[1] شیطان ائسرایئللی‌لرئن ضئدّئنه قالخدی و داوودو تحرئک اتدی کی، ائسرایئللی‌لری سئیاهی‌یا آلسین.
[2] داوود یوآبا و خالقین باشچیلارینا ددی: «گدئن، بئرشئبادان دانا قدر ائسرایئللی‌لری سئیاهی‌یا آلین و سئیاهینی منه گتئرئن کی، اونلارین سایینی بئلئم.»
[3] یوآب ددی: «رب خالقینی اولدوغوندان یوز قات آرتیق اتسئن. آمّا، آغام پادشاه، مگر اونلارین هامیسی آغامین قوللاری دیئل؟ نه اوچون آغام بونو ائسته‌یئر؟ نه اوچون آغام ائسرایئله تقصئر سببی گتئرسئن؟»
[4] لاکئن پادشاهین سؤزو یوآبا قالئب گلدی. یوآب چیخیب بوتون ائسرایئلی گَزدی، سونرا دا اورشلئمه گلدی.
[5] او، خالقین سئیاهیسینی داوودا وردی. بوتون ائسرایئلده قیلینج چکن بئر مئلیون یوز مئن نفر، یهودادا دا قیلینج چکن دؤرد یوز یتمئش مئن نفر آدام وار ائدی.
[6] لاکئن یوآب اونلارین آراسیندا لاوئلی‌لری و بِنیامئنلی‌لری سئیاهی‌یا آلمادی، چونکی پادشاهین سؤزوندن آجیغی گلمئشدی.
[7] بو ائش تارینین گؤزونده خوش دیئلدی، اونا گؤره ده ائسرایئلی جزالاندیردی.
[8] داوود تارییا ددی: «بو ائشی گؤرمکله بؤیوک گوناه اتمئشم. ائندی آمّا، یالواریرام، بو قولونون تقصئرئندن کچ، چونکی چوخ آغیلسیزلیق اتمئشم.»
[9] رب داوودون گؤروجوسو جادا ددی:
[10] «گت، داوودا دِه کی، رب بله دیئر: ”سنه اوچ شی تکلئف ادئرم، اؤزون اوچون بونلارین بئرئنی سِچ کی، سنه اِدئم.“»
[11] جاد داوودون یانینا گلئب اونا ددی: «رب بله دیئر: ”اؤزون اوچون سِچ:
[12] یا اوچ ائل آجلیق اولاجاق، یا اوچ آی دوشمنلرئن سنی تعقئب اده‌جک، و اونلارین قیلینجی سنی ووراجاق، یا دا اوچ گون ربّئن قیلینجی اولان وبا اؤلکه‌نئن اوستونه گله‌جک و ربّئن مَله‌یی ائسرایئل تورپاغیندا هر یرده قیراجاق.“ ائندی قرار ور گؤرک منی گؤندَ‌رَنه نه جاواب ورئم؟»
[13] داوود جادا ددی: «بؤیوک بئر سیخینتیدایام. قوی ربّئن اَلئنه دوشوم، چونکی اونون رحمتلری چوخ بؤیوکدور. آمّا قویما ائنسان اَلئنه دوشوم.»
[14] بله‌جه رب ائسرایئل اوستونه وبا گؤندَ‌ردی و ائسرایئللی‌لردن یتمئش مئن نفر هلاک اولدو.
[15] تاری بئر ملک گؤندَ‌ردی کی، اورشلئمی محو اتسئن. ملک عنقرئب بو ائشی باشلایاجاغی واخت، رب بونو گؤروب بو بلایا گؤره تأسّوفلَندی و هلاک ادن مَلَیه ددی: «ائندی بَسدئر، اَل ساخلا!» ربّئن مَله‌یی یِبوسلو اورنانین خرمنئنئن یانیندا دایانمیشدی.
[16] داوود باشینی قالدیریب ربّئن مَله‌یئنی گؤردو. ملک اَلئنده‌کی سئیرئلمئش قیلینجی اورشلئمئن اوستونه اوزادیب، یِرله گؤیون آراسیندا دایانمیشدی. چولا بورونَن داوود و آغساقّاللار اوزو اوسته یره قاپاندیلار.
[17] داوود تارییا ددی: «خالقی سئیاهی‌یا آلماغی امر ادن مگر من دیئلدئم؟ من گوناه اتدئم و حقئقتن، پئس ائش گؤردوم، لاکئن بو یازیق خالق نه ادئب؟ یارب تاریم، قوی سنئن اَلئن منئم و آتا نسلئمئن ضئدّئنه قالخسین، آمّا اؤز خالقینا وبا گؤندَ‌رمه.»
[18] او واخت ربّئن مَله‌یی جادا امر اتدی کی، داوودا دسئن: «قوی داوود چیخیب یِبوسلو اورنانین خرمنئنده ربّه بئر قوربانگاه دوزَلتسئن.»
[19] ربّئن آدی ائله جادین ددئیی سؤزه گؤره داوود چیخدی.
[20] اورنان گری دؤنوب مَله‌یی گؤردو. اونونلا بئرلئکده اولان دؤرد اوغلو اؤزلرئنی گئزلَتدئلر. اورنان بوغدا دؤیوردو.
[21] داوود اورنانین یانینا گلنده، اورنان باخیب داوودو گؤردو، خرمندن چیخدی و اونا یره قدر تعظئم اتدی.
[22] داوود اورنانا ددی: «بو خرمنگاهی منه ور کی، بورادا رب اوچون قوربانگاه تئکئم. اونو منه کامئل دَیَرئنه سات کی، خالقین اوستونه گلن وبا دایانسین.»
[23] اورنان داوودا ددی: «گؤتور، سنئن اولسون، قوی آغام پادشاه گؤزونده خوش اولانی اتسئن. من یاندیرما قوربانی اوچون اؤکوزلر، اودون یرئنه بوغدا دؤوَنلری، تاخیل تقدئمی اوچون ده بوغدانی ورئرم، بونلارین هامیسینی ورئرم.»
[24] لاکئن داوود پادشاه جاواب وردی: «یوخ، حتمن کامئل دَیَرئنه ساتین آلاجاغام، چونکی سنئن مالینی رب اوچون گؤتورمه‌رم، هاوایی مالی ائله ده یاندیرما قوربانی ورمه‌رم.»
[25] بونا گؤره ده داوود بو یر اوچون اورنانا آلتی یوز شِکِل آغیرلیغیندا قیزیل وردی.
[26] داوود اورادا ربّه بئر قوربانگاه دوزَ‌لدئب، یاندیرما و باریش قوربانلاری تقدئم اتدی. او، ربّی چاغیردی، رب ده یاندیرما قوربانلارینین گتئرئلدئیی قوربانگاها گؤیدن اود گؤندَ‌رئب اونا جاواب وردی.
[27] رب مَلَیه امر اتدی، او دا قیلینجینی قینینا قویدو.
[28] او واخت داوود، یِبوسلو اورنانین خرمنگاهیندا، ربّئن اونا جاواب وردئیئنی گؤردوکده اورادا قوربان کَسدی.
[29] چونکی او واخت موسانین صحرادا دوزَلتدئیی ربّئن خیمه‌سی و یاندیرما قوربانلاری اوچون دوزَ‌لدئلَن قوربانگاه، گئبعونداکی پرستئشگاهدا ائدی.
[30] آمّا داوود تاریدان سوروشماق اوچون اونون حوضورونا گده بئلمئردی، چونکی ربّئن مَله‌یئنئن قیلینجیندان قورخوردو.