[1] Ukampis Jacobux Labanan yuqanakapan akham parlasipkatap yatirakïna: “Jacobux taqi kunatix awkisankkäna ukanak katuntasisaw qamiripti” sasa.
[2] Ukhamarus Jacobux amuyarakïnwa Labanan jupar jan nayrjama uñjatapa.
[3] Ukat Tatitux Jacobur säna: “Awkiman uraqipar kuttxam, kawkhankkitix wila masinakamax ukaru, nayaw jumampïskä” sasa.
[4] Jacobusti Raquelampiru, Liampiruw jawsayanïna, kawkha pampantix jupax ovejanakapampi jikxataskäna ukar jutapxañapataki,
[5] jupanakarusti akham säna: —Amuyasxtwa, awkimax janiw nayrjama nayar sum uñjkxituti; ukampis awkixan Diosapax nayampïskapuniwa.
[6] Jumanakax askiw yatipxta kunjämtix nayax awkimatak irnaqkta uka,
[7] jupax sapa kutiw sallqjitu, irnaqatat churañapäki uksa janiw phuqhat churkituti. Ukampisa Tatitux janiw jupampi kuna ñanqhsa luraykituti,
[8] jan ukasti, kunapachatix jupax siskäna: “Irnaqatamat ch'ixi uywanak churäma” sasaxa, qachu uywanakasti ch'ixikamaki wawachäna; ukxarusti sarakïnwa: “Irnaqatamat taqi allqa uywanak churäma” sasa, qachu uywanakasti ukapachax allqakamak wawacharakïna.
[9] Ukhamwa Diosax uywanakap jupat apaqxäna, nayar churxañataki —sasa.
[10] “Mä urusti, kunapachatix uywanakax katusiñampïsipkän ukapachaw nayax mä samka samkasïyäta, ukansti uñjarakïyätwa qachunakaru katupkän uka urqunakasti ch'ixinaka, allqanakänwa.
[11] Uka samkansti Diosan angelapaw nayarux sutixat jawsitu, nayasti saraktwa: “Akankasktwa” sasa.
[12] Ukat angelax sarakitu: “Wal uñch'ukim, kawkïr urqunakatix qachunakar katupki ukanakax allqanaka, ch'ixinaka ukhamkamakiwa, nayax sum amuyarakta kuntix Labanax lurktam ukxa.
[13] Nayasti Betel chiqan uñstksma uka Diosätwa, kawkhantix jumax mä qala sayt'aykta, ukatsti ukxar aceitempi warxatasin mä arsüwi arsurakista ukätwa. ¡Aka chiqat sarxam, yurïwi uraqimar kuttxam!” sasa.
[14] Ukat Raquelampi Liampix sapxäna: —Nanakanxa janiw kuna tuti katuqañas awkixan utapan utjkxapxituti.
[15] Ukhamarus janis nanakax wawapäpkirista ukham uñjapxitu. Kuna aljañ yänakäpkirista ukham aljasipxitu, ukhamarak kuna qullqtix jumax nanakampi jaqichasiñataki churkta uksa jupakiw katuntasxaraki.
[16] Chiqpachansa, kuna qamir yänaktix Tatitux awkixat apaqki ukasti, nanakampina, wawanakaxampinkiwa. Ukhamax kuntix Tatit Diosax sisktam ukham luraskakim —sasa.
[17] Jacobusti Canaán uraqir kuttxañatakiw wakichasxäna, kawkhantix Isaac awkipax jakkäna ukkharu. Wawanakapsa, warminakapsa camellonakaruw qunxatayäna, ukatsti taqi yänakap apthapisxäna, ukhamarak kuna uywanaktix Padán-aram uraqin irnaqatapat jikxatkatayna ukanak anxart'asisin sarxarxäna.
[19] Labanasti uka urux yaqha chiqaruw ovejanakapat t'awra yawir saräna, ukchañkamasti Raquelax tatapan diosanakap lunthatsuwayäna.
[20] Ukhamwa Jacobux Labán arameo jaqirux sallqjäna jan “sarxä” sasa.
