[1] Amtäwinak lurañax jaqinkiwa, ukampis Tatituw munañani uka amtäwin phuqhasiñapatakisa, jan phuqhasiñapatakisa.
[2] Jaqitakix taqi kun luratapas walikjamakiwa, ukampis Tatituw chuymanakap yati.
[3] Taqi luräwinakam Tatitun amparapar katuyam, amtäwinakamasti phuqhasiniwa.
[4] Tatitux mä amtäwimpiw taqi kuns luri; ñanqha jaqirusa t'aqhisiñ urutakiw irnuqi.
[5] Tatitux jach'a jach'a tukur jaqinakarux janiw uñjañ munkiti; jichhasa, akat qhiparusa mutuñap katuqapxapuniniwa.
[6] Munasiñampi, chiqa kankañampiw jucha luratarux pampachi; Tatitur axsaratap laykuw jaqix ñanqhat jithiqti.
[7] Jaqin sarnaqäwipax Tatitur kusisiyki ukapachax, uñisirinakapamppacharuw sumankayi.
[8] Chiqapa lurañampi juk'aki jikxatataxa, juk'amp askiwa, sallqjañampi waljanak jikxatañat sipana.
[9] Jaqix chuymapan sarnaqañapat lup'iski, ukampis Tatituw sarnaqäwip irpaski.
[10] Tatituw reyirux amtäwinakapan yanapi, jan pantjasis chiqapar taripañapataki.
[11] Tupuñanakampi, balanzanakampix Tatitunkiwa, chiqapar uñjañapataki; taqi tupuñanakasti jupan uchatawa.
[12] Reyinakax jan wali luräwinakarux uñisiwa, reyi qunuñan aski chiqa kankañar utt'ayatätap layku.
[13] Axsartañ chuymampi, qhana arumpi parlir jaqirux, reyinakax munasipxiwa, kusisiñampiw uñjapxaraki.
[14] Reyin q'apisitapax jiwañ apani, yatiñ kankañan jaqix uka q'apisiñap sumaptayiwa.
[15] Reyin kusisitapax suma jakañ utjayi; suma kankañapasti jallumpi phuqhantat qinayar uñtatawa.
[16] Qurit sipansa yatiñ kankañ jikxatañaw juk'amp askixa; qullqit sipansa amuyt'a kankañanïñaw askixa.
[17] Aski jaqinakan saräwipax jan walinakat jithiqtañawa; sarnaqäwip imiristi, jupa pachpaw jakañap imasiski.
[18] Jach'a jach'a tukuñanxa aynacht'añaw utji; p'iqi waytat sarnaqañansti tinkuñaw utjaraki.
[19] Jan yäqat jaqinakamp jisk'ar tukuñax juk'amp askiwa, jach'a jach'a tukur jaqinakamp qamirkipstañat sipana.
[20] Diosan arunakapar taqi chuymamp ist'irix, kusisiñ jikxatani; ¡Tatitur alkatir jaqix kusisiñaniwa!
[21] Yatiñ kankañampi amuyt'ir jaqix, ch'ikhi jaqit uñt'atawa; suma arumpi parlañasti sum amuyt'ayi.
[22] Suma amuyunïñax jakañ jikxatañawa; pisi amuyt'an jaqir yatichañasti luqhi kankañawa.
[23] Yatiñ chuymamp amuyt'irix, yatiñampiw parli; arunakapasti sum amuyt'ayi.
[24] Muxsa arunakax suma misk'jamawa, jaqin chuymap muxsachi, janchirux ch'amañcharakiwa.
[25] Sarnaqäwix jaqin amuyupat walikjamakiwa, ukampis tukuyapax jiwañar puriyiriwa.
[26] Irnaqir jaqin manq'a munatapaw irnaqañar jariyi; manq'at awtjayasiñaw irnaqañar nukt'i.
[27] Ñanqha lurir jaqix jan wali lurañanakak lup'iski; ¡arunakapas nina lawrar uñtatawa!
[28] Jan ist'asir saxra jaqix ch'axwañanak sartayi; arunak apnaqir jaqisti uñisisiñ utjayi.
[29] Ñanqha lurir jaqix masiparuw sallqanti; jan wali thakhiruw saranukuyaraki.
[30] Ñanqha lurañ amtir jaqix, nayrapampiw ch'irmt'i; jan walinak lurasasti, laka ispillupsa achurasiwa.
[31] Janq'u ñik'utanïxañax suma pillur uñtatawa, ukasti axsartañ chuymamp sarnaqatata jikxatatawa.
[32] Llamp'u chuymanïñaw juk'amp askixa, jan axsarir ch'amani jaqïñat sipana; jiwas pachpa apnaqasiñaw juk'amp askixa, markanaka apnaqañat sipana.
[33] Amtäwinak lurañax jaqinkiwa, ukampis Tatituw munañani uka amtäwinakan phuqhasiñapatakisa, jan phuqhasiñapatakisa.