[1] ائلئن هر آییندا بئر بؤلمه نؤوبه چکئردی. هر بؤلمه‌ده ائیئرمی دؤرد مئن نفر وار ائدی. بو بؤلمه‌لرئن بوتون ائشلرئنده پادشاها خئدمت ادن ائسرایئللی‌لرئن نسئل باشچیلارینین، مئنباشی‌لارین، یوزباشی‌لارین و مأمورلارین سئیاهیسی بودور:
[2] بئرئنجی آی اوچون بئرئنجی بؤلمه‌یه زَبدی‌اِل اوغلو یاشوبعام باشچیلیق ادئردی. اونون بؤلمه‌سئنده ائیئرمی دؤرد مئن نفر وار ائدی.
[3] او، پِرِص نسلئندن ائدی و بئرئنجی آی اوچون بوتون قوشون باشچیلارینین ریئسی ائدی.
[4] ائکئنجی آیین بؤلمه‌سئنه اَخوخلو دوده‌ی باشچیلیق ادئردی. مئقلوت باشچی سرکرده ائدی و اونون بؤلمه‌سئنده ائیئرمی دؤرد مئن نفر وار ائدی.
[5] اوچونجو آی اوچون اوچونجو قوشون باشچیسی کاهئن یِهویاداعین اوغلو بِنایا ائدی. اونون بؤلمه‌سئنده ائیئرمی دؤرد مئن نفر وار ائدی.
[6] بو بِنایا اوتوز ائگئددن بئری و اوتوز ائگئدئن باشچیسی ائدی. اونون بؤلمه‌سی اوستونه اوغلو عَمّئزاباد باشچیلیق ادئردی.
[7] دؤردونجو آی اوچون دؤردونجو باشچی یوآبین قارداشی عَساهِل ائدی، اوندان سونرا اوغلو زِبَدیا جانئشئن اولدو. اونون بؤلمه‌سئنده ائیئرمی دؤرد مئن نفر وار ائدی.
[8] بِشئنجی آی اوچون بِشئنجی باشچی یئزراخلی شَمهوت ائدی. اونون بؤلمه‌سئنده ائیئرمی دؤرد مئن نفر وار ائدی.
[9] آلتینجی آی اوچون آلتینجی باشچی تِقوعه‌لی عئقّشئن اوغلو عئرا ائدی. اونون بؤلمه‌سئنده ائیئرمی دؤرد مئن نفر وار ائدی.
[10] یدّئنجی آی اوچون یدّئنجی باشچی اِفرایئم اؤولادلاریندان پِلونلو خِلِص ائدی. اونون بؤلمه‌سئنده ائیئرمی دؤرد مئن نفر وار ائدی.
[11] سکّئزئنجی آی اوچون سکّئزئنجی باشچی زِراخ نسلئندن خوشالی سئبّه‌که‌ی ائدی. اونون بؤلمه‌سئنده ائیئرمی دؤرد مئن نفر وار ائدی.
[12] دوقّوزونجو آی اوچون دوقّوزونجو باشچی بِنیامئنلی‌لردن عَنه‌توتلو اَبئعِزِر ائدی. اونون بؤلمه‌سئنده ائیئرمی دؤرد مئن نفر وار ائدی.
[13] اونونجو آی اوچون اونونجو باشچی زِراخ نسلئندن نِطوَفالی مَهره‌ی ائدی. اونون بؤلمه‌سئنده ائیئرمی دؤرد مئن نفر وار ائدی.
[14] اون بئرئنجی آی اوچون اون بئرئنجی باشچی اِفرایئم اؤولادلاریندان پئرعاتونلو بِنایا ائدی. اونون بؤلمه‌سئنده ائیئرمی دؤرد مئن نفر وار ائدی.
[15] اون ائکئنجی آی اوچون اون ائکئنجی باشچی عوتنی‌اِلئن نسلئندن نِطوَفالی خِلده‌ی ائدی. اونون بؤلمه‌سئنده ائیئرمی دؤرد مئن نفر وار ائدی.
