[1] بوتون مئلّت کامئل اوردون چایینی کچندن سونرا، رب یوشَعه ددی:
[2] «خالق آراسیندان اؤزونه اون‌ائکی کئشی گؤتور، یعنی هر قبئله‌دن بئر نفر.
[3] اونلارا امر ادئب ده: ”بورادان، اوردون چایینین اورتاسیندان، کاهئنلرئن آیاقلارینین مؤحکم دوردوغو یردن اون ائکی داش گؤتورون. بو داشلاری آپاریب بو گجه قالدیغینیز یرده قویون.“»
[4] یوشَع ائسرایئل اؤولادلارینین آراسیندان سچدئیی اون ائکی کئشئنی چاغیردی، هر قبئله‌دن بئر نفری.
[5] یوشَع اونلارا ددی: «تارینیز ربّئن ساندیغی قاباغیندان، اوردون چایینین اورتاسینا کچئب، ائسرایئل قبئله‌لرئنئن سایینا گؤره هر بئرئنئز چئینئنئزه بئر داش گؤتورون.
[6] قوی بو سئزئن آرانیزدا بئر علامت اولسون. سئزدن سونرا اؤولادلارینیز ”بو داشلار نه‌دئر؟“ سوروشاندا،
[7] اونلارا بله دئیَرسئنئز: ”اونا گؤره دئر کی، اوردون چایینین سولاری ربّئن عهد ساندیغینین قاباغیندا کسئلدی؛ عهد ساندیغینی اوردون چاییندان کچئردنده، اوردون چایینین سولاری کسئلمئشدی.“ بله‌جه بو داشلار ائسرایئل اؤولادلارینا ابدی بئر یادئگار اولاجاق.»
[8] ائسرایئللی‌لر یوشَعئن امر اتدئیی کئمی اتدئلر و ربّئن یوشَعه ددئیی کئمی، ائسرایئل قبئله‌لرئنئن سایینا گؤره اوردون چایینین اورتاسیندان اون‌ائکی داش گؤتوردولر. داشلاری اؤزلری ائله گجه قالاجاقلاری یِره آپاریب، اونلاری اورادا یِره قویدولار.
[9] سونرا یوشَع اوردون چایینین اورتاسیندا، عهد ساندیغینی داشییان کاهئنلرئن آیاقلارینین مؤحکم دوردوغو یِره، اون ائکی داش قویدو. اونلار بو گونه قدر اورادادیرلار.
[10] ساندیغی داشییان کاهئنلر اوردون چایینین اورتاسیندا دایانمیشدیلار، اِله کی، خالقا دمک اوچون ربّئن یوشَعه امر اتدئیی شیلر قورتاردی. نجه کی، موسا یوشَعه امر اتمئشدی. خالق تَله‌سئک چایی کچدئلر.
[11] خالق چایی کچئب قورتاراندان سونرا، ربّئن ساندیغی و کاهئنلر خالقین قاباغینا کچدئلر.
[12] رِعوبئنلی‌لر، جادلی‌لار و مِنَسّه قبئله‌سئنئن یاریسی موسانین اونلارا ددئیی کئمی سئلاحلانیب، ائسرایئل اؤولادلارینین قاباغیندا چایی کچدئلر.
[13] دؤیوش اوچون سئلاحلانمیش قیرخ مئن قدر آدام ربّئن قاباغیندا اَرئحا اووالارینا کچدئلر.
[14] او گون رب یوشَعی بوتون ائسرایئل خالقینین گؤزونده اوجالتدی. اونلار دا یوشعه چوخ حؤرمت گؤرستدئلر، نجه کی، موسایا اونون بوتون عؤمرو بویو گؤرستمئشدئلر.
[15] رب یوشَعه ددی:
[16] «شهادت ساندیغینی داشییان کاهئنلره امر ات کی، اوردون چاییندان چیخسینلار.»
[17] یوشَع ده کاهئنلره امر ادئب ددی: «اوردون چاییندان چیخین!»
[18] ربّئن عهد ساندیغینی داشییان کاهئنلر اوردون چایینین اورتاسیندان چیخاندا، کاهئنلرئن آیاقلاری قورولوق تورپاغا دَیَن واخت، اوردون چایینین سولاری اؤز یرئنه قاییتدی. گئنه اوّلکی کئمی سولار داشیب بوتون ساحئل‌لری باسدی.
[19] بئرئنجی آیین اونونجو گونونده، خالق اوردون چاییندان چیخیب، اَرئحانین شرق سرحدئنده اولان گئلگالدا اوردوگاه قوردولار.
[20] یوشَع اوردون چاییندان گؤتورولموش همئن اون‌ائکی داشی گئلگالدا قوردو.
[21] او، ائسرایئل اؤولادلارینا ددی: «سونرا اؤولادلارینیز آتالاریندان ”بو داشلار نَیه گؤره‌دئر؟“ سوروشاندا،
[22] اؤولادلارینیزا دیئن: ”ائسرایئللی‌لر اوردون چایینی قورولوق یِر اوستونده کچدئلر.“
[23] چونکی تارینیز رب اوردون چایینین سولارینی سئز کچنه قدر قوروتدو، نجه کی، تارینیز رب قیرمیزی دهنزه اتمئشدی و بئز کچنه قدر اونون سویونو قاباغیمیزدا قوروتدو.
[24] اله کی، یر اوزونون بوتون خالقلاری ربّئن اَلئنئن قودرتلی اولدوغونو بئلسئن و سئز ده تارینیز ربدن ابده کئمی قورخاسینیز.»