[1] Davidan Saúl reyimpi parlañ tukuyxatapatsti, Jonatanax Davidan suma jila masipaw tukxäna, ukatsti jupa kipkarjamaw munasïna.
[2] Saúl reyisti ukürpachaw Davidarux jupar yanapañapatak usküna, ukhamïpansti janiw awkipan utaparu saraykxänti.
[3] Jonatanampi, Davidampisti wiñay jila masïñatakiw mä juramento lurapxäna, Jonatanan Davidar jupa kipkarjam munasitap layku.
[4] Ukhamarusa, Jonatanax kuna isimpi ist'atäkantix uk apsusisin Davidaruw churxäna, espadapsa, mich'i antutt'añapsa, wak'apsa churxarakïnwa.
[5] Davidasti kuntix Saúl reyix lurañapatak siskäna ukanakampix wali sum phuqhäna, ukat Saúl reyix nuwasir jaqinakar sarayañapatak utt'ayäna. Ukasti Saúl reyin taqi soldadonakataki, jilïri jaqinakapatakis wali sumapunïnwa.
[6] Kunapachatix soldado tamanakax Davidan uka filisteo jaqiru jiwayxatapat kutt'anxapxän ukkhaxa, Israelan taqpach markanakapatsti, warminakaw Saúl reyir katuqirix mistunipxäna, jayllisa, kusisiñatsa panderonakampi, platillonakampi thuqt'asisaraki.
[7] Ukham q'uchkasinsti, ukhamarak thuqkasinsa, warminakax jach'at sapxäna: “Saúl reyix waranqa jaqinak jiwarayi; Davidasti tunka waranqa jaqinak jiwarayaraki” sasa.
[8] Uka arunakasti Saúl reyirux janiw walt'aykänti, ukat wali phiñasitaw akham arsüna: —Davidan tunka waranqa jaqinak jiwarayatapat arsupxi, nayatsti waranqa jaqinak jiwarayataxatak arsupxi. ¡Reyit utt'ayasxapxañapakiw wakisxi! —sasa.
[9] Uka urut uksarusti Saúl reyix Davidarux payachasiñ chuymampiw uñjäna.
[10] Qhipürusti, Tatitux khithankatayna uka ñanqha ajayuw Saúl reyirux wasitat katuntäna, jupax jach'a utap manqhan luqhiruw tuküna. Davidasti kunjämtix arpa toct'irïkän ukham toct'askäna, Saúl reyisti lanza ayt'atäskarakïnwa.
[11] Akatjamat Saúl reyix lanzap aytasïna, Davidarux uka lanzampi jaqt'asin pirqar chhuqhuntañ munäna, ukampis Davidax pä kutiw maysar jitjtäna.
[12] Saúl reyisti Davidarux axsaränwa, Tatitusti Davidarukiw yanapäna, Saulurusti janiw yanapkxänti.
[13] Ukhamïpan jupa thiyat jithiqtayäna, ukatsti mä tama soldadonakan jilïripat utt'ayäna, uka tamampiw nuwasir sarirïna, ukat kuttanxarakirïna.
[14] Tatituw Davidar yanapäna ukat taqi kuna luräwipas nayraqataru mistüna.
[15] Ukat Saúl reyix jupar axsaräna, taqi kunas sumak mistutap uñjasina.
[16] Ukampis Davidax taqi Israel markana, Judá uraqinsa wali munatänwa, jupaw nuwasir sarañsa, kutt'aniñsa sarayäna.
[17] Mä urusti Saúl reyix Davidarux sänwa: —Nayasti Merab sata jilïr phuchhaxa warmimäñapatakiw churäma, nayax jan axsarir nuwasirïñamak maysma, Tatitun nuwasïwipan nuwasiñataki —sasa. Saúl reyix janiw jupa pachpa Davidar jiwayañ amtkänti, jan ukasti filisteonakan jiwayañap munäna.
[18] Ukampisa Davidax sarakïnwa: —Janiw nayax khitïktsa, janirakiw Israel markan wila masinakaxas kunäpkiti nayan reyin tullqapäñaxatakixa —sasa.
[19] Ukampis kunapachatix Saúl reyin Merab phuchhapa Davidan warmipäñapatak churañ urux purinkäna ukkhaxa, Davidar churkamayaxa, Meholankiri Adriel jaqirukiw churxäna.
[20] Ukampisa Mical sata, Saúl reyin maynïr phuchhapax Davidarux walpun munäna. Ukatsti Saúl reyix ukham yatisin wal kusisïna,
[21] uka phuchhapxa Davidar churañatakiw amtäna, ukhamat uka phuchhapan Davidaru filisteonakan amparapar katuyañapataki. Ukat wasitat Davidarux säna: —Jichhakuchaw tullqaxäyätaxa —sasa.
[22] Ukatsti Saúl reyix yanapirinakaparux sänwa: —Jumanakasti David sapampik parlt'anipxam, ukatsti sapxarakim naya reyin jupar wal munataxa, ukhamarak taqi yanapirinakaxas jupar wal munapxatapa, jupasti nayan tullqaxäñapawa —sasa.
[23] Saúl reyin yanapirinakapasti taqi ukanak Davidarux sapxäna, ukampis Davidax jupanakarux sarakïnwa: —¿Jumanakatakix walikit nayan reyin tullqapäñaxasti? Nayax janiw khitïktsa, jan ukasti mä jan kunan jaqikïtwa —sasa.
[24] Saúl reyin yanapirinakapasti kutt'awayasin kuntix Davidax siskäna ukanak reyirux yatiyxapxäna.
[25] Saúl reyisti jupanakarux sarakïnwa: —Davidarux sapxam: ‘Nayax janiw phuchhax lanti kun churañapsa munkti. Jan ukasti, filisteonakan chhuxurasiñapat patak lip'ichinak apaniñapak munta. Nayax jupanakat phuqsusiñ munta’ —sasa. Chiqpachansa, Saúl reyix Davidar filisteo jaqinakan jiwayañap munäna.
[26] Davidatakix Saúl reyin mayïwipax walikïnwa, janïr uka mayïwix phuqhaskipanwa,
[27] Davidax jaqinakapampi sarasax pä pataka filisteo chachanak jiwarayäna, ukatsti kuntix Saúl reyix maykäna uk aparapïna. Ukatsti Saúl reyix Mical sat phuchhapa Davidarux warmipäñapatak churxäna, ukhamat Davidax reyin wila masip taypinkxäna.
[28] Ukampis Saúl reyix Tatitun Davidar yanapatap uñjasina, ukhamarak Mical phuchhapan jupar wal munasitap uñjasinsa,
[29] nayrapachat sipansa juk'amp axsarañaw mantäna, ukatsti wiñay uñisiripaw tukxäna.
[30] Mä tuqitsti, kunapachatix jilïr filisteo jaqinakax nuwasir mistupkäna ukkhaxa, Davidax Saúl reyin jilïrinakapat sipansa atipjapunïnwa, Davidax wali aytata jaqiw tukurakïna.