[21] Taqi kunapatix utjkäna ukanak apasxasaw jaltxäna. Jank'akirakiw Éufrates jawira makhatäna, ukatsti Galaad qullu tuqinakaruw sarxäna.
[22] Kimsa uru qhipatsti, ukkhakiw Labanax Jacobun sarxatap yatïna.
[23] Ukatsti wila masinakapamp chikaw Jacobur arktir saräna, paqallqu uru sarasasti Galaad qullunakan jikxatäna.
[24] Ukampis uka arumaw Diosax Labán arameo jaqir samkan uñstäna, juparusti sarakïnwa: “Ist'ita, jan qhuru arunakampi Jacobur parlxayamti” sasa.
[25] Labanasti Jacoburux Galaad qullunakan jikxatäna, kawkharutix Jacobux utjnuqtkatayna uka chiqaru. Labanasti uka chiqarurakiw wila masinakapampix utjnuqtarakïna,
[26] Labanasti Jacoburux akham säna: —¿Kuns lurista? ¿Kunatsa sallqjista? ¡Phuchhanakaxarux nuwasïwin katurat jaqinakäkaspas ukham irpasintaxa!
[27] ¿Kunatsa sallqjista, jan kun nayar yatiyas jamasat jaltanta? Nayax sarxañam yatisax mä suma kusisiñ phunchhäwimpiw khithanxiriskasamäna.
[28] Jumasti janiw phuchhanakaxarusa, allchhinakaxarus jamp'att'aykistati. ¡Jan walpun lurtaxa!
[29] Nayax muniristxa, kunsa lurapxakirismawa; ukampisa, wasayp'uw awkiman Tatit Diosapax parlxayitu, sarakituwa: “Ist'ita, jan qhuru arunakampi Jacobur parlxayamti” sasa.
[30] Jumatix awkiman utapar kuttañpun munchïyäta, jichhax niyarak sarxta ukasti, ¿kunatarak diosanakax lunthatanistasti? —sasa.
[31] Ukat Jacobux Labanar säna: —Axsarañaxaw utjitäna. Sarakïyätwa: “Inas phuchhanakapxa ch'amampiki irparasxchitaspa” sasa.
[32] Ukampisa inas akan kawkïrisa diosanakam katuskchi, jupasti ¡jiwayatäpan! Nayan wila masinakaxax uñjasipkiwa, saskakita, kuncha jumankïr katutätxa, jichhax apasxam —sasa. Ukampis Jacobux janiw yatkänti Raquelan uka diosanak lunthatanitapxa.
[33] Labanasti Jacobun chhujllaparuw mantäna, ukxarusti Lian chhujllaparuw mantarakïna, ukatsti pani uywatan chhujllaparu, ukampis janiw idolonakap jikxatkänti. Lian chhujllapat mistusinsti Raquelan chhujllaparuw mantarakïna.
[34] Raquelasti idolonak katusinxa, camellor qunxatañ manqharuw imantäna, ukat ukxaruw qunxatarakïna. Labanasti chhujlla k'uchut k'uchu thaqhaskäna, ukampis janiw jikxatkänti.
[35] Ukat Raquelax awkipar säna: —Tatay, jan sartataxat janiw phiñasïtati, jichhürux phaxsi wilanïsktwa —sasa. Labanasti idolonakap k'uchut k'uchu thaqsüna, ukampis janiw jikxatkänti,
[36] Jacobusti ukham thaqhir uñjasax wal phiñasïna, Labanarusti akham sarakïna: —¿Kuna jan walsa lurtxa? ¿Kunas juchaxaxa, juman akham wali amtata nayar arktaniñamatakixa?
[37] Taqi kunaxa thaqsustaxa, ¿kunsa jumankirit jikxatastaxa? ¡Jichhax apnuqamay wila masinakam nayräxaru, wila masinakax nayräxarusa, ukhamat jupanakax sapxani khitis jiwas paninit chiqap parltan ukxa!
