[1] Munat wawaxay, janiy yatichäwinakaxat armasimti; kamachi arsutanakax chuymamarupun imam,
[2] uk lurasasti jaya maranakaw jakasïta, kusisitaw sarnaqasirakïta.
[3] Janipun kunapachas armasimti munasiñampita, chiqa kankañampita; mä wallqar uñtat kunkamar ukanak warkuntasim. Chuymamar ukanak sum imasirakim,
[4] ukhamat khuyapayasiñampi, sumar uñjatäñamp jikxatäta Diosan nayraqatapansa, jaqinak taypinsa.
[5] Tatitur taqi chuymamamp katuyasim; janiy juman ch'ikhi kankañamaruk alkatamti.
[6] Taqi luräwinakaman Tatitut amtasipunim, jupaw chiqa thakhinjam irpaskätam.
[7] Janiy sinti yatiñanjam tukumti; Tatitur axsartam, taqi ñanqhat jithiqtam,
[8] ¡ukaw janchimar ch'amañchir suma qullaxa!
[9] Taqi yänakamamp Tatitur jach'añcham, yapu apthapitamat nayrïr achunak churañampirak waqaycham;
[10] ukhamat pirwanakamas phuqhantat uñjasini, vino imañanakamas llumiraskarakini.
[11] Munat wawaxay, janiy Tatitun yatichäwip jisk'achamti, janirakiy jumar chiqachatapatsa mayjt'asimti;
[12] Tatitux khitirutix munaski ukarux chiqachiwa, kunjämatix mä awkix munasit wawapar chiqachki ukhama.
[13] Yatiñ kankañ jikxatir jaqix, kusisiñaniwa, ch'ikhi kankañ katuqir jaqis kusisiñanirakiwa;
[14] ukasti qullqit sipana, qurit sipan juk'amp askinak jikxatayi.
[15] Yatiñ kankañax suma k'ajkir qalanakat sipansa juk'amp jila alaniwa; ¡janiw wali jila alan yänakampis chikachayatäkaspati!
[16] Kupi amparampix walja maranak jakañ churi, ch'iqa amparampisti qamir yänakampi, aytat kankañamp churaraki.
[17] Jupan sarnaqäwipar arkañax kusiskayawa, thakhinakapanjam sarnaqañasti suman jakañawa.
[18] Yatiñ kankañ jikxatiritakix ukax jakañawa; ¡yatiñ kankañ katxäsirinakasti kusisiñaniwa!
[19] Tatitux yatiñ kankañampi, ch'ikhi kankañampiw alaxpachsa, akapachsa sayt'ayi.
[20] Yatiñ kankañampiw lamar quta jaljtayi, yatiñ kankañampiw qinayanakat jallu purxatayani.
[21] Munat wawaxay, amuyt'a kankañ imapunim, iwxa arunakarjam sarnaqañ jan chhaqhayasimti,
[22] ukasti jumarux jakañ churätam, mä suma wallqampjamaw k'achacharakïtam.
[23] Jan axsarasaw thakhinjam sarnaqäta, janipuniw kunapachas lanqtaskätati.
[24] Samart'askäta ukapachax janiw axsarayaskätati; ikintkxäta ukkhasa, jan axsarasaw ikxäta.
[25] Akatjamat utjir chijinakarux janiw axsarkätati jan wali jaqinakar tukjañ uru jutkani ukarus janirakiw axsarkätati,
[26] Tatituw jan axsarañamatak ch'amañchaskätam, kuna sipitar jalt'añatsa qhispiyarakïtamwa.
[27] Yanapt'a mayiri jaqirux yanapt'apunïtawa, jupar yanapt'añamax amparamankaskchi uka.
[28] Jichhür yanapt'irjamäsksta ukaxa, jan qharürutak imasimti. Janipun jaqi masimarux samti: “Qharüruw yanapt'äma” sasaxa.
[29] Jumar alkatir jaqi masimatakix janiw kuna ñanqhsa amtätati.
[30] Jan khitimpis ch'axwañar mantamti janitix khitis jumar kuna ñanqha lurkätam ukaxa.
[31] Luqhi chuyman jaqirux jan jach'ar aptamti, janirak jupjam sarnaqañsa munamti;
[32] Tatitux luqhi chuyman jaqirux uñisiwa, aski jaqinakampisti sumankiwa.
[33] Tatitux ñanqha lurir jaqin utaparux ñanqhachiwa, aski jaqin utaparusti askimpiw phuqt'i.
[34] Tatitux sawkasir jaqinakat sawkasiwa, alt'at chuyman jaqinakarusti khuyapayasiñampiw uñji.
[35] Yatiñan jaqinakan churäwipax aytat kankañawa, jan amuyt'asir jaqinakasti p'inqachatäniwa.