[1] تارینیز ربّئن مالئک اولماق اوچون سئزه وره‌جیی تورپاقدا، اگر چؤلده، یره سَرئلمئش اله بئر میئت تاپاسینیز کی، اونون کئمئن طرفئندن اؤلدورولدویو بئلئنمئر،
[2] آغساقّاللارینیز و حاکئملرئنئز گدئب مِیئتئن اولدوغو یرله اطراف شهرلر آراسینداکی مسافه‌نی اؤلچسونلر.
[3] مِیئته لاپ یاخین شهر هانسی‌دیر، اورانین آغساقّاللاری ائشه قوشولمامیش، یوغ تاخیلمایان بئر دئشی بوزوو گؤتورسونلر.
[4] دئشی بوزووو شوخوملانمامیش و اَکئلمه‌مئش تورپاقداکی آخار سولو دره‌یه گتئرسئنلر و اورادا بوزووون بوینونو سیندیرسینلار.
[5] سونرا لاوئلی کاهئنلر ده اورایا گلسئنلر، چونکی تارینیز رب اونلاری اؤزونه خئدمتچی سچئب کی، ربّئن آدیندا برکت ورسئنلر؛ آرانیزداکی هر موناقئشه و دؤیوشمه داعوایا باخسینلار.
[6] میئته لاپ یاخین شهرئن بوتون آغساقّاللاری دره‌ده بوینو سیندیریلمیش دئشی بوزووون اوستونده اَللرئنی یوسونلار؛
[7] و جاواب ورئب دسئنلر: ”بئزئم اَللرئمئز بو قانی تؤکمه‌یئب. کئمئن اتدئیئنی ده گؤزلرئمئز گؤرمه‌یئب.
[8] یارب، قورتاردیغین خالقین ائسرایئلی باغیشلا. سنئن خالقین ائسرایئلی ناحاق تؤکولَن قان اوچون تقصئرکار توتما.“ بله‌جه، قان تؤکمَک گوناهی باغیشلانار.
[9] ربّئن گؤزونده دوز اولانی اتدئیئنئز اوچون، ناحاق قان بوینونوزدان گؤتوروله‌جک.
[10] دوشمنلرئنئزله دؤیوشه چیخاندا، و تارینیز رب اونلاری سئزئن اَلئنئزه تسلئم ادنده، و سئز اونلاری اسئر گؤتورنده،
[11] اگر اسئرلرئن آراسیندا گؤزل آرواد گؤروب اونا وورولاسینیز، اونو اؤزونوزه آرواد آلماق ائستیه‌سئنئز،
[12] او واخت او آروادی اؤز اِوئنئزه گتئرئن، و او، باشینی قیرخیب دیرناقلارینی توتسون،
[13] اسئر آلیناندا گئیَن پالتارلاری چیخارتسین و اِوئنئزده قالیب آتا-آناسی اوچون بئر آی کامئل یاس توتسون؛ بوندان سونرا آروادی اونون یانینا گئرئب، اونون اَری اولا بئلرسئنئز و او سئزئن آروادینیز اولار.
[14] اگر او سونرادان سنئن خوشونا گلمه‌سه، گؤیلو ائسته‌دئیی کئمی اونو آزاد بوراخ. لاکئن آروادی اصلا پولا ساتا بئلمزسن، اونونلا پئس رفتار اده بئلمزسن، چونکی اونو ذلئل ادئبسن.
[15] اگر بئر کئشئنئن ائکی آروادی وارسا، بئرئنی سِوئب آیریسینی سِومئرسه، و هر ائکی آرواد دا اونا اوغوللار دوغموشسا، اگر ائلک اوغول سِومه‌دئیی آرواددان‌دیر،
[16] بو کئشی اَملاکینی ائرث اولاراق اوغوللاری آراسیندا بؤلَنده، ائلک اوغوللوق حاقّینی سِودئیی آروادینین اوغلونا وره بئلمز.
[17] سِومه‌دئیی آروادینین اوغلونو ائلک اوغول اولاراق تانیسین و بؤلونَن مالین ائکی قات پایینی اونا ورسئن، چونکی گوجونون ائلک یادئگاری‌دیر؛ ائلک اوغوللوق حاقّی اونوندور.
[18] اگر بئر آدامین دئکباش، عاصی، والئدینئنه قولاق آسمایان، آتا-آنا تربئیه‌سئنه محل قویمایان بئر اوغلو وارسا،
[19] آتا-آناسی اونو توتوب، شهرئن دروازاسینا، شهرئن آغساقّاللارینین یانینا گتئرسئنلر.
[20] شهر آغساقّاللارینا بله دسئنلر: ”بئزئم اوغلوموز دئکباش و عاصی‌دئر. سؤزوموزه هچ باخمیر، قارینقولو و عیّاشدیر.“
[21] او واخت شهرئن اهالئسی اونو داشا باسیب اؤلدورسونلر؛ بله‌جه بو پئسلئیی آرانیزدان تمئزله‌یئن. بوتون ائسرایئللی‌لر بو خبری اشئدئب قورخاجاقلار.
[22] اگر بئر آدام اؤلوم جزاسینا لایئق بئر گوناهدان اؤتری اؤلومه ورئلئب و اونو آغاجدان آسیرسینیز،
[23] میئتی گجه آغاجدا آسیلی قویمایین. گرک اونو همئن گون باسدیراسینیز، چونکی آسیلان آدام تارینین لعنتئنه دوچار اولوب. بله‌جه تارینیز ربّئن ائرث اولاراق سئزه وره‌جیی تورپاغی نجئسلَمَزسئنئز.