[1] Pä mara qhipatsti, mä urux, faraonax mä samka samkasïna, samkapansti jupax Nilo jawira thiyan sayt'atäskänwa,
[2] uka jawiratsti paqallqu suma lik'i vacanakaw mistusinkäna, ukatsti jawir thiyan utjir chhuxllanak manq'asipkarakïna.
[3] Uka qhipatsti paqallqu phiru t'ukha vacanakaw jawirat mistunirakïna, ukatsti jawir thiyan sayt'asipxäna, uka nayraqat mistunir vacanak jak'aru.
[4] Ukatsti, uka paqallqu phiru t'ukha vacanakax, paqallqu suma lik'i vacanakaruw manq'antäna. Ukhamaruw faraonax ikit sartäna.
[5] Ukampis wasitat ikjxasinxa, yaqha samka samkasirakïna: Ukansti, mä sapa trigo alitxa paqallqu suma achuni trigo puyanak jilsuskir uñjäna.
[6] Uka qhipatsti paqallqu ch'usu trigo puyanakarakiw jilsunïna, inti jalsu tuqit jutir thayan aynacht'ayata.
[7] Ukat uka paqallqu ch'usu trigo puyanakax, uka paqallqu suma trigo puyanakaruw manq'antäna. Ukhamaruw faraonax ikit sartasïna, ukatsti mä samkakïtap amuyäna.
[8] Ukampis qhipärmanthix wali llakt'ataw reyix sartasïna, ukatsti Egipto markankir yatirinakaru, yatiñani jaqinakaruw irptayanïna. Ukatsti faraonax uka samkanakap jupanakar yatiyasïna, ukampis janiw maynisa uka samkanak qhanañchirjamäpkänti.
[9] Ukatsti akatjamat vino luqtirinakan jilïripax Joseat amtasisin reyir säna: —Jan wal lurataxat jichhakiw amtasta.
[10] Mä kutix juma reyix, nayampitaki, t'ant'a luririnakan jilïripampitakiw phiñasiyätaxa, ukatsti carcelaruw nanak panir apayapxarakista, uñjirinakan jilïrip thiyaru.
[11] Mä arumasti, panpachaniw samkasipxäyäta.
[12] Uka carcelansti mä hebreo waynaw nanakamp chikäna, jupasti uñjirinakan jilïr yanapiripänwa; nanakasti samkanakax jupar yatiyapxta, ukat jupax sum qhanañchapxitu.
[13] ¡Taqi kunas kunjämtix jupax sapkitäna, ukhamarupuniw phuqhasiraki! Nayax wasitat irnaqäwixar kuttanxta, maynisti jaychkatataw uñjasiraki —sasa.
[14] Ukat faraonax Josear jawsayanïna, ukatsti jank'akiw carcelat irpsunipxäna. Joseasti ñik'utap mururasïna, yaqha isimpiw uchasirakïna, ukat faraón reyin nayraqatapar uñstäna.
[15] Faraonasti Josearux akham säna: —Mä samka samkasta, uksti janirakiw khitis qhanañchirjamäkiti, ukampis yattwa, jumax mä samka ist'asax qhanañchirïtama —sasa.
[16] Joseasti ukxaruw säna: —Janiw nayat uk qhanañchkäxa; jan ukasti, Diosaw jumarux askimatak qhanañchätam —sasa.
[17] Faraonasti Josearux sänwa: —Samkaxansti, nayax Nilo jawira thiyan sayt'atäskayätwa,
[18] ukatsti paqallqu suma lik'i vacanakaw jawirat mistunïna, ukanakasti jawir thiyan utjir chhuxllanak manq'asipkäna.
[19] Uka qhipatsti paqallqu phiru t'ukha vacanakaw mistunirakïna. ¡Janipuniw kunapachas nayax taqi Egipto markan ukham phiru vacanak uñjirïkti!
[20] Uka phiru, t'ukha vacanakasti uka paqallqu suma lik'i vacanakaruw manq'antäna;
[21] ukham uka lik'i vacanakar manq'antkasasa, uka vacanakax t'ukhakïsipkänwa, janirakiw khitinsa amuyañjamäkänti. “Ukat ikit p'arxtta,
[22] uka qhipatsti yaqha samkampi samkasirakta, ukansti mä sapa trigo alitxa paqallq suma trigo puyanak jilsuskir uñjarakta.
[23] Ukanak qhipatsti paqallqu ch'usu puyanakaw jilsunirakïna, inti jalsu tuqi thayan wañsuyata.
[24] Uka paqallqu ch'usu puyasti, paqallqu suma puyanakaruw manq'antäna. Nayasti aka samkanakxa yatir jaqinakaruw yatiyasta, ukampis janiw maynis qhanañchirjamäpkiti” —sasa.
[25] Ukat Joseax faraonar sarakïna: —Uka pä samka juma, reyix samkaskatäta ukax mä sapa samkakiwa. Diosaw jumarux uka samka tuqi yatiyasktam kuntix jupax lurkani uka.
[26] Uka paqallqu suma vacanakampi, uka paqallqu suma trigo puyanakampix, paqallqu marawa, mä pachpa samkakiwa.
[27] Uka paqallqu phiru t'ukha vacanakasa, inti jalsu tuqi thayamp wañsuyata paqallqu ch'usu trigo puyanakasa, paqallqu mararakiwa. Ukasti paqallqu mach'a maranakäniwa.
[28] Kunjämtix nayax sisksma ukhamapunïniwa. Diosaw jumarux yatiyasktam kuntix jupax lurkani uka.
[29] Paqallqu suma maranakaw Egipto markan utjani,
[30] ukxarusti paqallqu mach'a maranakaw jutarakini. Janiw khitis paqallqu suma maranakan utjatapxa amtaskxaniti, mach'ax Egipto markar q'al aynacht'ayani.
