[1] Chiqachäwi jan katuqañ munir jaqix, jan mayampitakiw tukjat uñjasini.
[2] Aski jaqinakan apnaqatax, markax kusisiwa; ñanqha lurir jaqinakan apnaqat markasti, t'aqhisiwa.
[3] Yatiñ kankañan wawax awkipar kusisiyiwa; jan wali sarnaqir warminakamp sarnaqiristi, qullqi tukunti.
[4] Chiqa kankañampi apnaqir reyix, markarux thuruñchiwa, qullqik mayir reyisti aynacht'añaruw marka puriyi.
[5] Masipar sinti jach'achir jaqix, chiqpachansa jan walt'añapatakiw sipita uchaski.
[6] Ñanqha lurir jaqin sipitapax, jupan pachpa juchanakapawa, axsartir jaqisti kusisitaw jakasi.
[7] Aski jaqix jan utjirin jaqin sarnaqäwipat llakisi, ñanqha lurir jaqitakisti janiw ukax kunäkisa.
[8] Ch'axwanak utjayir jaqinakax, markaruw uxtayi; yatiñan jaqinakasti sumankañ utjayi.
[9] Yatiñan jaqin mä jan amuyt'an jaqimpi ch'axwañapax janiw walïkiti; q'apisiskpasa, sawkasiskpasa, janiw kuns askichkaniti.
[10] Jaqi jiwayir jaqinakax, chiqa aski jaqinakan jiwañap munapxi.
[11] Jan amuyt'an jaqix mäkiw kunatsa q'apisi, yatiñan jaqisti q'apisiñap mäkiw apanuku.
[12] K'ari arunakar ist'ir marka apnaqirix, ñanqha lurir luqtirinakan muyuntataw jakani.
[13] T'aqhisiyat jaqirusa, t'aqhisiyir jaqirusa, Tatitux panpachaniruw nayranak churi.
[14] Jan kunan jaqinakaru, chiqa kankañamp apnaqir reyix, wiñayatakiw reyi qunuñap thuruñchi.
[15] Jawq'ampi tuqimpiw yatiqañax utji, munañan wawasti taykaparux p'inqachayiwa.
[16] Kawkhantix ñanqha lurir jaqinakax mirantki ukkhanxa, walja jucha lurañanakaw utjaraki, chiqa aski jaqinakasti uka jaqinakan aynacht'äwip uñjani.
[17] Wawamar chiqacham, jupasti samarataw jakayätam, walirak kusisiyätam.
[18] Kawkhantix Diosan arunakapax jan yatichaski ukkhanxa, jaqinakax munañaparuw sarnaqi; ¡Diosan kamachip phuqhir markax kusisiñaniwa!
[19] Uywat jaqirux janiw arumpik chiqachañäkiti, jupax amuyaskiwa, ukampis janiw ist'askiti.
[20] Jan amuyt'asir jaqiw walïskaspa, jan amuyt'asis mäki parlir jaqit sipana.
[21] Uywataparu wawatpach sinti q'ayachir jaqix, qhiparuw amtasini.
[22] Mäki kunatsa mayjt'asir jaqix, nuwasiñanak utjayi, walja kutiw pantjasiraki.
[23] Jach'a jach'a tukurix jisk'achataw uñjasini, llamp'u chuymanisti jach'ar aptatäniwa.
[24] Lunthatar yanapirix jupa pachpaw uñisisi; ñanqhachäwinak ist'kasinsa jupax janiw arskiti.
[25] Jaqinakar axsarañax sipitar uñtatawa, ukampis Tatitur iyawsir jaqiw imatäni.
[26] Waljaniw jilïr apnaqirin khuyapayasiñap thaqhapxi, ukampis Tatitukiw chiqapar uñjirixa.
[27] Aski jaqinakax, jan wali jaqinakarux uñisiwa; ñanqha lurir jaqinakasti, aski jaqinakarux uñisirakiwa.