[1] Kunapachatix Joseax Egiptor apatäkän ukkhaxa, Potifar egipcio jaqiw ismaelita jaqinakat alasïna, jupasti faraonan jach'a utapa uñjirinakan jilïripänwa.
[2] Ukampis Tatituw Joseampiskäna, uywiripan utapan jakañapkamasti taqi kunas Joseatakix walikïskänwa.
[3] Uywiripasti amuyarakïnwa Tatit Diosan Joseampïskatapa, ukat Joseatak taqi kunan walikïskatapa.
[4] Josearusti uka uywiripax sum uñjarakïna, ukatsti jupan yanapiripat utt'ayäna, ukhamarak kunatix utapan utjkäna ukanakxaru munañanïñ utt'ayäna, taqi kun jupar katuyarakïna.
[5] Kunürutix Potifarax Josear taqi yänakap apnaqañapatak utt'aykäna uka urusti, Tatitux Potifarar utapansa, yapunakapansa askinak waxt'äna.
[6] Ukat Potifarax jan kunatsa llakiskxänti, manq'añapatak llakisïna. Joseasti suma uñnaqt'an waynänwa, uñkatatas wali suma jaqirakïnwa,
[7] mä qawqha pachatsti, Potifaran warmipax Josearuw munapayäna, ukat mä urux jupar akham säna: —Jutam, nayampi ikiskañäni —sasa.
[8] Ukampis Joseax janiw munkänti, sarakïnwa: —Uywirixax taqi yänakap nayar katuyitu, nayan uka yänakap uñjaskataxatsti, jupax janiw kunatsa llakiskiti.
[9] Aka utan nayaw jilïritxa, uywirixasti janirakiw kunsa “Janiw” siskituti. Ukhamarus jumax warmipätawa. ¿Kunjämarak nayasti uywirixar uka jan wali luririststi, Dios nayraqatan juch lurarakiriststi? —sasa.
[10] Warmisti sapüruw Josearux jupamp ikiñatak parlxayirïna, ukampis Joseax janiw warmir ist'känti.
[11] Mä urusti, Joseax lurañanakap phuqhiriw utar mantaskäna. Warmisti khitis utan jan utjipan,
[12] Josear isipat waythapisin säna: —Nayamp ikiskañäni —sasa. Ukampis Joseax ukham luratax jalsunxänwa, isipsa warmin amparaparuw apt'anïna.
[13] Warmisti Josean isipa amparapan iqxäsis qhiparatapatxa,
[14] utankir uywatanakaruw jach'at jawsäna, sarakïnwa: —Akax uñjapxam, chachaxax mä hebreo jaqi akar irpasini, jichhasti jupax jiwasat sawkasiwa. Utaruw mantani, ukat nayampiw ikintañ muni, ukampis nayax wali jach'at warartatta;
[15] ukham jach'at wararir ist'asasti, jupax mäkiw jalsuwayxi, isipsa jaytanukuwayiwa —sasa.
[16] Ukatsti jupax Josean isipxa chachapan utar puriniñapkam imantäna.
[17] Chachapax purinkäna ukkhasti, pachparak chachapar yatiyäna akham sasa: —Irpanktas uka hebreo uywatax utaxar mantasin waynaqañ munitu,
[18] ukampisa wali jach'at warartatta, ukat jalsuwayxi, isipsa akkharuw apanukusiwayi.
[19] Ukham uywatamax nayar luritu —sasa. Josean uywiripasti warmipan ukham yatiyatapatxa walpun q'apisïna.
[20] Ukhamasti Josear katusin carcelaruw apantayäna, reyin katuntatanakapax ukankkäna ukkharu. Ukampisa carcelansa,
[21] Tatitux Josear yanapaskakïnwa, khuyapayasiñap uñacht'ayarakïna, cárcel uñjirimpis munayasïnwa,
[22] ukat cárcel uñjirix katuntatanakar uñjañapatakiw utt'ayäna. Joseaw ukanxa taqi kunsa lurayäna,
[23] cárcel uñjiristi janirakiw Josean luratanakap wasitat uñakipirïkänti, Tatituw jupampïskäna, taqi kunas walikiw Joseatakix misturapïna.