] و بونو ادئن، چونکی زامانی بئلئرسئنئز کی، سئزئن یوخودان اویانماغینیزین واختی آرتیق گلدی؛ چونکی ائندی خئلاص ائمان گتئردئیئمئز واختدان داها یاخیندیر.
[12] گجه کچئب و گوندوز عنقرئب یتئشئر؛ اونا گؤره ده قارانلیق ائشلرئنی بوراخاق و نور سئلاحینا گیئنک.
[13] گوندوزده اولانلار کئمی دوروست رفتار ادک؛ عیش-عئشرت و کفلئلئکله یوخ، عئفّتسئزلئک و سفاهتله یوخ، داعوا و حسدله یوخ.
[14] لاکئن رب عئسا مسئحی گِیئن و جئسمه اِله تداروک گؤرمه‌یئن کی، شهوتلرئنی یرئنه یتئرسئن.