[1] پادشاه اَرتَخشَستانین حاکئمئیّتئنئن ائیئرمئنجی ائلی، نئسان آیی ائدی. پادشاهین قاباغینا شراب قویولموشدو. من شراب جامینی قالدیریب اونا وردئم. او گونه قدر من هچ واخت اونون حوضوروندا کَدَرلی گؤرونمه‌مئشدئم.
[2] پادشاه منه ددی: «گرچی ناخوش دیئلسن، اوزون نئیه بله قملی‌دئر؟ بو آنجاق اورَک قمی اولا بئلر.» او واخت من چوخ قورخدوم.
[3] پادشاها ددئم: «پادشاه همئشه صاغ اولسون! آتالاریمین دفن ادئلدئیی شهر خارابالیغا دؤنوب، دروازالاری دا یاندیریلیب. نجه قملی اولماییم؟»
[4] او واخت پادشاه مندن سوروشدو: «مندن نه ائسته‌یئرسن؟» من گؤیلرئن تاریسینا دوعا اتدئم.
[5] و پادشاها جاواب وردئم: «اگر پادشاها بو خوش گلئر و قولون سنئن گؤزونده لوطف تاپیب، منی یهودایا، آتالاریمین دفن ادئلدئیی شهره گؤندَر کی، اورانی تزه‌دن تئکئم.»
[6] ملکه ده پادشاهین یانیندا اوتورموشدو. پادشاه مندن سوروشدو: «بو سفرئن نه قدر چکر؟ نه واخت قاییداجاقسان؟» منی گؤندَرمک پادشاها مقبول اولدو و من قاییداجاغیم واختی موعیّن اتدئم.
[7] سونرا پادشاها ددئم: «اگر پادشاها خوش گلئر، فَرات چایینین قربئنده‌کی وئلایتلرئن والئلری اوچون منه نامه‌لر ورئلسئن کی، یهودایا چاتانا قدر منی وئلایتلرئندن کچئرتسئنلر.
[8] هم ده پادشاهین مِشه نظارتچئسی آسافا نامه گؤندَ‌رئلسئن کی، تئر دوزَ‌لتمک اوچون معبدئن یانینداکی قالا دروازالارینا، شهرئن دووارینا و ائقامتگاهیما آغاج ورسئن.» تارینین مرحمتلی اَلی اوستومده اولدوغونا گؤره، پادشاهدان نه ائسته‌دئم، منه وردی.
[9] فَرات چایینین قربئنده‌کی والئلرئن یانینا گتدئم و پادشاهین نامه‌لرئنی وردئم. پادشاه منئمله بئرلئکده قوشون سرکرده‌لری ائله آتلی‌لار دا گؤندَرمئشدی.
[10] خورونلو سنبَلّط و عَمّونلو مأمور طوبئیا بونو اشئتدئکده، ائسرایئل اؤولادلارینین خِیئرئنه چالیشان بئر نفرئن گلدئیئندن خوشلانمادیلار.
[11] اورشلئمه گلئب اورادا اوچ گون قالدیم.
[12] گجه ائکن قالخیب یانیما بئر نچه آدام آلدیم. هچ کسه آچمادیم کی، تاری اورشلئم اوچون نه اتمک باره‌ده اوره‌یئمه نه قویوب. مئندئیئمدن باشقا هچ بئر حیوان دا گؤتورمه‌مئشدئم.
[13] گجه دره دروازاسیندان چیخیب اژداها قویوسونا و پِیئن دروازاسینا طرف گتدئم، اورشلئمئن داغیدیلان دووارلارینا و یاندیریلان دروازالارینا نظر سالدیم.
[14] سونرا چشمه دروازاسینا و پادشاه حوووضونا طرف گتدئم، لاکئن مئندئیئم حیوان او یرلردن کچه بئلمئردی.
[15] بله‌جه گجه وادی بویونجا چیخیب دوواری گؤزدن کچئرتدئم. سونرا دؤنوب دره دروازاسیندان گئردئم و گری قاییتدیم.
[16] حؤکومت مأمورلاری هارایا گتدئیئمی و نه اتدئیئمی بئلمئردئلر. یهودئلره، کاهئنلره، اعیانلارا، مأمورلارا و آیری وظئفه‌لی‌لره ده هچ بئر شی دانیشمامیشدیم.
[17] سونرا اونلارا ددئم: «دوشدویوموز بو پئس وضعئیّتی گؤرورسونوز؛ اورشلئم خارابالیغا چِورئلئب، دروازالارینا دا اود وورولوبدور. گلئن اورشلئمئن دووارینی تزه‌دن تئکَک کی، بوندان آرتیق روسوایچیلیق ائچئنده قالمایاق.»
[18] اونلارا ددئم کی، نجه تارینین مرحمتلی اَلی اوستومده ائدی و پادشاه منه نه سؤزلر ددی. او واخت اونلار ددئلر: «گلئن قالخاق، بورالاری تزه‌دن تئکَک.» بله‌جه اونلار بو خیئرلی ائش اوچون اَل-بئر اولدولار.
[19] لاکئن خورونلو سنبَلّط، عَمّونلو مأمور طوبئیا و عَرب گِشِم بوندان خبر توتاندا، بئزی اَله سالدیلار و تحقئر ادئب ددئلر: «بو نه ائشدئر کی، ادئرسئنئز؟ مگر پادشاهین ضئدّئنه عوصیان قالدیریرسینیز؟»
[20] من اونلارا جاواب ورئب ددئم: «گؤیلرئن تاریسی ائشئمئزی اوغورلو اده‌جک. اونون قوللاری اولان بئزلر قالخیب بورانی تئکه‌جیئک. سئزئن ده اورشلئمده نه پایینیز، نه حاقّینیز، نه ده آدینیز اولاجاق.»