[31] Uka mach'asti sinti jach'äniwa, Egipto markan paqallqu suma maranak utjatapatxa, janiw kuna uñjañas utjkaniti.
[32] Juma, reyix pä kutiw uka pachpa samka samkastaxa, Tatitux ukham lurañ amtatapuniwa, uksti jank'akirakiw lurani.
[33] “Ukhamasti, wakisispaw juma, reyin mä suma amuyt'ani ch'ikhi jaqi thaqhañama, jupan taqi markpach apnaqañapataki.
[34] Jichhax jumax rey, akham luram: Marka apnaqirinak utt'ayam, jupanakax taqpach markanakar sarapxpan, ukatsti uka paqallqu suma maranakanxa, Egipto uraqin achuri taqi juyranakat chikatan chikatapäki uk apthapipxpan.
[35] Uka suma maranakansti trigo apthapitanakatxa sumpun imapxpan; ukhamarak markanakansa imapxpan, jaqinakar manq'ayañataki.
[36] Ukhamat uka trigox taqi markpachatak imatäskani, jaqix uka paqallqu mach'a maranakan manq'atjam jan jiwaraskañapataki, kuna mach'a maranakatix Egiptor jutkani ukapacha —sasa.
[37] Josean amuyt'atapasti faraonatakisa, jilïr jaqinakapatakisa walikjamakïnwa,
[38] ukat faraonax jupanakarux säna: —Janiw kawkhansa aka jaqjama Diosan ajayupani jikxatkañäniti —sasa.
[39] Josearusti sarakïnwa: —Janiw jumjam ch'ikhi, yatiñani jaqix utjkiti, Diosarakiw jumarux taqi akanak yatiytam.
[40] Jumaw jichhax jach'a utaxa apnaqäta, markaxankir jaqinakasti taqiniw jumar jaysapxarakïtam. Reyïtax laykux nayakiw jumat sipan jilïrïyä.
[41] Nayasti jichhax taqi aka Egipto markpachan apnaqiripat utt'aysma —sasa. Uk sasinsti,
[42] faraonax amparapat surtijap apsusïna, uka surtijasti reyin sutipanïnwa, uksti Josean amparaparuw uchäna. Ukxarusti suma lino isinakampi isthapiyapxañapatakiw arsüna, ukhamarak mä quri wallqampi kunkapar ajuntayapxañapataki.
[43] Ukxarusti mä suma carroruw irpxatäna, ukasti reyin qhipap sarirïki uka jilïritakïnwa, ukatsti Josean nayräxapan art'apxäna: “¡Thakhit sartapxam!” sasa. Faraonax ukham Josear utt'ayäna taqpach Egipto marka apnaqañapataki.
[44] Ukxarusti faraonax Josear saskakïnwa: —Nayax Egipto markan reyipäkta ukasa, janiw khitis aka markan, juman jan satax kunsa lurkaniti, kawksa sarkarakiniti —sasa.
[45] Faraonasti Josearux egipcio sutimpiw sutichxäna, Safenat-panéah sasa, ukatsti Potifera jaqin Asenat phuchhapampiw jaqichxäna, Potiferasti On markan sacerdotepänwa. Ukhamaw Joseax Egipto marka apnaqirit utt'ayat uñjasïna.
[46] Joseasti kimsa tunka maranïnwa, kunapachatix Egiptonkir faraón reyin nayraqataparu irpapkän ukkhaxa. Joseasti faraonan ukat mistuwayxasaxa, taqi Egipto uraqpach sarañ qalltäna.
[47] Uka uraqinsti paqallqu suma maranakanxa, walpun juyrax achuntäna,
[48] Joseasti uka paqallqu suma maranakanxa, markan achkatayna taqi uka trigo apthapiyäna; uksti markanakan imayäna, sapa markar jaytasaraki kuna trigotix jak'a uraqinakat apthapiykäna ukanaka.
[49] Joseax waljpun trigo apthapiyäna, quta iranan utjir ch'alljama, trigon sinti achuntatapatsti, jan tupt'asakiw trigo imayxäna.
[50] Uka mach'a maranak janïra purinkipansti, Joseampi Asenat warmipampix pä wawanïpxänwa.
[51] Joseasti jilïr wawaparux Manasés sutimpiw uchäna, jupasti sarakïnwa: “Diosaw taqi t'aqhisitanakax armasiyxitu, ukhamarak awkixan wila masinakapatsa” sasa.
[52] Ukxankir wawaparusti Efraín sutimpiw ucharakïna, jupasti sarakïnwa: “Diosaw nayarux wawanak apayanitu, t'aqhiskta uka markana” sasa.
[53] Uka paqallqu suma maranakasti Egipto markanxa tukusxänwa,
[54] ukatsti paqallqu mach'a maranakaw sartarakïna, kunjämtix Joseax siskatayna ukhama. Taqi markanakan manq'at t'aqhisiñax utjäna, Egipto markanak jan utjkänti, uka markansti manq'añax utjaskänwa.
[55] Egipto markan manq'ax pist'käna ukkhasti, jaqinakax faraonat trigo mayisiriw sarapxäna. Ukat faraonax taqi egipcio jaqinakar säna: “Josean ukar sarapxam, kuntix jupax sapkätam uk lurapxarakim” sasa.
[56] Kunapachatix manq'at t'aqhisiñax taqi markpachan utjxäna ukkhasti, Joseax imaykäna uka trigo pirwanak jist'arayäna, ukat egipcio jaqinakar aljarakïna, manq'at awtjayasiñasti juk'amp ch'amampiw sartäna.
[57] Taqi markanakatsti Egiptorkamaw Joseat trigo alasiri jutapxäna, uka markanakan manq'añax jan utjatap layku.