[1] و باجیمیز فئبئنی کی، کنخرئیه‌ده‌کی کئلئسانین خئدمتکاری‌دیر، سئزه تاپشیریرام.
[2] اونو ربده موقدّسلره لایئق اولان شکئلده قبول ادئن و سئزه نه احتئیاجی وارسا، اونا کؤمک ادئن؛ چونکی او دا بئر چوخلارینا و منئم اؤزومه ده کؤمک ادئب.
[3] مسئح عئسادا منئم همکارلاریم پرئسکا و اَکئلایا سالام یتئرئن کی،
[4] منئم جانیم اوچون اؤز باشلارینی قویدولار و اونلاردان آنجاق من یوخ، بوتون قیری‌‌یهودی کئلئسالار تشکّور ادئرلر.
[5] اونلارین اِوئنده اولان کئلئسایا دا سالام یتئرئن. آسئیانین مسئح اوچون ائلک محصولو اولان سوگئلئم اَپَنتوسا دا سالام یتئرئن.
[6] بئزئم اوچون چوخ زحمت چکمئش مریمه ده سالام یتئرئن.
[7] قوحوموم و زئندانداکی یولداشلاریم آندرونئکوس و یونئیاسا سالام یتئرئن کی، حوارئلر آراسیندا شؤهرت قازانمیش و مندن داها قاباق مسئحه ائمان گتئرئبلر.
[8] ربده اولان سوگئلئم آمپِلئیاتوسا سالام یتئرئن.
[9] مسئحده همکاریمیز اولان اوربانوس و سوگئلئم اِستاخئسه سالام یتئرئن.
[10] مسئحده تصدئق اولونموش اَپَلّئسه سالام یتئرئن. ارئستوبولوسون اِوئندن اولانلارا دا سالام یتئرئن.
[11] قوحوموم هئرودئیونا سالام یتئرئن. نارکئسوسون اِوئندن ربده اولانلارا دا سالام یتئرئن.
[12] رب اوچون زحمت چکن ترایفایئنا و ترایفوسا سالام یتئرئن. سوگئلی پرسئسه ده سالام یتئرئن کی، ربده چوخ زحمت چکئب.
[13] ربده سچمه بئری اولان روفوسا، آناسینا و منئم آناما دا سالام یتئرئن.
[14] آسئنکئرئتوسا، فئلگونا، هِرمِسه، پاتروباسا، هِرماسا، و اونلارلا اولان قارداشلارا سالام یتئرئن.
[15] فئلولوگوس و جولئیایا، نِرعوس و باجیسینا، اولئمپاسا و اونلارلا اولان بوتون موقدّسلره سالام یتئرئن.
[16] بئربئرئنئزی موقدّس اؤپوشله سالاملایین. مسئحئن بوتون کئلئسالاری سئزه سالام گؤندَ‌رئرلر.
[17] ای قارداشلار، سئزه یالواریرام کی، اؤیر‌ندئیئنئز تعلئمئن عکسئنه اولانلاردا، آیریلیقلارا و مانعلره سبب اولانلاردا گؤزونوز اولسون و اونلاردان اوزاق دورون.
[18] چونکی بله آداملار ربّئمئز مسئحه یوخ، اؤز قارینلارینا قوللوق ادئرلر؛ و شئرئن و آلداتان نئطقلرله ساده آداملارین اورَکلرئنی آزدیریرلار.
[19] چونکی سئزئن ائطاعتئنئزئن خبری هامییا چاتیب. بونون اوچون من ده سئزئن حاقّینیزدا سوئنئرم. لاکئن ائسته‌یئرم کی، یاخشی اولان شیلرده حئکمتلی و پئس اولان شیلرده معصوم اولاسینیز.
[20] و باریش ورن تاری شیطانی عنقرئب آیاقلارینیزین آلتیندا اَزه‌جک. ربّئمئز عئسانین فیضی سئزئنله اولسون
[21] همکاریم تئموتاعوس دا سئزه سالام گؤندَ‌رئر، هم ده قوحوملاریم لوکئیوس، یاسون، و سوسئپاتر.
[22] من ترتئیوس دا کی، بو مکتوبو یازییا چکئرم، ربده سئزه سالام گؤندَ‌رئرم.
[23] منئم و بوتون کئلئسانین مهمانداری اولان قایوس دا سئزه سالام گؤندَ‌رئر. شهرئن خزئنه‌داری اولان اِراستوس و کوآرتوس قارداش دا سئزه سالام گؤندَ‌رئرلر.
[24] (ربّئمئز عئسا مسئحئن فیضی سئزئن هامینیزلا اولسون. آمئن.)
[25] ائندی اونا جلال اولسون کی، منئم موژدم و عئسا مسئحئن وعظئنه گؤره سئزی برقرار اتمه‌یه قادئردئر، او سئرّئن کشفئنه گؤره کی، کچمئش زاماندا اوزون بئر مودّت اوچون گئزلی ساخلانمیش ائدی.
[26] آمّا هم ائندی آشکار اولوب و نَبه‌وی کئتابلارین واسئطهسیائله ابدی تارینین حؤکمونه گؤره بئلدئرئلئب کی، بوتون مئلّتلرئن ائماندان اولان ائطاعته سبب اولسون؛
[27] او تک بئر حئکمتلی تارییا عئسا مسئحئن واسئطهسیائله ابده کئمی عئزّت اولسون. آمئن.