[1] Mä qawqha maranak qhipatsti, Diosax Abrahaman iyawsañap yant'äna, ukat sarakïna: —¡Abraham! —sasa. —Akankasktwa —sasaw Abrahamax säna.
[2] Tatitusti sarakïnwa: —Isaac sapa yuqall wawamar irpxarum, sinti munat wawamaru, ukatsti Moria uraqir saram. Uka chiqar purisinsti, kawkïri qulltix nayax uñacht'aykäma uka qullun nayar wawam mä nakt'ayat wilañcha luqtäta —sasa.
[3] Qhipärmanthi willjtasti, Abrahamax sartasisin phäña lawa ch'iyjäna, nakt'ayat wilañchataki. Ukatsti asnopa karunt'asin kawkharutix Diosax siskatayna uka chiqaruw saräna. Isaac wawapampi, pani uywatapamp chika.
[4] Kimsa uru saratatsti, Abrahamax jayatpach puriñapäkän uka chiqa uñjäna.
[5] Ukat uywatanakaparux säna: —Jumanakax akkhar asnomp chika qhiparapxam. Wawaxampi nayampisti sarasipkakïwa, Tatit Diosaruw yupaychanipxä, uka qhipat kuttanxapxarakï —sasa.
[6] Abrahamasti phäña aptasin Isaac wawaparuw q'ipxaruyäna; jupasti cuchillompi, ninampi apxarurakïna, ukatsti panpachaniw sarawayapxäna.
[7] Ukampis Isaacax Abrahamar sänwa: —Tatay, lawasa, ninasa utjistuwa, wilañcha luqtañatakisti ¿kawkinkarak ovejasti? —sasa.
[8] Awkipasti sarakïnwa: —Wawa, Diosaw wilañchatakix mä oveja uskuskani —sasa. Jupanakasti panpachan sarasipkakïnwa.
[9] Kawkharutix Diosax uñacht'aykatayna uka chiqar purisinsti, Abrahamax mä altar luräna, ukxaruw phäña lawanak sum wakicht'arakïna; ukatsti Isaac wawapar ñach'antasaw phäñan wakicht'at altar patxar wayxatäna;
[10] ukampis kunapachatix wawapar kharinukuñatak cuchillo aytkäna ukkhaxa,
[11] Tatitun angelapaw alaxpachat art'anïna: —¡Abraham! ¡Abraham! —sasa. Jupasti sänwa: —Akankasktwa —sasa.
[12] Tatitun angelapasti sarakïnwa: —Jan kuna ñanqhsa wawar luramti, Diosar axsaratam yatxtwa, janirakiw “Janiw” sisktati, sapa wawamar nayar luqtaniña —sasa.
[13] Abrahamasti uñatatasisinxa, mä urqu oveja uñjäna alinak taypin waxranakat achuntatäskiri; ukat uka oveja aptir sartawayäna, ukatsti uka oveja Tatitur nakt'at wilañcha wawap lanti luqtäna.
[14] Uka chiqarusti Abrahamax akham sutichäna: “Tatitux kunatix wakiski ukxa churasiriwa” sasa. Ukat jichhakamaw ukawjax sutichatäski: “Tatitux qullupan kunatix wakiski ukxa churasiriwa” sasa.
[15] Tatitun angelapasti wasitat alaxpachatpach Abrahamar art'anïna,
[16] ukatsti sarakïnwa: —Tatitux akham siwa: “Jichhax ukham luratamata, mä sapa wawam nayar luqtañsa, jan ‘Janiw’ satamatxa, naya kipkaw juramentomp arsta,
[17] jumar aski waxt'äwinak churañataki. Wawanakamarusti alaxpacha warawaranakjam waljanirupuniw tukuyä, quta thiyan utjir ch'allar uñtata. Ukhamarus jupanakax uñisirinakaparux atipjapxapuniniwa,
[18] aka uraqinkir taqi markanakarakiw jupanak tuqi aski waxt'äwinak katuqani, nayar ist'atamata” —sasa.
[19] Uka qhipatsti, Abrahamax kawkharutix uywatanakapax qhiparkatayna ukkharuw kuttxäna. Ukatsti taqpachaniw Beerseba chiqar sarxapxäna, kawkhantix Abrahamax jakkäna ukaru.
[20] Mä qawqha pachatsti, Abrahamaruw yatiyapxäna, Nahor jilapan Milcá warmipan kimsaqallqu wawanïtapa.
[21] Jilïri wawapax Us sutini, jupan jilapasti Buz sata, ukxarusti Quemuel sataraki, Aram chachan awkipäki uka.
[22] Ukxarusti Quésed, Hazó, Pildás, Idlaf, Betuel jupanakaw yuripxarakïna.
[23] Uka Betuel sat chachapï Rebecan awkipänxa. Milcá warmix uka kimsaqallqu wawanak Abrahaman jilapa Nahor chachapatak wawachasïna.
[24] Ukhamarus Nahor chachax Rumá sat uñt'atapampix wawanirakïnwa. Jupanakasti Teba, Gáham, Tahas, Maacá sutinakanïnwa.