[1] Raquelasti Jacobutak jan wawanïrjam amuyasisinsti, Lía kullakapampiw uñkatasïna, ukat chachaparux sarakïna: —Janitix wawaniptaykitäta ukkhaxa, jiwañaruw purï —sasa.
[2] Jacobusti Raquel warmipatakix phiñasïnwa, ukat säna: —¿Nayasti Diosätti? Jupaxay wawa jan apaykstamtixa —sasa.
[3] Raquelasti ukxaruw sarakïna: —Bilhá uywataxamp mayachasim, wawanïxani ukkhasti, wawapax nayan wawaxäkaspas ukhamäniwa. Ukhamat wawanïyä —sasa.
[4] Ukhamwa Raquelax Bilhá uywatap Jacobun warmipäñapatak churäna. Jacobusti Bilhá warmimpiw mayachasïna,
[5] jupasti Jacobutakix mä wawa wawachasïna.
[6] Ukat Raquelax säna: “Aka wawax Dan satäniwa, Tatit Diosan mayisitaxar ist'atapata, nayar mä wawa apayanisax chiqapar uñjatapata” sasa.
[7] Uka qhipatsti Bilhá warmix yaqha wawampi Jacobutakix wawachasirakïna,
[8] Raquelasti ukat säna: “Aka wawax Neftalí satäniwa, kullakaxampi ch'ama chikataxata, jupar atipjataxata” sasa.
[9] Lía warmisti jan wawachasxatap uñjasinsti, Zilpá uywatap Jacob chachaparux warmipäñapatak irpxaruyäna.
[10] Kunapachatix Zilpax Jacobutaki mä wawa wawachasïna ukkhasti,
[11] Lía warmix sänwa: “¡Kunja kusiskañas akaxa! Ukat aka wawax Gad sutinïni” sasa.
[12] Uka qhipatsti Zilpax mä wawampi Jacobutak wawachasïna,
[13] Liasti sänwa: “¡Kunja kusisiñasa! Jichhasti warminakax, kusisiñanïtawa sapxitaniwa. Ukat aka wawax Aser satäni” sasa.
[14] Mä urusti, trigo yawthapiña pachan, Rubenax pamparuw saraskäna, ukansti muxsa achunak jikxatäna, ukanaksti Lía taykapan ukaruw apäna. Kunapachatix Raquelax uka muxsa achunak uñjkän ukkhasti, Liaruw säna: —Wawamax apanirapktam uka muxsa achunakay waxt'ita —sasa.
[15] Ukampis Liax ukxaruw sarakïna: —Nayat chacha irpaqkasasa, jichhasti ¿wawaxax apankatayna uka muxsa achunakamppachti aparañ munistasti? —sasa. Raquelasti sarakïnwa: —Jumatix uka muxsa achunak churitätaxa, Jacobux jumampiw jichhärmax ikiskani —sasa.
[16] Jayp'urusti, kunapachatix Jacobux pampat kuttasinkän ukkhasti, Liax jupar katuqiriw mistüna, ukat säna: —Jichhärmax nayampiw ikïta, wawaxax churkitu uka muxsa achunakampiw alassma —sasa. Uka arumasti Jacobux Liampiw ikïna.
[17] Liasti Jacobutakix phisqïri yuqall wawa wawachasïna, Tatitux mayisitap ist'atap layku.
[18] Ukat Liax säna: “Aka wawax Isacar satäniwa, Tatituw nayarux ist'arakitu chachaxar uywatax churataxata” —sasa.
[19] Uka qhipatsti Liax wawanïskakïnwa, suxtïr wawa Jacobutakix wawachasïna,
[20] ukat sarakïna: “Tatit Diosaw nayarux mä suma waxt'äwi churitu, jichhasti chachaxax juk'amp munasitani, jupatakisti suxtani wawacharapta. Ukat aka wawax Zabulón satäni” sasa.
[21] Qhiparusti Liax mä imill wawa wawachasïna, juparusti Dina sasaw suticharakïna.
[22] Ukampisa Diosax Raquelat amtasitaynawa; mayisitapsa ist'ataynawa, ukat juparux wawanak apayarakïna.
