[1] دوشمنلرئنئزئن ضئدّئنه دؤیوشه چیخاندا، آتلاری، دؤیوش عارابالارینی و سئزدن بؤیوک بئر قوشونو گؤرنده قورخمایین، چونکی سئزی مئصئر تورپاغیندان چیخاردان تارینیز رب سئزئنله‌دئر.
[2] کاهئن دؤیوشدن قاباق قوشونون یانینا گلئب خالقلا دانیشسین.
[3] اونلارا بله دسئن: ”ای ائسرایئللی‌لر، قولاق آسین! بو گون دوشمنلرئنئزله دؤیوشه چیخیرسینیز. اوره‌یئنئز اوزولمه‌سئن. اونلاردان قورخوب اورکه‌مه‌یئن، اونلارین قاباغیندا دا اَسمه‌یئن،
[4] چونکی تارینیز رب سئزئنله گدئر کی، دوشمنلرئنئزله دؤیوشسون و سئزه نئجات ورسئن.“
[5] افسرلر ده خالقا بله دسئنلر: ”کئم وار کی، تزه اِو تئکئب و ائچئنده حله اوتورماییب؟ قوی اِوئنه قاییتسین. اولماسین کی، دؤیوشده اؤلسون و اِوئنده آیری آدام یاشاسین.
[6] کئم وار کی، اوزوم باغی سالیب، محصولونو حله ییغماییب؟ قوی او دا اِوئنه قاییتسین. اولماسین دؤیوشده اؤلسون و محصولونو آیریسی ییغسین.
[7] کئم وار کی، بئر قیزا نئشانلی اولوب، آمّا حله اِولَنمه‌یئب؟ او دا دؤنوب اِوئنه قاییتسین. اولماسین کی، دؤیوشده اؤلسون و نئشانلیسینی آیری بئری آلسین.“
[8] افسرلر خالقلا دانیشماغا داوام ورئب بله دسئنلر: ”کئم وار کی، قورخوسوندان اوره‌یئنی ییئر؟ او آدام دؤنوب اِوئنه قاییتسین، اِله کی، هموطنلرئنئن ده اوره‌یئنی اؤز اوره‌یی کئمی اوزمه‌سئن.“
[9] افسرلر قوشونلا دانیشماقلارینی قورتاراندان سونرا خالقا قوشون رهبرلری تعیئن اتسئنلر.
[10] دؤیوشمَک اوچون هانسی شهرئن ضئدّئنه یوروش اده‌سئنئز، اوّل اونون خالقینی باریشا چاغیرین.
[11] اگر حاضیر اولوب سئزئنله صولح اتسه‌لر و دروازالارینی سئزه آچسالار، او واخت اورانین بوتون اهالئسی سئزه ائجباری چالیشیب خئدمت اتسئنلر.
[12] یوخ، اگر سئزئن باریش دعوتئنئزی ردّ ادئب، دؤیوشه باشلاسالار، اوندا شهری موحاصئره‌یه آلین.
[13] تارینیز رب شهری سئزه تسلئم ادنده، اورانین بوتون کئشئلرئنی قیلینجدان کچئردئن.
[14] آروادلارینی، اوشاقلاری، حیوانلاری و شهرده اولان بوتون ماللاری دا تالان ادئن. تارینیز ربّئن سئزه وردئیی دوشمن مالینی اؤزونوزه صرف اده بئلرسئنئز.
[15] سئزدن اوزاقلاردا یِرلَشَن شهرلرئن هامیسینا دا کی، یاخینینیزدا اولان مئلّتلرئن دیئللر، بله رفتار ادئن!
[16] آنجاق تارینیز ربّئن ائرث اولاراق سئزه وره‌جیی بو مئلّتلرئن شهرلرئنده نَفَسی اولان هچ بئر جانلینی بِله، صاغ بوراخمایین.
[17] خئتلی‌لری، اِمورلولاری، کَنَعانلی‌لاری، پِرئزلی‌لری، خئولی‌لری، یِبوسلولاری تارینیز ربّئن سئزه امر اتدئیی کئمی کامئل محو ادئن کی،
[18] آللاهلارینا اتدئکلری بوتون ائیرنج شیلرئن اتمه‌یئنی سئزه اؤیرتمه‌سئنلر و سئز تارینیز ربّئن ضئدّئنه گوناه اتمیه‌سئنئز.
[19] هر هانسی بئر شهرله دؤیوشَنده، اگر اورانین موحاصئره‌‌سی اوزون چکسه، آغاجلاری بالتالاییب محو اتمه‌یئن. بو آغاجلارین محصولوندان یئیه بئلرسئنئز، آمّا اونلاری قیرمایین. مگر چؤلده‌کی آغاجلار ائنساندیر کی، اونلاری موحاصئره‌یه آلاسینیز؟
[20] آنجاق او آغاجلاری کَسئب محو اده‌بئلرسئنئز کی، اونلارین بار ورمه‌مکلرئنی بئلئرسئنئز. سئزئنله دؤیوشه چیخان شهری آلاناجاق، موحاصئره عملئیّاتیندا بو آغاجلاردان ائستئفاده اده بئلرسئنئز.