[1] ائسرایئلئن ائلک اوغلو رِعوبئن ائدی، آمّا آتاسینین یاتاغینی نجئسله‌دئیی اوچون اونون ائلک اوغوللوق حاقّی ائسرایئلئن اوغلو یوسئفئن نسلئنه ورئلدی و رِعوبئنئن نسلی شجره‌ده ائلک اوغول کئمی ساییلمادی.
[2] آنجاق یهودا قارداشلاری آراسیندا داها گوجلو اولدو و حؤکمدار اونون نسلئندن چیخدی. آمّا ائلک اوغوللوق حاقّی یوسئفئن ائدی.
[3] ائسرایئلئن ائلک اوغلو رِعوبئنئن اوغوللاری: خَنوخ، پالّو، خِصرون و کَرمی.
[4] یواِلئن نسلی: اونون اوغلو شِمَعیا، اونون اوغلو گوگ، اونون اوغلو شئمعی،
[5] اونون اوغلو مئکا، اونون اوغلو رِآیا، اونون اوغلو بَعَل،
[6] اونون اوغلو بِعِرا. اونو آشور پادشاهی تئگلَت‌پئلِسِر اسئرلئیه آپارمیشدی. بِعِرا رِعوبئنلی‌لرئن باشچیسی ائدی.
[7] نسئل شجره‌لرئنه گؤره اونلارین قوحوملاری بونلار ائدی: باشچی یِعی‌اِل، زِکَرئیّا،
[8] یواِل اوغلو شِمَع اوغلو آزاز اوغلو بِلَع. او، عَروعِرده یاشاییردی، تورپاغی نِبویا و بَعَل‌مِعونا قدر اوزانیردی.
[9] شرقه طرف فَرات چایینین بو تایینداکی چؤلون باشلانیش یرئنه قدر تورپاقلار اونون ائدی، چونکی گئلعاد تورپاغیندا چوخلو حیوانلاری وار ائدی.
[10] شاعولون دؤورونده بو آداملار حَگَرلی‌لرله موحارئبه ادئب اونلاری مغلوب اتدئلر و گئلعادین شرقئنده‌کی بوتون تورپاقلاردا حَگَرلی‌لرئن چادیرلاریندا یاشادیلار.
[11] جادلی‌لار سَلکایا قدر اوزانان باشان تورپاغیندا رِعوبئنلی‌لرئن موقابئلئنده یاشادیلار.
[12] باشاندا باشچی یواِل، کؤمکچئسی شافام، سونرا یَعنَه‌ی و شافاط ائدی.
[13] اؤز نسئل‌لرئندن اولان قوحوملاری بونلاردیر: مئکایئل، مِشولّام، شِبَع، یوره‌ی، یَعکان، زئیَع و عِبِر-جَمی یدّی نفر.
[14] بونلار بوز اوغلو یَخدو اوغلو یِشئشه‌ی اوغلو مئکایئل اوغلو گئلعاد اوغلو یارواَخ اوغلو خوری اوغلو ابئخه‌یئلئن اوغوللاری ائدئلر.
[15] گونو اوغلو عَبدی‌اِل اوغلو اَخی اونلارین نسئل باشچیسی ائدی.
[16] اونلار گئلعاددا، باشاندا و اونون قصبه‌لرئنده، شارونون سرحدلرئنه قدر اوزانان بوتون اوتلاق تورپاقلاریندا یاشادیلار.
[17] یهودا پادشاهی یوتامین و ائسرایئل پادشاهی یَروبعامین دؤورونده اونلارین هامیسی نسئل شجره‌لرئنده قید اولوندو.
[18] رِعوبئنلی‌لردن، جادلی‌لاردان، مِنَسّه قبئله‌سئنئن یاریسیندان اولان، قالخان و قیلینج داشییان، اوخ آتان، دؤیوش اوچون تعلئم گؤرموش و دؤیوشمه‌یی باجاران ائگئد آداملار قیرخ دؤرد مئن یدّی یوز آلتمیش نفر ائدی.
[19] اونلار حَگَرلی‌لردن اولان یِطورون، نافئشئن و نودابین نسئل‌لری ائله موحارئبه اتدئلر.
[20] ائسرایئللی‌لر دوشمنلری ائله دؤیوشده کؤمک آلدیقلاری اوچون حَگَرلی‌لری و اونلارلا اولانلارین هامیسینی مغلوب اتدئلر، چونکی ائسرایئللی‌لر دؤیوشده تارینی چاغیردیلار و اونا بِل باغلادیقلاری اوچون تاری اونلاری اشئتدی.
[21] اونلار دوشمنلرئنئن حیوانلارینی-اَلّی مئن دَوه‌سئنی، ائکی یوز اَلّی مئن قویون-کچئسئنی، ائکی مئن اِششه‌یئنی اَله کچئرتدئلر و یوز مئن آدامینی گؤتوروب آپاردیلار.
[22] هلاک اولانلار چوخ اولدو، چونکی بو دؤیوش تاریدان ائدی. اونلار اسئر اولونان زامانا قدر حَگَرلی‌لرئن یرلرئنده یاشادیلار.
[23] مِنَسّه قبئله‌سئنئن یاریسینین نسئل‌لری ده همئن تورپاقدا یاشادی. اونلار چوخالیب باشاندان بَعَل خِرمونا، سِنئره یعنی خِرمون داغینا قدر اوزانان تورپاغا یاییلدیلار.
[24] اونلارین نسئل باشچیلاری بونلار ائدئلر: عِفِر، یئشعی، اِلی‌اِل، عَزری‌اِل، اِرِمیا، هودَویا و یَخدی‌اِل. بونلار ائگئد دؤیوشچولر، آدلی-سانلی آداملار و نسئل باشچیلاری ائدئلر.
[25] آمّا اونلار آتالارینین تاریسینین ضئدّئنه خائنلئک اتدئلر و اونلارین قاباغیندا تارینین محو اتدئیی اؤلکه خالقلارینین آللاهلارینا سئتایئش ادئب خیانت اتدئلر.
[26] او واخت ائسرایئلئن تاریسی آشور پادشاهی پولدا، یعنی تئگلَت‌پئلِسِرده نئیّت اویاندیردی، او دا رِعوبئنلی‌لری، جادلی‌لاری و مِنَسّه قبئله‌سئنئن یاریسینی اسئر آپاریب خَله‌خده، خابوردا، هارادا و گوزان چایینین ساحئلئنده یِرلَشدئردی. اونلار بو گونه قدر ده اورادادیرلار.