[23] Kunapachatix nayrïr wawapax yurkän ukkhaxa, Raquelax sänwa: “Diosaw jan wawanïtaxat p'inqax apaqxitu,
[24] mayampsa wawanikïrista” sasa. Ukat wawaparux José sasa sutichäna.
[25] Raquelax José wawapar wawachaskän ukapachasti, Jacobux Labán awkch'iparuw säna: —Markaxar khitxita.
[26] Wawanakaxsa, warminakaxsa churxita, uka laykuw nayax jumatak irnaqarapsma, “sarxam” sita. Kunjämtix jumatak irnaqarapksma ukxa, askiw jumax yattaxa —sasa.
[27] Ukampis Labanax ukxaruw säna: —Janikiy saramti, akankaskakiñäni. Tatituw uñjayitu juma tuqi aski waxt'äwinak nayar churatapa.
[28] Qawqsa munta, uk churaskakïmawa —sasa.
[29] Ukat Jacobux sarakïna: —Jumax sum yattaxa kunjämtix jumatak irnaqarapksma, uywanakamsa uñjarapksma ukanakxa.
[30] Nayax janïr purinkäyät ukkhax uywanakamax juk'akïnwa, jichhasti waljäxiwa, nayax purinkta ukat aksarusti Tatitux aski waxt'äwipampiw phuqt'tam, ukampisa ¿kunapacharak nayasti utaxankirinakatak irnaqasxästi? —sasa.
[31] Labanasti saskakïnwa: —¿Irnaqatamat qawqsa muntasti? —sasa. Jacobux sarakïnwa: —Jan kunsa churkistati. Ovejanakam awatiskakïwa, jumatix siskäma ukar jaysitäta ukaxa:
[32] Jichhürux ovejanakam taypit uñart'ayita, ukatsti ch'iyar oveja qallunaka yaqhar laksü, ch'ixi cabritonak laksurakï. Ukasti qullqsa churkitasma ukhamäniwa.
[33] Ukatsti jumax jutañ munkäta ukkhasti, nayan chiqa chuymampi jumar uñjatax yatïta; tamaxantix jan ch'iyar ovejanaksa, jan ch'ixi cabritonaksa jikxatkäta ukaxa, lunthatpachïtuwa sätawa —sasa.
[34] Labanasti ukxaruw sarakïna: —Walikiwa, mayitamarux jaysämawa —sasa.
[35] Uka urpachaw Labanax ch'ixi chivonaka, ch'ixi cabranaka, taqi ch'iyar ovejanaksa laksüna, ukatsti wawanakaparuw uñjapxañapatak katuyäna.
[36] Ukatsti jupax uka tamampiw sarawayxäna, kawkhankkäntix Jacobux ukkhat mä kimsa uru sararu. Jacobusti ukchañkamax Labanan ovejanakapxa awatiskakïnwa.
[37] Jupasti álamo, almendro, castaño quqanakan ch'uxña layminakap khuchhuräna, ukatsti allqäñapatakiw sillq'iräna;
[38] ukatsti uka sillq'irat layminakxa oveja tamanak nayräxaruw uchäna, uma umarapxirïkän ukawjaru. Ukkhan urqu ovejanakax qachu ovejanakar katupxirïna, uka layminak nayräxan katusipxatapatsti qallunakapax ch'ixinaka, allqanaka ukhamaw yurïna.
[40] Ukhamasti Jacobux ukanakarux yaqhachänwa, ukatsti Labanan allqa, ch'iyar tamanakap nayraqataruw ananuqäna. Ukhamaw Jacobux Labanan tamapat jupan pachpa yaqha tamap yaqhachasxäna.
[41] Sapa kuti lik'i uywanakax qallunïñatak katusipkän ukkhaw Jacobux layminak uskurïna, uywanakax uma umapxirïkän ukawjaru, ukhamat katusipki ukapacha layminak uñtapxañapataki;
[42] ukampisa t'ukha uywanakak katusiñ munapkän ukkhasti, Jacobux janiw kuna layminaksa uskurïkänti. Ukhamat t'ukha uywanakax Labanatak qhiparäna, lik'inakäki ukanakasti Jacobutakirakïnwa.
[43] Ukhamat Jacobux qamiriptawayxäna, jupax walja ovejanakanïnwa, camellonakani, asnonakan kunänwa, uywatanakapas chachanakata, warminakat utjäna.