[1] Salomonan arsüwinakapa. Jupax Davidan yuqapänwa, Israelan reyiparakïnwa.
[2] Aka säwinakasti: Yatiñ kankañampi, yatichäwinakamp yatiyañatakiwa, yatiñan phuqt'at arunaka amuyt'äwir yanapt'añataki,
[3] yatichäwinaka, ch'ikhi kankañ yatichañataki; aski luräwimpi, chiqa kankañan sarnaqañamp jikxatañataki;
[4] jan yatiñan waynanakar ch'ikhi kankañ yatichañataki, yatiñampi, amuyt'asiñampi churañatakiraki.
[5] Yatiñani ch'ikhi jaqixa, aka arunak ist'iwa, ukhamat juk'amp yatiñ kankañampi, ixwanakamp jikxati,
[6] yatiñan jaqinakan säwi arunakap jupan amuyt'añapataki, parlatanakapa, uñtasïwi arunakapa, jamusitanakap amuyt'añapataki.
[7] Yatiñ kankañan qalltapax Tatitur axsartañawa; pisi amuyt'an jaqinakasti yatiñarusa, yatichäwirus jisk'achapxiwa.
[8] Wawaxay, awkiman yatichäwinakap ist'am, janikiy taykaman yatichäwinakap jisk'achamti.
[9] Uka yatichäwinakapasti p'iqimatakix mä suma pillur uñtatäniwa, kunkaman mä suma wallqar uñtatarakïniwa.
[10] Wawaxay, jucharar jaqinakatix pantjayañ munapxätam ukaxa, ¡jumax jan ist'amti!
[11] Inas sapxchïtam: “Jutam, nanakamp chik saraskam, munañasar mä sipit wakichañäni, uka chiq sarakipaskir aski jaqir jiwayañataki.
[12] Aski jaqinakar jakkirpach manq'antañäni, jiwax amay imäwir mantirinakar manq'antki ukhama.
[13] Kunayman qamir yänak jikxatañäni, ¡lunthatat yänakampiw utasar phuqhantañäni!
[14] Jutam, nanakampïxam, jikxatkañän ukanakxa taqiniw jaljasiñäni” sasa.
[15] ¡Ukampis, wawaxay, jupanakan ukarux jan saramti! Jupanakan jan wali sarnaqäwinakapat jithiqtam.
[16] Jupanakax jank'akiw ñanqha lurañ munapxi; ¡masinakaparus jank'akiw jiwayañ munapxaraki!
[17] Jamach'inakan uñjatax inamayaw sipitax uchatäski,
[18] uka jaqinakax jupanak pachpatakiw sipita wakichasipxi, jakañanakapxa jan walt'añanakaruw puriyapxi.
[19] Taqi kun muniri jaqinakan sarnaqäwipax ukham tukuyi: pachpa inampst'añ chuymapaw jiwayi.
[20] Yatiñ kankañax anqanakan arnaqasiski; thakhinakan arup ist'asiyaski;
[21] markar mantañ punkunakan arunakap yatiyaski; markan tantachasïwip chiqanakan akham saski:
[22] “Jan yatiñani, sawkasiri, pisi amuyt'an waynanaka, ¿kunapachkamarak pisi amuyt'añan sarnaqapxäta, sawkasiñanakaman kusisiñ jikxatasa, kunapachkamarak yatiñ kankañar jisk'achasipkakïtasti?
[23] Nayan iwxa arunakaxar ist'apxita, nayaw ajayuxamp phuqt'apxäma, amtäwinakax yatiyapxarakïma.
[24] Nayaw jumanakar jawsapxsma, ukampis jumanakax janiw ist'añ munapkistati.
[25] Jan ukasti, suma iwxa arunakaxarux janiw jaysapkistati, nayan chiqachäwinakax katuqañsa janiw munapktati.
[26] ¡Chijix puripkätam ukkhasti, nayax larusirakïwa! ¡Axsarañax katuntapkätam ukkhasti, nayax sawkasirakïwa
[27] axsarañanakampi, jan walt'añanakamp jumanakxar jutapkätam ukapacha, llakisiñanakasa, ayquñanakasa taqi kuns tukjir jach'a tutukjam jumanakatak jutkani ukapacha!
[28] “Uka urukiw jumanakax jawsapxitäta, ukampis nayax janiw ist'apkämati; thaqhapxitätawa, ukampis janiw jikxatapkitätati,
[29] jumanakan yatiñ kankañar jisk'achapxatamata, Tatitur jan axsarapxatamata.
[30] Jumanakax janiw suma iwxa arunakax katuqañ munapktati; chiqachäwi arunakaxarus jisk'achapxtawa.
[31] ¡Jan wali sarnaqatanakamat t'aqhisipxäta! Ñanqha amtatanakamampiw amjayasipxäta.
[32] Jan yatiñan jaqinakarux jan yatitanakapaw tukji, pisi amuyt'an jaqinakarusti jan amuyt'asitanakapaw aynacht'ayi;
[33] ukampis nayar ist'irixa, sumankañan jakasini, janiw kuna ñanqharus axsarkaniti.”