[1] Davidax Gat chiqat sarxasinsti Adulam sat putur imantasiñatakiw jaltxäna. Ukatsti jilanakapampi, utapankir wila masinakapampix ukanak yatisax jupan ukaruw sarapxäna.
[2] Ukhamarakiw t'aqhisiyat jaqinakasa, manuninakasa, jan kunampis taqi chuymäpkän uka jaqinakas Davidampiw mayachasxapxäna. Davidasti jupanakan jilïriparakïnwa. Jupamp chika sarnaqir jaqinakasti niya pusi patak jaqinakjamänwa.
[3] Uka chiqatsti Davidax Moab tuqina Mispá siski ukkharuw sarxäna. Ukat Moab uraqin reyiparux sarakïna: —Awkixampiru, taykaxampirux jumanakampi qhiparañapatakiy katuqt'arapita, kuntix Diosax nayampi lurañ munki uk yatisiñaxkama —sasa.
[4] Ukhamaw Davidax awkiparu, taykaparux Moab reyin ukaru irpxäna. Jupanakasti uka reyimpiw jakapxarakïna, Davidax imantaskäna taqi uka urunakana.
[5] Ukatsti Gad profetax Davidarux akham amuyt'ayarakïna: —Jan uka imantasiñarux qhiparkamti, jan ukasti Judá uraqir sarxam —sasa. Ukhamat Davidax sarawayxäna, ukatsti Héret uka ch'umiruw purïna.
[6] Ukchañkamasti Saúl reyix Guibeá uka chiqankaskänwa, mä tamarisco quqa k'uchun qunt'ata, lanzapas ayt'ata, taqpach jilïrinakapampi muyuntataraki. Davidampiru, jaqinakapampiru jikxatapxatap yatisinsti,
[7] jilïrinakaparux sänwa: —Benjaminat jutir jaqinaka, ist'apxita: ¿Jesé jaqin yuqapasti uraqinaka, uvas yapunak jumanakar churapxiristamti? ¿Jumanakarusti ejerciton jilïrinakapat uskt'apxiristamti?
[8] Jumanakax taqiniw nayatak jan wali amtapxtaxa, janiw khitis wawaxampi Jesé jaqin yuqapampi mä amtäwi luratapat yatiykituti; janirakiw khitis nayat amtasipkistati; janiw khitis siskituti kuntix yuqaxax yanapirixar nayar jan wal lurañ amtayatapatxa, kunjämtix jichhax wakichasiski ukhama —sasa.
[9] Ukhamasti Doeg sat edomita jaqix, khititix Saúl reyin jilïrinakap taypin jikxataskän ukax reyirux sänwa: —Nayaw Davidarux Nob sata uraqiru Ahitub chachan Ahimélec sat yuqapamp jikisir saraskir uñjta.
[10] Ahimélec sacerdotesti Tatiturux Davidxat jiskt'äna, ukatsti juparux manq'añanaka, ukhamarak Goliat filisteon espadap churarakïna —sasa.
[11] Ukhamasti reyix Ahimélec sacerdoteru, Nob markankir taqpach sacerdotenakaru, jupanakan wila masinakapamppacharu jawsiriw khithäna. Kunapachatix reyin nayraqataparu taqini purinipkän ukkhasti,
[12] Saúl reyix Ahimélec sacerdoterux sänwa: —Ahitub jaqin yuqapa, sum ist'ita —sasa. Ahimélec sacerdotesti sarakïnwa: —Jach'a munañan reyi, nayax juma nayraqatanktwa —sasa.
[13] Saúl reyix jiskt'arakïnwa: —¿Kunatsa jumampi, Davidampix naya tuqi jan wal amtapxta? Jumasti t'ant'ampi, mä espadampi churatätaxa, Tatiturus Davidxat jiskt'arakitätaxa, ukhamat utaxar muyuntasin nayar katjañataki, kunjämtix jichhax lurki ukhama —sasa.
[14] Ukatsti Ahimélec sacerdotex reyirux sarakïnwa: —¿Khitirak juma jach'a munañan reyin jilïrinakam taypin Davidjam taqi chuymampi phuqhiristi? Jupaxa, juma jach'a munañan reyin tullqamawa, jach'a utam uñjirinakan jilïripawa, uka utansa aski jach'añchäwi katuqirirakiwa.
[15] ¿Jichhakit nayax Davidxat Diosar jiskt'astxa? ¡Janiwa! Uka layku, jumax jach'a munañan rey, janiy aka luqtirimarusa, wila masinakaxarus kuna ñanqhsa luramti, aka luqtirimax janiw kuns aka tuqit yatkiti —sasa.
[16] Ukampisa reyix saskakïnwa: —¡Ahimélec, yatim, jumasa, taqi wila masinakamas jiwarapxätawa! —sasa.
[17] Ukspachaw reyix jupan uñjiriparux sarakïna: —¡Tatitun sacerdotenakaparux jiwarayapxam! Jupanakasti Davidar jaqkattatäpxiwa. Davidan jaltaskatap yatkasinsa, janiw jupanakax nayarux yatiyapkituti —sasa. Ukampisa reyin uñjirinakapax janiw Tatitun sacerdotenakapatakix ampar aytañ munapkänti.
[18] Ukat reyix edomita Doeg sat jaqirux säna: —¡Jumapun jiwarayam! —sasa. Ukhamasti Doeg sat jaqix sacerdotenakar katuntasinxa, kimsaqallq tunka phisqaniruw jiwarayäna, jupanakasti linot lurat efod sat isimpi isthapitäpxänwa.
[19] Ukatsti Nob siski uka sacerdotenakan markaparuw mantäna. Ukansti espadampiw jiwarayäna chachanaka, warminaka, wawanaka, asu wawanaka. Ukhamarakiw vacanaka, asnonaka, ovejanaksa jiwarayäna.
[20] Ukampis Ahimélec sacerdoten wawanakapat Abiatar sutini yuqapaw kawkhankkäntix Davidax ukkhakam jaltxäna.
[21] Ukansti, Saúl reyin Tatitun sacerdotenakapar jiwarayatap yatiyarakïna.
[22] Davidasti sarakïnwa: —Nayax amuyayätwa khä uruxa, Doeg jaqix ukankkäna ukkha, Saúl reyir yatiyaniwa, sasa. Nayaw juman wila masinakaman jiwarañapatakix juchanïta.
[23] Ukampis nayampi chika qhiparam, janirak axsaramti, jumar jiwayañ munirix nayarus jiwayañ munarakitu. Ukampis nayampïsax janiw kunas kamachkätamti —sasa.