[1] من پولوس، مسئح عئسانین قولو، حواری اولماغا دعوت اولونموش، تارینین ائنجئلئنی یایماق اوچون سچئلمئش؛
[2] او ائنجئل کی، تاری اؤز پیغمبرلری واسئطهسیائله اوّلجه‌دن موقدّس یازیلاردا وعده وردی.
[3] اؤز اوغلو حاقّیندا کی، جئسمن داوودون نسلئندن آنادان اولدو
[4] و قودسئیّت روحونا گؤره، اؤلولردن دئرئلمه‌‌یی ائله تارینین اوغلو اولدوغو قووّتله اعلان ادئلدی، یعنی ربّئمئز عئسا مسئح.
[5] بئز اونون واسئطهسیائله فیض و حوارئلئیه نایئل اولدوق کی، اونون آدی اوچون ائنسانلاری، بوتون خالقلاردان، ائماندان گلن ائطاعته گتئرک.
[6] و سئز ده، عئسا مسئحئن طرفئندن او دعوت اولونموش ائنسانلارین آراسینداسینیز.
[7] تارینین رومدا اولان و موقدّسلئیه دعوت اولونان بوتون سِودئکلرئنه: آتامیز تاریدان و رب عئسا مسئحدن سئزه فیض و باریش اولسون.
[8] اوّلن، هامینیز اوچون عئسا مسئحئن واسئطهسیائله تاریما شوکور ادئرم کی، ائمانینیز بوتون دونیادا اعلان اولونور.
[9] او تاری کی، بوتون روحوملا اوغلونون ائنجئلئنه خئدمت ادئرم، شاهئدئمدئر کی، نجه دائم سئزی یادا گتئرئرم.
[10] و دوعالاریمدا دائم یالواریرام کی، بلکه بئر دفه تارینین ائراده‌سی ائله سئزئن یانینیزا گلمه‌یه یولوم دوشسون.
[11] سئزی گؤرمه‌یی چوخ آرزولاییرام اِله کی، سئزی قووّتلندئرمک اوچون سئزه روحانی بئر عطا یتئرئم.
[12] یعنی، من آرانیزدا ائکن، هم سئز و هم من بئربئرئمئزئن ائمانی ائله تشوئق اولوناق.
[13] ای قارداشلار! بئخبر اولماغینیزی ائسته‌مئرم کی، دفه‌لر‌له یانینیزا گلمک نئیّتئنده اولدوم کی، منئم سئزئن آرانیزدا دا، اؤزگه خالقلارین آراسیندا اولدوغو کئمی بئر ثمره‌م اولسون. لاکئن ائندئیه‌جک بو ائشی اتمکدن منع اولدوم.
[14] من، هم یونانلی‌لارا هم ده مدنئیّتسئزلره، هم حکئملره، هم ده جاهئللره بورجلویام.
[15] بونا گؤره‌دئر کی، من رومدا یاشایان سئزلره ده وار-گوجومله ائنجئلی بئلدئرمه‌یه جان آتیرام.
[16] من ائنجئلدن اوتانمیرام. چونکی او، ائمان گتئرن هر کسئن خئلاصی اوچون تارینین قووّتی‌دئر؛ اوّل یهودئنئن، سونرا دا قیری‌‌یهودئنئن.
[17] چونکی ائنجئلده تارینین عدالتی ائماندان ائمانا کشف اولونور: نجه کی، یازیلیب: «صالح آدام ائمانلا یاشایاجاق.»
[18] تارینین قضبی گؤیدن ائنسانلارین بوتون تاریسیزلیق و حاقسیزلیغینین ضئدّئنه آشکار اولور کی، حاقسیزلیقلا حقئقته مانع اولورلار.
[19] چونکی تاری حاقّیندا او شیلر کی، بئلمه‌یی مومکوندور، اونلارا آشکاردیر، اونا گؤره کی، تاری اؤزو اونلارا آشکار ادئب.
[20] دونیانین خئلقتئندن بری اونون گؤزه گؤرونمه‌ین خوصوصئیّتلری، یعنی اَبدی قووّتی و تاریلیغی اونون یاراتدیقلاری ائله معلوم اولوب آچیقجا گؤرونور. بونا گؤره ده، عوذرلری یوخدور.
[21] چونکی تارینی تانییان حالدا، نه اونا تاری کئمی عئزّت وردئلر، نه ده شوکور اتدئلر. لاکئن دوشونجه‌لرئنده باطئل اولدولار؛ آنلاقسیز اورَکلرئنی ده قارانلیق بورودو.
[22] حئکمتلی اولدوقلارینی ائدّئعا اده‌رک آخماق اولدولار
[23] و فانی اولمایان تارینین عئزّتئنی، فانی اولان ائنسانا، قوشلارا، دؤردآیاقلی‌لارا و سوروننلره بنزه‌ین بوتلر‌له دیئشدئلر.
[24] بو اوزدن، تاری، اونلارین اورَکلرئنی شهوتلری ائچئنده عئفّتسئزلئیه تسلئم اتدی کی، اؤز آرالاریندا بدنلرئنی حؤرمتسئز اتسئنلر.
[25] اونلار تارینین حقئقتئنی یالانلا دیئشدئلر و خالئق عوضئنه مخلوقا پرستئش و عئبادت اتدئلر. او تاری کی، ابده‌جک موبارکدئر. آمئن.
[26] بو سببدن، تاری اونلاری رذئل هوسلرئنه تسلئم اتدی، حتّا آروادلاری طبئعی علاقه‌نی، قیری‌‌طبئعی علاقه ائله دیئشدئلر.
[27] همن جور، کئشئلر ده آروادلا اولان علاقه‌دن اَل چکئب، شهوتله بئربئرلرئنه قیزیشدیلار؛ کئشئلر کئشئلر‌له روسوایلیق ادئب، اؤز بدنلرئنده رذئلّئکلرئنه لایئق جزانی آلدیلار.
[28] تارینی شوعورلاریندا ساخلاماغا دَیَر ورمه‌دئکلری اوچون، تاری دا اونلاری دَیَرسئز دوشونجه‌لره تسلئم اتدی کی، ادبسئز رفتارلار اتسئنلر.
[29] اونلار هر جور حاقسیزلیق، جئنسی عئفّتسئزلئک، پئسلئک، طاماح، و کئنله دولدولار؛ حسد، آدام اؤلدورمک، عداوت، حئیله، و پئس نئیّتله دولوب داشدیلار. قیبتچی،
[30] بؤهتانچی، تاریدان نئفرت ادن، زور دئین، مغرور، فخر ساتان، پئس ائشلر ائختئراع ادن، آتا-آنایا ائطاعتسئز،
[31] آنلاقسیز، ائمانسیز، شفقتسئز و رحمسئزدئرلر.
[32] گرچی تارینین بویوردوقلارینی بئلئرلر کی، بله ائشلرله مشغول اولانلار اؤلومه لایئقدئرلر، نه فقط بله ائشلرئن اتمه‌‌سئنه داوام ورئرلر، ادنلری ده تشوئق ادئرلر.