[1] Ukampis Davidax lup'iskakïnwa: “Jichhasa, jan ukax akat qhiparus Saúl reyix jiwayakipunitaniwa. Nayatakisti filisteonakan uraqipar jaltxañaxakiw walïspa, ukhamat Saúl reyix Israel uraqin jan arkanaqkitaniti, ukatsti walikiw jakasïxa” sasa.
[2] Ukhamaw Davidax suxta pataka jaqinakampi chikt'at saräna, Maoc chachan Aquís sat yuqapar luqtañataki, jupasti Gat uraqin reyipänwa.
[3] Davidampi jaqinakapampix Aquís jaqimpiw Gat chiqan jakasipxäna, sapaqat maynis wila masipamp kuna. Davidasti panpacha warminakap irpasxäna: Jezreelankiri Ahinóam warmimpi, Carmel chiqankir Abigail sata Nabalan ijma warmipäkän ukampi.
[4] Saúl reyisti Davidan Gat tuqir jaltxatap yatisinxa, janiw arknaqkxänti.
[5] Davidasti Aquís reyirux sarakïnwa: —Juma munañan reyitix nayaru yanapt'añ munchistaxa, achikt'assmawa, aka uraqiman kawkïr markan jakasiñaxatakisay churita, ukampis janiw walïkaspati luqtirimax juma munañan reyimpi chika jach'a markan jakañapaxa —sasa.
[6] Uka urpachaw Aquís reyix Siclag marka churäna. Ukat jichhürkamax Siclag markax Judá uraqinkaski.
[7] Davidasti filisteonakan uraqipan mä mara pusi phaxsiniw jakäna.
[8] Davidampi jaqinakapampisti, Guesur, Guézer, Amalec uka markanakan jakirinakar lunthatjiriw sarapxäna. Telaím siski ukkhat qalltasina, Sur sat wasar tuqir sarañana, Egipto markakama.
[9] Uksa tuqinkiri jaqinakar katuntasinsti, chachäpasa, warmïpasa taqiniruw jiwarayäna. Ukhamarusa ovejanaka, vacanaka, asnonaka, camellonaka, isinakamppach apasipxäna. Ukatsti kawkhankkäntix Aquís reyix ukaruw kutt'anxarakirïna.
[10] Ukat Aquís reyix jiskt'irïna: Jichhürux “¿kawkïr markan yänakapsa lunthatjantaxa?” sasa. Davidasti sarakirïnwa: “Judá uraqit aynachankki uka markata”, jan ukax, “Jerahmeelat aynachankir markata”, ukhamarak “quenitanakan uraqipat aynachankir markata” sasa.
[11] Davidax chacharusa, warmirusa taqiniruw jiwarayäna, ukhamat Gat chiqar sarasin taqi kuntix lurki ukanak jan yatiyapxañapataki. Filisteonakan uraqipan jakkäna uka urunakasti ukhampun lurirïna.
[12] Aquís reyisti Davidarux suma jaqit uñt'äna, chuymapansti sarakïnwa: “Davidax israelitanakar uñisxiwa, jichhakuchaw nayan luqtirixäni” sasa.