[1] Samuelusti Elí sacerdoten arsutanakap phuqhasaw Tatiturux luqtaskakïna. Uka urunakansti Tatitux janiw kuna arunaksa aliqaki khitirus yatiyirïkänti, janirakiw khitis aliqaki kuna unañchäwinaksa uñjirïkänti.
[2] Mä urusti Elí sacerdotex niyapuniw juykhuptaskäna, janiw sum uñjkxänti, ukhamäsin jupax utapan ikiskäna.
[3] Samuelusti Tatitun utapan ikiskarakïna, kawkhantix Diosan arcapax uchatäki ukkhana, lamparasti qhanaskakïnwa.
[4] Ukapachaw Tatitux jupar jawsäna: —¡Samuel! —sasa. Samuelusti sarakïnwa: —¡Akankasktwa! —sasa.
[5] Ukatsti jank'akiw Elí sacerdoten ukar jaläna, ukat sarakïna: —Akäsktwa, ¿kunatakis jawsista? —sasa. Elí sacerdotex sänwa: —Janiw nayax jawsksmati, ikiñamar kuttxam, sasa. Ukatsti Samuelux ikiñapar ikiriw sarxäna.
[6] Ukampis Tatitux wasitat jawsäna: —¡Samuel! —sasa. Samuelusti sarthapisin wasitat Elí sacerdoten ukar saräna, sarakïnwa: —Akäsktwa. ¿Kunatakis jawsista? —sasa. Elí sacerdotex sarakïnwa. —Janiw nayax jawsksmati wawa, ikinxam —sasa.
[7] Samuelux janïraw Tatitur uñt'känti, janirakiw jupax kunjämatsa uñstkarakitaynati.
[8] Ukampis Tatitux kimsa kutin Samuelurux jawsaskakïnwa, jupasti sartasin Elí sacerdoten ukaruw saräna, juparusti sarakïnwa: —Akäsktwa. ¿Kunatakis jawsista? —sasa. Ukapachaw Elí sacerdotex amuyxäna Tatitun Samuel waynar jawsaskatapa.
[9] Ukat Samuelurux säna: —Ikiñamar sarxam; Tatitutix jawsätamxa: “Tatay parlaskakim, luqtirimax ist'asktamwa sätawa” —sasa. Samuelusti ukat wasitat ikiñapar sarasin ikintxäna.
[10] Uka qhipat Tatitux purinïna, ukatsti sayt'asisin kunjämtix nayraqatax jawskatayna ukhamarak jawsäna: —¡Samuel! ¡Samuel! —sasa. Samuelusti sarakïnwa: —Parlaskakim, luqtirimax ist'asktamwa —sasa.
[11] Tatitusti sänwa: —Nayax Israel markan may lurä, ukanak ist'irirux jinchunakapas usuniwa.
[12] Uka uruw kuntix Elí sacerdoter wila masinakapxat siskta uk phuqharakï.
[13] Jupax kunjämtix wawanakapax nayar ñanqhachapkitu uk yatïnwa; janiw kunsa wawanakapar kamsaskiti. Ukat jichhax wila masinakapar mutuyäxa, janiw khitisa, janirakiw kunas jark'kitaniti.
[14] Ukat nayax juramentompi Elí sacerdoten wila masinakapatak arsta, ñanqha luratanakapax janipuniw wilañchanakampisa, waxt'äwinakampis q'umachatäkaniti.
[15] Ukanak ist'asinsti, Samuelux ikintxänwa, willjtanipansti, sartasin Tatitun utapan punkunakap jist'aräna. Samuelusti kuntix Tatitux unañchäwin siskatayna ukanak Elí sacerdoter yatiyañ axsaränwa,
[16] ukampis Elí sacerdotex jawsasin säna: —¡Samuel, wawaxa! —sasa. —Akankasktwa —sasaw Samuelux säna.
[17] Elí sacerdotex jiskt'arakïnwa: —¿Kuns Tatitux parlawaytam? Jan kuns imt'istati, taqpach yatiyita. ¡Janitix phuqhatpach yatiykitätaxa, Tatituw jumarux mutuyätam! —sasa.
[18] Samuelusti, kuntix Tatitux parlawaykatayna ukanak jan kuns imt'asaw yatiyäna, ukat Elí sacerdotex jach'at arsüna: —¡Jupax Tatituwa! ¡Munañapax luratäpan! —sasa.
[19] Samuelusti jiltaskakïnwa, Tatitusti juparux yanapänwa, arsutanakapsa jan mayan phuqharakïna.
[20] Taqpach Israel markaw yatïna, Dan sat chiqata Beerseba chiqakama, Samuelux chiqpachansa Tatitun profetapätapa.
[21] Tatitusti wasitat Siló chiqan uñstäna, ukan Samuelurux taqi arunakapa yatiyarakïna.