[1] بونا گؤره، ائندی مسئح عئسادا اولانلارا هچ بئر محکومئیّت یوخدور.
[2] چونکی مسئح عئسادا اولان حیات روحونون شرئعتی، منی گوناه و اؤلومون شرئعتئندن آزاد اتدی.
[3] چونکی تاری بئزه او شیی اتدی کی، جئسم اوزوندن ضعئف اولان شرئعت اونو اِده بئلمئردی: اؤز اوغلونو گوناهلی جئسمئن بنزه‌یئشئنده گوناه اوچون قوربان گؤندَ‌رئب، جئسمده اولان گوناهی محکوم اتدی کی،
[4] شرئعتئن طلب اتدئکلری بئزده یرئنه یتئشسئن؛ بئز کی، جئسمه گؤره یوخ، روحا گؤره یاشاییریق.
[5] چونکی جئسمئن دالینجا اولانلار فئکئرلرئنی جئسمانی شیلرئن اوستونه قویوبلار، لاکئن روحون دالینجا اولانلار فئکئرلرئنی روحانی شیلرئن اوستونه قویوبلار.
[6] جئسمئن اوستونه قویولان فئکئر اؤلومدور، لاکئن روحون اوستونه قویولان فئکئر حیات و باریشدیر.
[7] بو سببدن کی، جئسمئن اوستونه قویولان فئکئر تارییا دوشمنچئلئک ادئر؛ چونکی تارینین شرئعتئنه تابع دیئل و اولا دا بئلمز.
[8] جئسمه گؤره ده یاشایانلار تارینی راضی اده بئلمزلر.
[9] لاکئن اگر تارینین روحو سئزده‌دئر، سئز جئسمده یوخ، روحداسینیز. آمّا کئمده مسئحئن روحو یوخدور، او آدام مسئحه عایید دیئل.
[10] آمّا اگر مسئح سئزده‌دئر، بدنئنئز گوناه اوزوندن اؤلودور، آمّا روحونوز صالحلئک اوزوندن دئری.
[11] اگر عئسانی اؤلولردن دئرئلده‌نئن روحو سئزده یاشاییر، او زامان مسئحی اؤلولردن دئرئلدن، سئزئن ده فانی بدنلرئنئزه، سئزده یاشایان اؤز روحو ائله حیات وره‌جک.
[12] بله‌جه ای قارداشلار، بئز جئسمئمئزه بورجلو دیئلئک کی، جئسمئمئزه گؤره یاشایاق.
[13] چونکی اگر جئسمه گؤره یاشایاسینیز، اؤلرسئنئز، لاکئن اگر جئسمئن عمللرئنی روحون واسئطهسیائله اؤلدوره‌سئنئز، یاشایارسینیز.
[14] چونکی تارینین روحو ائله هئدایت اولونانلارین هامیسی تارینین اوغوللاری‌دیرلار.
[15] دوغرودان دا، قوللوق روحونو آلماییبسینیز کی، گئنه قورخو ائچئنده یاشایاسینیز، اوغوللوق روحونو آلیبسینیز کی، اونون واسئطهسیائله «آبّا، آتا» چاغیریریق.
[16] اله همن روح بئزئم روحوموزلا شهادت ورئر کی، بئز تارینین اؤولادلاری‌ییق.
[17] ائندی اگر اونون اؤولادلاری‌ییق، دمه‌لی اونون وارئثلرئیئک ده-تارینین وارئثلری و مسئحئن مئراث شرئکی-اگر حقئقتن اونون چکدئیی عذابلاریندا بئز ده شرئک اولوروق کی، بله‌جه اونون عئزّتئنده ده شرئک اولاق.
[18] بله دوشونورم کی، چکدئیئمئز ائندئکی عذابلار، بئزه ظاهئر اولاجاق عئزّتله هچ موقایئسه‌یه گلمز.
[19] چونکی خئلقت تارینین اوغوللارینین ظوهورونو بؤیوک بئر حسرتله گؤزله‌یئر.
[20] چونکی خئلقت اؤز ائراده‌‌سی‌ائله یوخ، اونو تابع اِتدئره‌نئن ائراده‌‌سی‌ائله چورومه‌یه تابع اولوب،
[21] بو اومئدله کی، خئلقت اؤزو ده چورومه‌یئن اسارتئندن آزاد اولاجاق و تارینین اؤولادلارینین شؤوکتلی آزادلیغینا گتئرئله‌جک.
