[1] یوسئف اؤولادلارینا پوشکله دوشَن تورپاقلارین سرحدی اَرئحانین اوردونوندان، اَرئحا سولارینین شرقئندن باشلاییب چؤللویه، اَرئحادان داغلیق بؤلگه‌سئنده اولان بِیت ائله قالخیردی.
[2] بِیت ائلدن ده لوزا چیخیب، اَرکلئلر بؤلگه‌سئنه، عطاروتا کچئردی.
[3] سونرا قربه طرف یَفلِطلی‌لر بؤلگه‌سئنه، آشاغی بِیت‌خورونا قدر اِنئردی، حتّا گِزِره قدر چاتیردی. بو سرحدئن آخیری دهنزده قورتاریردی.
[4] یوسئفئن اؤولادلاری مِنَسّه و اِفرایئم ائرث تورپاقلارینی آلدیلار.
[5] اِفرایئم اؤولادلارینین نسئللرئنه گؤره ائرث تورپاغینین سرحدی بله ائدی: شرقه طرف عَطِروت‌اَدّار، یوخاری بِیت‌خورونا قدر.
[6] سونرا سرحد قربه طرف دؤنوردو و شئمالدا اولان مئکمِتادا شرقه طرف دؤنوب، تَعَنَت‌شئلو شهرئندن دؤنه‌رک یانوخانین شرقئنه چیخیردی.
[7] یانوخادان دا عطاروتا و نَعه‌رایا اِنئب، اورادان اَرئحایا چاتیردی و آخیری اوردون چاییندا قورتاریردی.
[8] بو سرحد تَپّواَخدن قربه طرف قانا دره‌سئنه گدئب، آخیری دهنزده قورتاریردی. اِفرایئم اؤولادلاری قبئله‌سئنئن نسئللرئنه گؤره ائرث تورپاغی بونلاردیر.
[9] بوندان علاوه مِنَسّه اؤولادلارینا دوشَن تورپاقلاردا دا اِفرایئم اؤولادلاری اوچون آیریلان شهر و کَندلر وار ائدی.
[10] آمّا اِفرایئم اؤولادلاری گِزِرده یاشایان کَنَعانلی‌لاری قوومادیلار. اونلار بو گونه قدر اِفرایئم اؤولادلاری آراسیندا یاشاییرلار و زور آلتیندا اونلارین خئدمتچئلری اولوبلار.