[1] Tatitux Jacoburux sänwa: “Kunapachatix jumax Esaú jilamat jaltkäyäta ukkhaw nayax Betel chiqan uñstayäsma. Ukhamasti jichhax Betel markar jakasir kuttxam, ukan mä altar lurarapitäta” sasa.
[2] Ukat Jacobux wila masinakaparu, jupampi chika jakirinakarus säna: —Kuna yaqha diosanakatix jumanak taypin utjchi ukanak apanukupxam, ukatsti taq jariqasipxam, yaqha isinakampi uchasipxarakim.
[3] Jank'ak Betel uraqir sarxañäni, ukan nayax mä altar sayt'ayä, kawkïr Diosatix nayaru llakisiñaxan jikxataskasin yanapt'kitäna, ukhamarak kawkirutix sarkta ukan nayamp chikäskäna uka Diosar yupaychasa.
[4] Jupanakasti kuna yaqha diosanakapatix utjkäna ukanak Jacobur katuyxapxäna, jinchunakapar uchasipkän uka aretenaksa, Jacobusti ukanak encina sat quqa k'uchuruw allintxäna, Siquem jak'ana.
[5] Jupanakax sarxarxapxäna ukkhasti, Tatituw uka jak'ankir markanakarux axsarañ mantayäna, ukat jupanakax Jacobun wawanakapar jan arktapkänti.
[6] Jacobumpi, jupampi chika sarapkäna uka jaqinakampisti Luz sat markaruw puripxäna, mä sutipasti Betel satarakïnwa, uka markasti Canaán uraqin jikxatasi.
[7] Uka chiqan Jacobux mä altar sayt'ayäna, uka chiqarusti “Tatitun Utapa” sasaw sutichäna, kunapachatix jupax jilapat jaltkäna ukapacha, uka chiqan Tatitux jupar uñstatapata.
[8] Uka chiqanarak Rebecar uñjir Débora sat warmix jiwxäna, juparusti encina sat mä quqa k'uchuruw Betel jak'an imxapxäna. Jacobusti uka chiqarux “Jachañ quqa” sutimpiw uchäna.
[9] Kunapachatix Jacobux Padán-aram uraqit kuttasinkän ukkhasti, Tatitux wasitat juparux uñstäna, ukatsti
[10] akham sasaw aski waxt'äwi arunak arsüna: “Juman sutimax Jacob satawa; ukampis janiw jichhax ukham satäkxätati, jichhürut uksarux sutimax Israel satäniwa” sasa. Yaqha suti uchasinsti,
[11] Tatitux saskakïnwa: “Nayätwa taqi ch'aman Diosaxa; wawanakamasa, wawanakaman wawanakapas waljapunïpan. Jumat mä jach'a markax mistuni, walja markanakasa, wawanakam taypinsti reyinakaw utjani.
[12] Abrahamaru, Isaacaru churkta uka uraqsti jumaruw churaraksma, ukxarusti wawanakamaruw churarakï” sasa.
[13] Ukatsti Tatit Diosax Jacobumpi parlkatayna uka chiqat sarawayxänwa,
[14] Jacobusti uka chiqan qalat mä pilarar uñtat sayt'ayäna, kawkhantix Diosax jupar parlxaykatayna ukkharu, ukatsti aceitempi, vinompi warxatasaw Tatitur luqtxäna.
[15] Uka chiqarusti Jacobux Betel sutimpiw uchäna, uka sutisti “Tatitun utapa” sañ muni.
[16] Uka qhipatsti Jacobumpi, jaqinakapampix Betel chiqat sarxapxänwa. Jupanakasti Efrata chiqatxa jayankasipkänwa, ukapachaw Raquelax wawachasïna, jupasti wali t'aqhisisaw wawachasïna.
[17] Wali t'aqhisiskän ukkhaw usuyir warmix säna: “Jan axsaramti, yuqall wawamp wawachastaxa” sasa.
[18] Wawasti walikiw yurïna, ukampisa Raquelax jiwirjamäxänwa. Niya jiwañampïxasinsti wawarux Ben-oní sutimpiw uchäna, uka sutisti “t'aqhisiñaxan yurir wawa” sañ muni. Ukampis Jacobux Benjamín sutimpirakiw uchäna, uka sutisti “sinti munat wawa” sañ muni.
[19] Ukhamaw Raquelax jiwxäna, juparusti Efrata thakhin imt'xapxäna, ukasti jichhax Belén markäxiwa.
[20] Jacobusti amay imäwip patxarux qalanakat mä pirqa sayt'ayäna. Uka pirqasti jichha urunakkamaw Raquelan amayapax kawkharutix imt'atäki uka chiq uñacht'ayaski.
[21] Jacobusti saraskakïnwa, ukatsti Édar torret juk'ampi khuri chiqaruw utjnuqtäna.
[22] Uka chiqan Jacobux jakaskipanwa, Rubén yuqapax Bilhá sat warmimpi ikintatayna, uka warmisti Jacobun uñt'atapänwa. Jacobusti uk yatisin walpun q'apisïna. Jacobux tunka payan wawanakanïnwa.
[23] Liampi wawanïkäna ukanakasti: Rubén, jilïr yuqapa; Simeón, Leví, Judá, Isacar, Zabulón jupanakänwa.
[24] Raquelampi wawanïkäna ukanakasti: Joseampi, Benjaminampïnwa.
[25] Raquel warmin Bilhá uywatapamp wawanïkäna ukasti: Dan, Neftalí jupanakänwa.
[26] Ukxarusti Lía warmin Zilpá uywatapampi wawanïkäna ukax: Gad, Aser jupanakarakïnwa. Ukanakaw Jacobun wawanakapaxa, Padán-aram uraqin yuripkatayna ukanakaxa.
[27] Jacobusti Isaac awkipan utaparuw kuttxäna, awkipasti Hebrón markan jakasïna, kawkintix Abrahamax jakkäna ukaru.
[28] Isaacasti patak kimsaqallq tunka maranïnwa.
[29] Jupasti sinti chuymanïxasaw jiwxäna, juparusti Esaú, Jacob yuqanakapaw imt'xäna, nayra awkinakapan imäwip thiyaru.