[22] چونکی بئلئرئک کی، بوتون خئلقت ائندئیه کئمی بئرلئکده ناله ادئب، دوغوم آغریسی چکئر.
[23] و آنجاق بو یوخ، بئز ده کی، روحون نوبارینی آلمیشیق، بئز اؤزوموز ده اؤز ائچئمئزده ناله ادئب، اوغوللوغا آلینماغی یعنی بدنئمئزئن خئلاصینی گؤزله‌یئرئک.
[24] چونکی بئز اومئدله نئجات تاپدیق. لاکئن گؤزه گؤرولن اومئد، اومئد دیئل. چونکی گؤردویو شیه نه اوچون اومئد باغلاسین؟
[25] لاکئن اگر گؤرمه‌دئیئمئز شیه اومئد باغلایاق، اونو صبر‌له گؤزله‌یه‌رئک.
[26] و بله‌جه ده روح بئزه ضعئفلئیئمئزده کؤمک اِدَر. چونکی بئز لازیم اولدوغو کئمی دوعا اتمه‌یی باجارمیریق. لاکئن روح اؤزو سؤز‌له، آنلاتیلماز ناله‌لرله بئزئم اوچون شفاعت ادئر.
[27] و اورَکلری تفتئش ادن، روحون نه دوشوندویونو بئلئر، چونکی روح تارینین ائراده‌سئنه گؤره موقدّسلر اوچون شفاعت ادئر.
[28] و بئلئرئک کی، تاری بوتون شیلری، اونو سِوَنلر اوچون و اونون هدفئنه گؤره دعوت اولونانلار اوچون اونلارین خیئرئنه بئرلئکده ائشله‌دئر.
[29] چونکی او، کئملری اوّلجه‌دن تانیمیشدی، قاباقجادان موعیّن اتمئشدی ده کی، اوغلونون بنزه‌یئشئنه دؤنسونلر. اِله کی، او، چوخلو قارداشلار آراسیندا، ائلک دوغولان اولسون.
[30] تاری کئملری قاباقجادان موعیّن اتمئشدی، اونلاری دا دعوت اتدی؛ دعوت اتدئیی آداملاری صالح سایدی؛ صالح سایدیغی آداملاری دا عئزّتلندئردی.
[31] اگر بله‌دئر، بو شیلره نه دئیک؟ اگر تاری بئزئمله‌دئر، کئم بئزه ضئدّ دورار؟
[32] او کی، اؤز اوغلونو قیماییب، اونو بئزئم هامیمیز اوچون تسلئم اتدی، نجه اونونلا برابر بوتون شیلری بئزه احسان اتمیه‌جک؟
[33] تارینین سچدئکلرئنه کئم ائتّئهام ووراجاق؟ اونلاری صالح سایان تاری‌دیر!
[34] محکوم ادن کئمدئر؟ اؤلموش، اوسته‌لئک دئرئلمئش اولان مسئح عئسا. او کی، هم تارینین صاغیندادیر، هم ده بئزئم اوچون شفاعت ادئر.
[35] مسئحئن محبّتئندن بئزی کئم آییرا بئلر؟ موصئبت؟ دارلیق؟ عذاب؟ آجلیق؟ چیلپاقلیق؟ خطر؟ قیلینج؟
[36] نجه کی، یازیلیب دا: «سنئن خاطئرئن اوچون بوتون گون اؤلوم اَلئنه ورئلئرئک، قصّابلیق قویونلاری کئمی ساییلیردیق.»
[37] یوخ، بوتون بونلاردا بئزی سوه‌نئن واسئطهسیائله قالئب گلنلردن اوستونوک.
[38] چونکی یقئن بئلئرم کی، نه اؤلوم، نه حیات، نه ملکلر، نه ریاستلر، نه ائندئکی، نه گله‌جک شیلر، نه قووّتلر،
[39] نه اوجالیق، نه درئنلئک، نه ده اؤزگه بئر مخلوق قادئر اولاجاق کی، بئزی ربّئمئز مسئح عئسادا اولان تارینین محبّتئندن آییرسین.