[38] Aka pä tunka maraw jumamp irnaqawayta, janiw kunapachas ovejanakamasa, cabritonakamasa sullurirïkiti, janipuniw kunapachas uywa tamamat mä urqu ovejamsa manqt'asiñatakix kharst'askti;
[39] janipuniw kuna uywamtix pampankir animalanakax manq'antapkän ukanak apanirïkti, jan ukasti nayaw uka uywanakat qullqi churirïsma, urus jan ukax arumas uywanakam lunthatapxirïkän ukatxa, jumax phuqhayasirïtawa.
[40] Urunakax lupin qhatintata, arumanakasti thayan thayjataw uñjasiyäta. ¡Ikis janiw purirïkxitänti!
[41] Pä tunka maraw utamankta, nayarux akanakaw wakt'itu: pä phuchham laykux tunka pusin maraw irnaqarapsma, uywanakam laykusti, suxta maraw irnaqarapsma, ukhamarus irnaqataxat churañamäki ukxa, sapa kutiw juk'ak churistaxa.
[42] Janitix Abrahaman Diosapaxa, Isaac awkixax yupaychkäna uka Tatitux nayampïkasapäna ukaxa, jumax jan kunani ukhampachaki khithanukutasamänxa. Ukampis Tatitux t'aqhisitaxsa, irnaqataxsa uñjiwa, ukat wasayp'ux jumar tuqinuqtamxa —sasa.
[43] Ukatsti Labanax Jacoburuw sarakïna: —Aka warminakax phuchhanakaxawa; wawanakasti allchhinakaxawa; ovejanakas ovejanakaxarakiwa; ¡taqi kuntix akan uñjktas ukax nayankiwa! Ukhamasti, ¿kunarak jichhasti lurirista phuchhanakaxarusa, allchhinakaxarusa?
[44] Jichhax jutamaya, jumampi nayampi mä arust'äwi lurañäni, ukasti jiwas panitakix mä qhanañchäwïniwa —sasa.
[45] Ukhamasti Jacobux mä qala ittasin mä pilarjam sayt'ayäna,
[46] ukatsti wila masinakaparuw sarakïna: —¡Qalanak apthapipxam! —sasa. Taqiniw qutucht'añatak qalanak apthapipxäna, ukatsti uka qalanak qutucht'at jak'an manq'apxäna.
[47] Labanasti uka chiqarux arameo arupan “Jegar Sadutá” sutimpiw uchäna, Jacobusti hebreo arunxa “Galaad” sutimpiw ucharakïna.
[48] Ukat Labanax säna: —Jichhüruwa, aka qalanak qutucht'ataxa jiwas paninitak qhanañchirit sayt'i —sasa. Ukat uka chiqax Galaad sataxa.
[49] Ukhamarus Mispá satarakiwa, Labanan akham satapata: —Tatituy jiwas paninirux uñjistpan kunapachatix jan jikiskxañäni ukapachaxa.
[50] Phuchhanakaxarutix jan wal uñjäta, jan ukax jupanakxaru yaqha warminakamp jaqichasïta, janis khitis jiwas paninitakix qhanañchirix utjkani, ukapachax Tatit kipkaw qhanañchaskani —sasa.
[51] Labanasti Jacoburux saskakïnwa: —Uñjam, aka qalanak qutucht'asa, ukhamarak kawkïr pilartix nayax jiwas taypin sayt'aykta ukasa,
[52] arust'äwi luratas amtañatakïniwa. Janiw jumas nayas kuna jan wali lurasiñatakis uka qurpat sarakipaskañäniti.
[53] Jichhasti Abraham achachilaman Diosapay uñjpan, Nahor achachilaxan Diosapas uñjarakpan —sasa. Ukhamasti Jacobux kawkïri Diosarutix Isaac awkipax yupaychkäna ukan sutipxaruw juramento luräna.
[54] Ukxarusti Jacobux qullu patan mä wilañcha luqtäna, wila masinakaparus manq'añatakiw jawsarakïna. Jupanakasti taqiniw manq'apxäna, uka arumax qullun qhantatipxarakïna.
[55] Qhipärmanthisti, Labanax willjtaw sartasïna, ukatsti allchhinakaparu, phuchhanakaparu jamp'att'asin aski waxt'äwinakap waxt'awayäna, ukat uraqipar kuttawayxarakïna.