[1] Abrahamasti qhipa warminïnwa, uka warmisti Queturá satänwa.
[2] Uka qhipa warmipan wawanakapasti: Zimrán, Jocsán, Medán, Madián, Isbac, Súah sutininakänwa.
[3] Jocsán chachasti Sebá, Dedán chachanakan awkipänwa. Dedán chachat saraqir wawanakapasti asureo, letuseo, leumeo uka jaqinakänwa.
[4] Madián chachan wawanakapasti Efá, Éfer, Hanoc, Abidá, Eldaá. Taqi jupanakaw Queturá warmin wawanakapäna.
[5] Abrahamax jakaskipan yänakap Isaac wawapar jaytxäna.
[6] Qhipa warminakapan wawanakaparusti, Abrahamax waxt'äwinak churäna, jakkasinsti uka wawanakxa Isaac wawapat yaqhachänwa, inti jalsu tuqinakar khithanukusa.
[7] Abrahamasti pataka paqallq tunka phisqani maraw jakäna,
[8] ukatsti sinti chuymanïxän ukkhaw jupax jiwxarakïna. Ukhamaw nayra awkinakapamp chikachasxäna.
[9] Isaac, Ismael wawanakapaw awkipar Macpelá sat putur imt'xapxäna, Mamré sat ch'umi jak'ana, Sóhar hitita jaqin Efrón yuqapan uraqipana.
[10] Uka uraqsti Abrahamaw hitita jaqinakat alatayna. Uka chiqarurakiw Abrahamar imt'xapxäna, Sara warmip thiyaru.
[11] Abrahaman jiwxatapatxa, Tatit Diosax Isaacar aski waxt'äwinakap churarakïna, jupasti “Uñjkitu, jakkaraki” sat uma phuch'u jak'aru jakiriw qhiparxatayna.
[12] Ismaelan wawanakapax akanakawa, jupasti Abrahamampina, Agar warmimpin wawapänwa, khititix Sara warmin egipcia uywatapäkän uka warmin yuqapa.
[13] Ismaelan wawanakapasti yuritatkamax akanakänwa: Nebaiot sutinix jilïr yuqapänwa; ukxarusti Quedar, Adbeel, Mibsam,
[14] Mismá, Dumá, Masá,
[15] Hadar, Temá, Jetur, Nafís, Quedmá ukanaka.
[16] Ismaelan tunka payani yuqanakapan sutinakapax ukanakawa, uka pachpa sutinakampirakiw uraqinakapsa, chhujllanakapsa uñt'asïna. Jupanakasti sapa mayniw jaqinakapan jilïriparakïna.
[17] Ismaelasti pataka kimsa tunka paqallquni maranïnwa kunapachatix jiwxän ukkhaxa, juparusti nayra awkinakap thiyaruw imt'xapxäna.
[18] Saraqir wawanakapasti Havilá sat uraqita, Sur sata uraq taypin jakapxäna, Egipto qurpa uñkatasina, Asiria tuqir sarañ uraqina. Ukawjan jupanakax utjantasipxäna, jilanakapax jan munapkchïna ukasa.
[19] Isaacan sarnaqäwipax akawa, jupasti Abrahaman yuqapänwa.
[20] Isaac chachasti pusi tunka maranïnwa, kunapachatix Rebecampi jaqichaskän ukkhaxa, Rebecasti Betuel chachan phuchhapänwa, Labán chachan kullakaparakïnwa. Padán-aram chiqan jakir arameo jaqinaka.
[21] Rebecasti janiw wawanïrjamäkänti, ukat Isaacax Tatitur jupataki mayïna. Diosasti Isaacan mayisitap ist'äna, ukatsti Rebecax usur jaqiptänwa.
[22] Jupasti ispa wawanïñ amuyasïna, purak manqhan wawanakan nuwasipxatapata. Ukat jupax lup'irakïna: “Akatix ukhamäskanixa, ¿kunatakirak jakästi?” sasa. Ukatsti Tatituruw jiskt'asïna,
[23] Tatitusti sarakïnwa: “Purakaman pä markaw ukankaski. Janïra yurkasin jupanak pura ch'axwir pä marka. Jupanakat maynïrix maynit sipansa jila ch'amanïniwa, jilïriw sullkarux jaysani” sasa.
[24] Rebecan wawachasiñap urusti purinxänwa, ukatsti jupax ispa wawanak wawachasïna.
[25] Nayraqat yurkän uka wawasti wila ñik'utanïnwa, janchipasti wali t'arwararänwa, Esaú sutimpiw uchapxäna.
[26] Ukxarusti jilapaw yurirakïna, Esaú jilapan kayu wintupat katt'ata, ukat uka wawarux Jacob suti uchapxarakïna. Isaacax suxta tunka maranïnwa kunapachatix Rebeca warmipax ispa wawanak wawachaskäna ukkhaxa.
[27] Wawanakax jiltxänwa. Esausti pampan sarnaqir jaqïnwa, animalanak jiwayañsti sum yatirakïna; ukampisa Jacobux llamp'u chuyman jaqïnwa, jupax chhujllan qamasiskirïna.
[28] Isaac chachasti Esaú wawaparuw juk'amp munasïna, pampat katunkatayna uka aychanak manq'añax jupatak sumätap layku; ukampis Rebecax Jacob yuqaparuw munasirakïna.
[29] Mä urusti, Jacobux manq'a phayaskäna, ukapachaw Esaú jilapax wali qarjat pampat purinïna,
[30] ukat jilapar säna: —Uka suma wilalu manq'amay waxt'ita, manq'at sintipun awtjitu —sasa. (Ukat Esaurux Edom sutimpi uñt'ataraki).
[31] Jacobusti sarakïnwa: —Jilïri kankañam nayraqat churxita —sasa.
[32] Esausti ukxaruw säna: —Manq'atjamaw jiwaskta, ¿kuna askirak nayatak jilïr yuqa kankañaxasti? —sasa.
[33] Jacobusti saskakïnwa: —Ukhamax jichhpachay juramento lurarapita —sasa. Esausti juramento lurarapïna, ukhamat Jacoburux jilïr yuqa kankañap churxäna.
[34] Ukatsti Jacobux t'ant'ampi, lenteja wayk'animpi Esaú jilapar churäna. Esausti manq'aña, umañ tukuyxasinsti, sartasisin sarawayxäna; jilïr yuqa kankañax janiw jupatakix kunäkänsa.