[1] Junt'u pachan khunuñapax janiw askïkiti, yapu apthapi pachan jalluñapas janiw walïkiti, janirakiw jan amuyt'an jaqir jach'achañas askïkiti.
[2] Ina ch'usat ñanqhachäwix janiw khitirus wakt'kiti; chhaqhat jamach'ir uñtata, jan tapani golondrina sat jamach'ir uñtatakiwa.
[3] Caballorux axaptayañawa, asnorux jakimampiw irpnaqaña, jan amuyt'an jaqirusti jawq'jasarakiw chiqachaña.
[4] Jan amuyt'an jaqirux jan arxayamti, jupjam jan tukuskañamataki.
[5] Jan amuyt'an jaqirux jupatakjam arunakampi arusxatam, jan jupan amuyuparjama yatir tukuñapataki.
[6] Jan amuyt'an jaqir iwxa arunak apayañax, janis khitir khitksna ukhamawa.
[7] Kamisatix suchu jaqix jan jayar sarirjamäkixa, ukhamarakiw jan amuyt'asir jaqin säwi arunakapaxa.
[8] Kamisatix maynix q'urawar qala chinkatki, ukhamarakiw jan amuyt'asir jaqir jach'ar aptañaxa.
[9] Kamisatix machat jaqix ch'aphin ch'aphintatax jan usuyaskixa, ukhamarakiw jan amuyt'asir jaqix säwi arunak jan amuyt'kiti.
[10] Kamisatix alayar qalanak jaqt'añax jan walïkixa, ukhamarakiw jan amuyt'an jaqir utaman lurañanak churañaxa.
[11] Kamisatix mä anux waq'aqsutapar kuttasixa, ukhamarakiw jan amuyt'an jaqix jan wali luräwinakapar kuttasi.
[12] Yaqhip jaqix wali yatiñanïkaspas ukhamaw tuku, ukampis jan amuyt'asir jaqiw jupat sipan chiqachasispa.
[13] Jayra jaqix jan irnaqañ munasax siwa: “Anqan mä leonaw utji, manq'antitaspawa” sasa.
[14] Punkux bisagrapan uksar aksar muytaskixa, ukhamaw jayra jaqix ikiñapan uksar aksar qurumnaqaski.
[15] Jayra jaqix amparapamp chuwar luqantkasinsa, lakapar manq'a apkatasiñsa jayrasiwa.
[16] Jayra jaqix wali yatiñan jaqjamaw tuku jupjamax janis khitis utjkaspa ukham amuyasi.
[17] Mayninakan ch'axwañanakapar mantañaxa, qhuru anur jinchupat katthapksna ukhamawa.
[18] Jilat masipar sallqjir jaqix,
[19] ina ch'usar qalanak jaqtir luqhi jaqir uñtatawa, ukatsti siwa: “Aliqakiw sawkt'asisksma” sasa.
[20] Lawanak jan uchatax, ninax jiwarxakiwa; arunaka apnaqiritix jan utjki ukkhaxa ch'axwanakax tukusxiwa.
[21] K'illimix nina sank'ayañatakiwa; lawax nina aqtayañatakiwa; ch'axwanak utjañapatakisti, arunak apnaqir jaqiw munasi.
[22] Arunak apnaqañax jaqitakix muxsanakjamawa, ukampis chuyma manqhakamaw purt'i.
[23] Kamisatix ñiq'i phukhur qullqimp jawikipaskixa, ukhamaw ñanqha amtañampi arsuta quña arunakaxa.
[24] Uñisir jaqix, parlaski ukkhax imt'iwa, chuymap manqhinsti jan wali lurañanak amtaski.
[25] Suma quña arunakamp parlätam ukkhasti, jan iyawsamti, chuymapax jan wali lurañanakamp phuqt'atawa;
[26] uñisiñap imt'añ munkani ukasa, ñanqha amtäwipax taqininsa uñjkañaw qhanstani.
[27] Mä p'iya allirixa, uka pachparuw jalantani; mä jach'a qala qurumt'ayirirux, uka pachpa qalaw jupar jalxattani.
[28] K'ari jaqix chiqa kankañar uñisiwa; quña aruni sallqa jaqisti jan walt'añanak sartayi.