[1] نون اوغلو یوشَع شئتّئمدن ائکی کئشئنی جاسوسلوق اتمه‌یه گئزلی گؤندَ‌رئب ددی: «گدئن اورانین تورپاغینی خوصوصَن ده اَرئحانی گؤزدن کچئردئن.» اونلار گتدئلر و راخاب آدلی بئر فاحئشه‌نئن اِوئنه گئرئب اورادا قالدیلار.
[2] اَرئحا پادشاهینا خبر آپاریلدی: «باخ، بو گجه ائسرایئل اؤولادلاریندان بورایا آداملار گلئب کی، تورپاغیمیزی گؤزدن کچئرتسئنلر.»
[3] اَرئحا پادشاهی راخابا خبر گؤندَ‌رئب ددی: «سنئن یانینا گلن و سنئن اِوئنه گئرن آداملاری چیخارت، چونکی اونلار بوتون تورپاغیمیزین جاسوسلوغونا گلئبلر.»
[4] لاکئن راخاب او ائکی کئشئنی گؤتوروب گئزلَتمئشدی. راخاب ددی: «بلی، آداملار یانیما گلمئشدی، آمّا هارادان اولدوقلارینی بئلمئردئم.
[5] آخشام واختی دروازا باغلاناندا او آداملار چیخدیلار؛ بئلمئرم هارایا گتدئلر. تِز داللارینجا گدئن کی، اونلاری توتا بئله‌سئنئز.»
[6] لاکئن آرواد اونلاری داما چیخاردیب، دامدا سَردئیی کتان لئفلرئن آراسیندا گئزلَتمئشدی.
[7] پادشاهین گؤندَردئیی آداملار جاسوسلاری یول بویو اوردون چایینین کچئدئنه قدر تعقئب اتدئلر. تعقئبچئلر باییرا چیخان واخت دروازا باغلاندی.
[8] جاسوسلار یاتمامیشدان آرواد اونلارین یانینا داما چیخدی.
[9] و بو آداملارا ددی: «بئلئرم کی، رب بو تورپاغی سئزه ورئب. سئز بئزی دهشته سالیبسینیز و بو تورپاغین بوتون ساکئنلری سئزئن قاباغینیزدا اَرئیئبلر.
[10] چونکی اشئتمئشئک کی، مئصئردن چیخدیغینیز زامان، رب قیرمیزی دهنزئن سولارینی نجه قاباغینیزدا قوروتدو و اوردون چایینین او تاییندا محو اتدئیئنئز ائکی اِمور پادشاهی سئخون و عوگا نه اتدئنئز.
[11] بونلاری اشئدنده اوره‌یئمئز اوزولدو و سئزئن قورخونوزدان، هچ کئمئن طاقتی قالمادی، چونکی تارینیز رب یوخاریدا گؤیون و آشاغیدا یِرئن تاریسی‌دیر.
[12] ائندی خاهئش ادئرم، منه ربّئن آدیندا آند ائچئن کی، سئزه مهرئبانلیقلا رفتار اتدئیئم اوچون، سئز ده منه و آتامین عایئله‌سئنه مهرئبان اولاجاقسینیز. منه اعتئبارلی بئر نئشانه ورئن کی،
[13] آتامی، آنامی، قارداشلاریمی، باجیلاریمی، اونلارین یانیندا اولان هر کسی صاغ قویاجاقسینیز و جانیمیزی اؤلومدن قورتاراجاقسینیز.»
[14] آداملار اونا ددئلر: «اگر بو ائشئمئزئن اوستونو آچمایاسینیز، جا‌نیمیز سئزه فدا اولسون. رب بو تورپاغی بئزه ورن واخت، سؤزوموزه وفا ادئب سئزه مهرئبان اولاجاغیق.»
[15] او واخت آرواد اونلاری ائپله پنجره‌دن آشاغی اِندئردی، چونکی اونون اِوی شهرئن قالا دوواریندا ائدی و او، دووارین ائچئنده یاشاییردی.
[16] آرواد اونلارا ددی: «داغلیغا گدئن کی، تعقئبچئلر سئزه چاتماسینلار، اونلار قاییدانا قدر، اوچ گون اورادا گئزله‌نئن. سونرا یولونوزا داوام وِرَرسئنئز.»
[17] آداملار اونا ددئلر: «سنئن بئزه ائچدئردئیئن بو آندین آلتیندا اولمایاجاغیق،
[18] مگر بو تورپاغا گلدئیئمئز واخت، بئزی دوشوردویون پنجره‌یه بو قیرمیزی ائپی باغلایاسان. آتانی، آنانی، قارداشلارینی و آتانین بوتون قوحوملارینی یانینا، اؤز اِوئنه ییغ.
[19] سنئن اِوئنئن قاپیسیندان کئم باییرا چیخسا، قانی اؤز باشینا اولاجاق و بئز بونا گوناهکار اولمایاجاغیق. لاکئن سنئنله بئرلئکده اِوئنده اولان هر کسه توخونولسا، قوی اونون قانی بئزئم باشیمیزا اولسون.
[20] آمّا اگر بو ائشئمئزئن اوستونو آچاسان، اوندا سنئن بئزه ائچدئردئیئن بو آنددان آزاد اولاجاغیق.»
[21] راخاب ددی: «نجه دیئرسئنئز، اله ده اولسون.» سونرا اونلاری یولا سالدی و اونلار گتدئلر. راخاب قیرمیزی ائپی پنجره‌یه باغلادی.
[22] بو آداملار گتدئلر و داغلیغا چیغیب، تعقئبچئلر قاییدانا قدر، اوچ گون اورادا قالدیلار. تعقئبچئلر بوتون یول بویو اونلاری آختارمیشدیلار، لاکئن تاپمامیشدیلار.
[23] سونرا او ائکی کئشی گری دؤنوب داغلیق بؤلگه‌دن اِندئلر، و چایی کچئب نون اوغلو یوشَعئن یانینا گلدئلر و باشلارینا گلن هر شیی اونا نقل اتدئلر.
[24] اونلار یوشَعه ددئلر: «حقئقتن، رب بوتون او تورپاغی بئزئم اَلئمئزه ورئب؛ او تورپاغین بوتون ساکئنلری ده قاباغیمیزدا قورخودان اَرئیئبلر.»