[1] Ukhamasti Quiriat-jearim chiqan utjasir jaqinakaw jutasin Tatitun arcap apasxapxäna, Abinadab chachan utaparuw jaytapxarakïna, uka utasti mä qullu patan jikxatasïna; ukatsti uka arca uñjañapatakix Eleazar wawaparuw Tatitur luqtapxäna.
[2] Arcax pä tunk maraw Quiriat-jearim chiqankäna, ukatsti Israel markpacharakiw Tatiturux walpun thaqtapxäna.
[3] Ukat Samuelux israelitanakar säna: “Jumanakatix chiqpachapun Tatitur jaysañ munapxsta ukaxa, yaqhanakan diosanakapar yupaychañ apanukupxam, ukhamaraki Baal, Astarté ukanakan uñtasitanakaparusa, jiwasan mä sapa chiqpach Tatituruki yupaychapxam. Ukapachakiw jupax filisteonakan amparapat qhispiyapxätam” sasa.
[4] Israelitanakasti Baal, Astarté uka diosanakar yupaychañ apanukxapxänwa, ukatsti Tatitu saparukiw yupaychxapxäna.
[5] Ukatsti Samuelux sarakïnwa: “Israelitanakar Mispá chiqar tantacht'apxam, nayax Tatituruw jumanakatak mayï” sasa.
[6] Israelitanakasti Mispá chiqaruw tantacht'asipxäna, ukan uma apsusin Tatit nayraqatan mä waxt'äwïkaspas ukham wartapxäna. Uka urusti israelitanakax ayuno lurapxäna, Tatit nayraqatan jucha luratanakapsa qhan arsusipxäna. Samuelux Mispá chiqanwa israelitanakan irpiriparu tukurakïna.
[7] Filisteonakasti israelitanakan Mispá chiqan tantacht'atätap yatisinxa, filisteonakan jilïrinakapax jupanakar tukjiriw sarapxäna. Uk yatisasti israelitanakax axsarayasipxänwa,
[8] ukat Samuelur sapxäna: “Tatitu Diosat jiwasanakatak mayiskakim, filisteonakan amparapat jiwasanakar qhispiyañapataki” sasa.
[9] Samuelusti mä urqu ovej qallu katusin Tatituruw nakt'at wilañcha luqtäna; ukatsti Tatitut wal mayïna, Israel markat khuyapt'ayasiñapataki, Tatitusti mayitaparux ist'änwa.
[10] Kunapachatix Samuelux nakt'at wilañcha luqtaskäna ukkhasti, filisteonakax israelitanakar tukjañatakiw jak'achasinipxäna; ukapachaw Tatitux mä jach'a q'ixu q'ixu jupanakxar apayanïna, ukasti jupanakarux walpun mulljäna, ukhamat israelitanakax filisteonakar atipjapxäna.
[11] Israelitanakasti, Mispá chiqat jank'akiw filisteonakar arktañatak mistuwayapxäna, ukatsti Bet-car uka aynachkamaw arkantapxäna.
[12] Ukatsti Samuelux mä qal ittasin Mispá, Sen uka pä marka taypiruw uskt'äna, ukatsti Eben-ézer sasaw sutichäna, sarakïnwa: “Tatitux jichhakamaw yanapt'askistu” sasa.
[13] Filisteo jaqinakax atipjat uñjasisin janiw mayampsa israelitanakan uraqiparux mantantapkänti; Samuelun jakañapkamasti Tatitux filisteonakatakiw sayt'asïna.
[14] Kawkïri markanaktix filisteonakax israelitanakar aparapkatayna ukanakax, wasitat Israel markar kutkatayatäxäna, Ecrón chiqata, Gat chiqakama. Ukhamat israelitanakax uraqinakap filisteonakan amparapat kutsuyasxapxäna, ukatsti israelitanakampi amorreonakampix sumankañan jakasipxäna.
[15] Samuelux taqi jakäwipan Israel markan jilïripänwa,
[16] sapa mararakiw Betel, Guilgal, Mispá chiqanakar sarirïna, taqi uka chiqanakan israelitanakan ch'axwanakap uñjiri.
[17] Ukatsti Ramá chiqankki uka utaparuw kutt'anxirïna, ukawjatpach Israel markarux apnaqäna. Ukansti Tatitutakix mä altar lurarakïna.