[1] Yatiñ kankañax utap utachasi, ukarusti paqallqu sayirinakampiw k'achacht'i;
[2] uywanak jach'a manq'äwitakix kharirayi, mä suma vino wakicht'i, manq'añ ucharaki.
[3] Ukatsti uywat tawaqunakaruw khiti, marka amsta chiqatpach art'apxañapataki:
[4] “¡Jan yatiñan waynanaka, akkhar jutapxam!” sasa. Jan amuyt'asirinakarusti akham jawsayi:
[5] “Jach'a manq'äwixar jutapxam, nayan wakicht'at vino umt'ir jutapxam.
[6] Jan amuyt'asis sarnaqañat jithiqtapxam, ukat jakapxäta; ch'ikhi kankañan jaqinakjam sarnaqapxam” sasa.
[7] Jan ist'asir ñanqha jaqiru chiqachirixa, tuqimpi, chuyma usu arunakampik katuqasi.
[8] Jan ist'asiri ñanqha jaqiru chiqacham, jupasti jumarux uñisïtamwa; ukampis amuyt'asir jaqir chiqacham, jupasti jumarux munasïtamwa.
[9] Yatiñ kankañan jaqir yaticham, yatiñ kankañapax jilxataniwa; aski jaqir yaticham, yatiñapasti jilxataniwa.
[10] Yatiñ kankañan qalltapax, Diosar axsartañawa; Qullanan qullanapar uñt'añax ch'ikhi kankañanïñawa.
[11] Yatiñ kankañïpan walja urunak jakäta, walja maranakaw jakarakïta.
[12] Yatiñan jaqïsta ukaxa, juma pachpatakiw yatiñanïskäta; jan ist'asir jaqïsta ukasti, jumakiw t'aqhisiskarakïta.
[13] Pisi yatiñanïñax arunak apnaqir warmjamawa, pisi chuymani, jan yatiñani.
[14] Jupax uta punkuparuw qunt'asi, taqpach markax uñstkis ukawjana,
[15] ukatsti thakhi saririnakaruw jawsi, suma thakhinjam saririnakaru:
[16] “¡Jan yatiñan waynanaka aka chiqar jutapxam!” sasa. Ukatsti jan amuyt'asirinakar sanipxañapatakiw khitharaki akham sasa:
[17] “Lunthatat umax juk'amp muxsawa; jamasat t'ant'a manq'añax juk'amp sumarakiwa” sasa.
[18] Ukampis uka pisi chuyman jaqinakax janiw yatipkiti, jach'a manq'äwitaki jawsata jaqinakapax jiwañar sarasipkatapa.