[1] Munat wawaxay, jaqi masim laykutix manusiñapatak sayt'sta ukaxa, jan ukax, jan uñt'at jaqi laykutix arsutamax utjchi ukasa,
[2] juma pachpaw sipit uskusisktaxa; pachpa arunakamaruw jalantasktaxa.
[3] Munat wawaxay, jumax maynin amparapanktawa, ukat qhispiñatakisti akanak luram: jan p'inqasis jaqi masiman ukar achikt'asir mäki saram.
[4] Jan ukanak askichkasinxa jan ikimti, janirak mä juk'as samaramti;
[5] mä tarujar uñtat katuntirimat jumax jaltxam; sipitatsti jaltir jamach'ir uñtat jaltxam.
[6] Jayra jaqi, k'isimiranakar uñtam; irnaqatanakap uñjam, jupanakat yatiqasim.
[7] Janiw khitis jupanakar luraykiti, janirakiw khitis uñch'ukiykiti, apnaqkarakisa;
[8] ukampis jupanakax yapu apthapiñ pachan manq'añ imkatasipxi.
[9] Jayra jaqi, ¿kunapachkamarak ikïtasti? ¿Kunapacharak ikit jan sartkätasti?
[10] Jumatix ukham iki chutaliskäta, sum ikiñatakis amparanakam qhumthapisiskäta ukkhaxa,
[11] jan kunan uñjasiñaw katuntätam, mä muyuyku jaqir uñtata.
[12] Ñanqha jan wali jaqix, k'ari arunak parlasakiw sarnaqi;
[13] nayrampiw ch'irmt'i, kayunakap unuqt'ayi, ampar luk'anapampiw wikucht'i;
[14] amuyupasti ñanqha lurañamp chhaqtayatawa, chuymapan jan walinak lup'isakiw sarnaqi, ch'axwanak utjayañ lup'isakiw sarnaqaraki.
[15] Ukat jupatak jan walt'añax akatjamat purinini; mä ch'ipxtanak q'ala tukjat uñjasini.
[16] Tatitux suxta jan walinakaruw uñisi; paqallqüristi jupatakix jan walipuniwa:
[17] Jach'a jach'a tukuñanakaru, k'ari parlañanakaru, jan juchan jaqi jiwayañanakaru,
[18] jan wali amtañanakaru, jan wali lurañanakar mäki sarañanakaru,
[19] k'ari irkatirit sarnaqañanakaru, jila pura ch'axwañanakaru.
[20] Munat wawaxay, chuymamarux imapunim, awkiman, taykaman iwxa arunakapsa, yatichäwinakapsa.
[21] Aka iwxanak katxäsipunim, ukanakax chuymamankapunpan.
[22] Uka arunakaw saräwiman irpätam, ikiskäta ukkhasti ukanakaw imätam, ikit sartkäta ukkhasti ukanakaw parlarakïtam.
[23] Chiqpachansa iwxa arunakampi, yatichäwinakampix qhanaskir lamparar uñtatawa; chiqachäwinakampi, suma iwxt'a arunakampix, jakañ thakhiwa.
[24] Jan wali sarnaqir ñanqha warmitsa imätamwa, suma quña arunakapatsa imarakïtamwa.
[25] Janiy chuymaman warmin jiwakïtap layku munapayamti, ¡janirak uñtatapampis atipjayasimti!
[26] Jan wali sarnaqir warmix qullqi laykukiw sarnaqi, chachanïkasin jucha lurir warmisti, aski chachäki uka katuykamaw sari.
[27] ¿Mä jaqisti isipar nina apnaqaspati jan nakhantayasaxa?
[28] ¿Mä jaqisti nina sank'anak patanjam sarnaqaspati kayup jan naksuyasisaxa?
[29] Jaqi masipan warmipamp jucha lurañan sarnaqir jaqix ukhamarakiwa, juchapsti uñt'asipuniniwa.
[30] Janiw khitis lunthatar jisk'achkiti, manq'at awtjatätap layku lunthatasitapata;
[31] lunthataskirtix katjayaskani ukapachasti, lunthatasitapat paqallqu ukkhamp kutt'ayani, kunatix jupan utjki taqi ukanakamppach churxarakini.
[32] ¡Jaqi masipan warmipamp sarnaqirix jan amuyt'asiriwa! ¡Ukham jan wal lurir jaqixa, jupa pachpaw tukjasiski!
[33] Jupasti nuwjata, jisk'achataw uñjasini, uka p'inqa uñjasitapax janiw armatäkaniti.
[34] Warmipampi sallqjayasir jaqin q'apisitapax ninar uñtatawa, ukhamat ukham phuqsusiñ uru purinipansti janiw khuyapayaskaniti;
[35] janiw kuna churatampis chuymachaskaniti, janirakiw walja churäwinakampis chuymap utt'ayaskaniti.