[1] ائماندا ضعئف اولانی قبول ادئن؛ لاکئن اونون اوچون یوخ کی، فئکئرلری باره‌ده حؤکم اده‌سئنئز.
[2] بئری اِله ائنانیر کی، هر شیی یئیه بئلر، آمّا ضعئف اولان آدام آنجاق سبزئیات ییئر.
[3] یئین آدام، یمه‌ین آداما حقارت گؤزو ائله باخماسین. یمه‌ین آدام دا یئینه حؤکم اتمه‌سئن. چونکی تاری اونو قبول ادئب.
[4] سن کئمسن کی، اؤزگه‌نئن قولونا حؤکم ادئرسن؟ قولو حاقلی چیخاردان دا، حاقسیز چیخاردان دا آغاسی‌دیر. قول حاقلی چیخاجاق دا، چونکی ربّئن گوجو وار کی، اونو حاقلی چیخارتسین.
[5] بئری، بئر گونو آیری بئر گوندن افضل ساییر، لاکئن آیری بئری هر گونو برابر ساییر. قوی هر کس اؤز فئکرئنده کامئل یقئنی اولسون.
[6] بئر گونو عزئز توتان آدام، اونو رب اوچون عزئز توتور، یئین آدام رب اوچون ییئر، چونکی تارییا شوکور ادئر. یمه‌ین آدام دا رب اوچون یمئر و تارییا شوکور ادئر.
[7] چونکی بئزلردن هچ کئم اؤزو اوچون یاشامیر و هچ کئم اؤزو اوچون اؤلمور.
[8] چونکی اگر یاشاییریق، رب اوچون یاشاییریق؛ اگر اؤلوروک ده، رب اوچون اؤلوروک. بونا گؤره ده ائستر یاشایاق، ائستر اؤلک، بئز ربّئنئک.
[9] چونکی مسئح بونون اوچون اؤلوب گئنه دئرئلدی کی، هم اؤلولرئن هم ده دئرئلرئن ربّی اولسون.
[10] بس سن نه اوچون قارداشینا حؤکم ادئرسن؟ و یا سن نه اوچون قارداشینا حقارتله باخیرسان؟ چونکی بئز هامیمیز تارینین موحاکئمه تختئنئن قاباغیندا دایاناجاغیق.
[11] اونا گؤره کی، یازیلیب: رب بویورور؛ حیاتیم حاقّی اوچون، هر دئز قاباغیمدا چؤکه‌جک، و هر دئل تارینی ائقرار اده‌جک.
[12] دمه‌لی هر بئرئمئز اؤزو اوچون تارییا حساب وره‌جکدئر.
[13] بونا گؤره ده بئربئرئمئزه آرتیق حؤکم اتمه‌یک، لاکئن بونا قرار ورک کی، بئر قارداشین یولونا مانع و یا بودره‌دن بئر شی قویمایاق.
[14] بئلئرم و رب عئسادا یقئنئم وار کی، هچ بئر شی اؤزو-اؤزونده نجئس دیئلدئر؛ آمّا بئر شیی نجئس سایان اوچون، او شی نجئسدئر.
[15] چونکی اگر سنئن قارداشین، یدئیئن بئر شیدن اؤتری ائنجه‌یئر، آرتیق سن محبّت اوزوندن رفتار اتمئرسن. اؤز یئیه‌جه‌یئنله او آدامی هلاک اتمه کی، مسئح اونون خاطئرئنه اؤلدو.
[16] اونون اوچون قویمایین کی، سئزه یاخشی اولان بئر شی پئسلَنسئن.
[17] چونکی تارینین پادشاهلیغی یمک و ائچمک دیئل، صالحلئک، باریش، و موقدّس روحدا شادلیقدیر.
[18] چونکی کئم مسئحه بله خئدمت ادئر، تارییا مقبولدور و ائنسانلار طرفئندن تصدئق اولونور.
[19] اونا گؤره ده او شیلره جان آتاق کی، باریش گتئرئر و بئربئرئمئزی برقرار ادئر.
[20] یمک خاطئرئنه تارینین ائشئنی پوزمایین. هر شی دوغرودان دا طاهئردئر، لاکئن یدئکلری ائله اؤزگه آدامین بودره‌مه‌سئنه سبب اولان اوچون او شی پئس اولور.
[21] یاخشی‌دیر کی، ات یمه‌یه‌سن، شراب ائچمه‌یه‌سن و یا قارداشینی بودره‌دن بئر ائش گؤرمه‌یه‌سن.
[22] اگر سنئن ائمانین وار، تارینین حوضوروندا اؤزونه ساخلا. خوش او آدامین حالینا کی، تصدئق اتدئیی ائشده اؤزونو محکوم اتمئر.
[23] آمّا بئر یمکدن شوبهه ادن آدام، او یمه‌یی اگر یسه، محکوم اولور. چونکی گؤردویو ائش ائماندان دیئل؛ و ائماندان اولمایان هر شی گوناهدیر.