[1] Munat wawaxay, jumatix arunakax katuqitäta; kamachi arunakaxsa imäta,
[2] yatiñ kankañarus ist'äta; taqi chuymampi ch'ikhi kankañar alkatarakïta;
[3] jumatix ch'ikhi kankaña mayïta amuyt'añ kankañsa mayirakïta;
[4] qullqirjama, jila alan imat yänakarjam thaqhäta,
[5] ukapachaw Tatitur axsartañ yatïta; ¡kunäkitix Diosar uñt'añax uk jikxatarakïta!
[6] Tatituw yatiñ kankañ churirixa; amuyt'añampi, yatiñ kankañampix lakapat mistu.
[7] Tatituw chiqa aski, jan pantjasis sarnaqir jaqirux yanapi, arxataraki.
[8] Jupaw chiqap sarnaqir jaqirux uñji, taqi chuyma jupar iyawsirirux imaraki.
[9] Ukapachaw yatirakïta chiqäki, askïki uksa, ukat amuyt'arakïta taqi askin sarnaqañapun sumätapa.
[10] Yatiñ kankañax chuymamaruw mantani, ukatsti yatiñ kankañan muxsätap yant'äta.
[11] Amuyt'a kankañaw uñjaskätam, ch'ikhi kankañaw imaskätam.
[12] Yatiñ kankañaw jan wali thakhit qhispiyätam, ñanqha arunak parlir jaqinakat jithiqtayätam;
[13] aski thakhit saraqirinakata, ch'amak thakhin sarnaqirinakata;
[14] jan walinak luras kusisirinakata, ñanqha luratanakapat k'uchirt'asirinakata,
[15] q'iwi q'iwi thakhinakan sarnaqirinakata; chiqa thakhit maysar saranukurinakat jithiqtayätam.
[16] Yatiñ kankañaw jan wali warmit qhispiyätam, quña arunakampi iyawsayir jan uñt'at warmit jithiqtayätam.
[17] Tawaqu kankañan sarnaqki uka chachar apanukuri warmita, Diosampi arust'äwi luratapat armasirit jithiqtayätam.
[18] Uka warmin utapar sarir thakhinjam sarañasti, jiwañar puriyir thakhiwa;
[19] uka warmimp sarnaqirinakax janiw kuttankxapxiti, janipuniw wasitatamp suma jakañ thakhir kuttankxapxiti.
[20] Jumasti suma thakhinjam sarnaqam, aski chiqa jaqinakan sarnaqäwiparjam sarnaqarakim.
[21] Aski lurir q'uma jaqinakax, wiñayatakiw aka uraqin jakani.
[22] Ukampis jan wali sarnaqir jaqinakampi, sallqa jaqinakampix, aka uraqit jaqunukuta, apanukutaw uñjasini.