[16] ائسرایئل قبئله‌لری اوستونده اولان باشچیلار بونلاردیر: رِعوبئنلی‌لرئن باشچیسی زئکری اوغلو اِلئعِزِر؛ شَمعونلولارین باشچیسی مَعَکا اوغلو شِفَطیا؛
[17] لاوئلی‌لرئن باشچیسی قِمواِل اوغلو خَشَبیا، هارون نسلئنئن باشچیسی صادوق؛
[18] یهودالی‌لارین باشچیسی داوودون قارداشلاریندان بئری اِلئهو؛ یئسّاکارلی‌لارین باشچیسی مئکایئل اوغلو عومری؛
[19] زِبولونلولارین باشچیسی عوبَدیا اوغلو یئشمَعیا؛ نَفتالی‌لرئن باشچیسی عَزری‌اِل اوغلو یِرئموت؛
[20] اِفرایئم اؤولادلارینین باشچیسی عَزَزیا اوغلو هوشِعَع؛ مِنَسّه قبئله‌سئنئن یاریسینین باشچیسی پِدایا اوغلو یواِل؛
[21] گئلعاددا اولان مِنَسّه قبئله‌سئنئن یاریسینین باشچیسی زِکَرئیّا اوغلو عئدّو؛ بِنیامئنلی‌لرئن باشچیسی اَبنِر اوغلو یَعه‌سی‌‌اِل؛
[22] دانلی‌لارین باشچیسی یِروخام اوغلو عَزه‌رِل. بونلار ائسرایئل قبئله‌لرئنئن باشچیلاری‌دیر.
[23] داوود ائیئرمی یاشیندا و بوندان آشاغی یاشدا اولانلاری حسابا آلمادی، چونکی رب وعده ورمئشدی کی، ائسرایئلی گؤیلرده‌کی اولدوزلار قدر چوخالداجاق.
[24] صِرویا اوغلو یوآب سئیاهی‌یا آلماغا باشلادی، لاکئن بونو باشا چاتدیرمادی. بو سئیاهی‌یا آلمادان اؤتری ربّئن قضبی ائسرایئل اوستونه گلدی و سئیاهی‌یا آلما پادشاه داوودون سالنامه‌لر کئتابینا داخئل اولمادی.
[25] پادشاهین آنبارلارینا نظارت ادن عَدی‌اِل اوغلو عَزماوِت؛ عوزّئیا اوغلو یِهوناتان زمئلرده، شهرلرده، کَندلرده و بورجلرده اولان آنبارلارا نظارت ادئردی؛
[26] کِلوب اوغلو عِزری زمئده چالیشان اَکئنچئلرئن اوستونده نظارتچی ائدی؛
[27] اوزوم باغلارینا نظارت ادن رامالی شئمعی ائدی؛ اوزوم باغینداکی شراب آنبارلارینا ییغیلان اوزوم محصولونا نظارت ادن شئفئملی زَبدی ائدی؛
[28] هامار بؤلگه‌ده اولان زیتونلوقلار و وحشی انجئر آغاجلارینا نظارت ادن گِدِرالی بَعَل‌خانان ائدی؛ یاغ آنبارلارینا نظارت ادن ده یوآش ائدی؛
[29] شارون اوواسیندا اوتلایان مال-حیوانا باخان شارونلو شئطره‌ی ائدی؛ دره‌لرده اولان مال-حیوانا باخان عَدلای اوغلو شافاط ائدی؛
[30] دَوه‌لره باخان ائسماعئل‌لی عوبئل ائدی؛ اِششَکلره باخان دا مِرونوتلو یِخدِیا ائدی؛
[31] قویون-کِچئیه باخان خَگِرلی یازئز ائدی. بونلارین هامیسی داوود پادشاهین مولکلرئنه باخان ریئسلر ائدئلر.
[32] داوودون عَمئسی یِهوناتان مصلحتچی ائدی. او، آغیلّی و مئرزه ائدی. خَکمونی اوغلو یِخی‌اِل پادشاه اوغوللارینین تربئیه‌چئسی ائدی.
[33] اَخئتوفِل پادشاهین مصلحتچئسی ائدی. اَرکلی خوشه‌ی پادشاهین دوستو ائدی.
[34] اَخئتوفِلدن سونرا یرئنه بِنایا اوغلو یِهویاداع و اِبیاتار اولدولار. پادشاهین قوشون باشچیسی دا یوآب ائدی.