[1] Mä urusti, filisteo jaqinakax Queilá markaruw nuwantapxäna, ukatsti jichha apthapit trigo lunthatawayapxäna. Kunapachatix Davidaru uk yatiyapkän ukkhasti,
[2] jupax Tatituruw jiskt'asïna, akham sasa: —Tatay, ¿nayax filisteonakampi nuwasir sariristti? —sasa. Tatitusti sarakïnwa: —Jïsa, saraskakim, Queilá markarusti qhispiyarakim —sasa.
[3] Ukampis Davidan jaqinakapax sapxarakïnwa: —Aka Judá uraqisankkasinsa wal axsarayastanxa ¡Queilá markar filisteo soldadonakampi nuwasir sarkañäni ukkhax juk'ampiw axsarayasiñäni! —sasa.
[4] Ukhamasti Davidax wasitat Tatiturux jiskt'asïna, Tatitusti sarakïnwa: —Jumax Queilá markarux saraskakim, nayaw filisteonakarux amparamar katuyäma —sasa.
[5] Davidampi, jaqinakapampisti Queilá markaruw sarapxäna, ukansti filisteonakamp nuwasisax q'al atipjapxäna, uywanakapsa katuntasipxarakïnwa. Ukhamat Davidax Queilá markan jakirinakarux qhispiyäna.
[6] Ukchañkamasti, Ahimélec sacerdoten Abiatar yuqapax Davidampi jikisiñ munasin Queilá markaruw jaltxatayna, jupasti efod sat isi apasirakitayna.
[7] Mä tuqitsti, Saúl reyirux Davidan Queilá markankaskatap yatiyapxäna, ukat chuymapan sarakïna: “Tatitux amparaxaruw katuyitu, markaru mantanisinsti, pachpa punkunakapampi, jist'añanakampi jist'antataw uñjasini” sasa.
[8] Ukspachaw Saúl reyix taqpach ejercitop tantacht'äna Queilá markar sarañataki, ukan Davidampiru jaqinakapampir katurañataki.
[9] Ukampisa, Davidax Saúl reyin ukham nuwantañ amtatap yatisax Abiatar sacerdoteruw mayïna efod isi aptaniñapataki, ukat Tatitur jiskt'añataki.
[10] Davidasti sänwa: —Tatay, Israelan Diosapa, Saúl reyin Queilá markar jutaskatap yatta, ukatsti nayan akankatax layku taqi jaqinakar jiwarayañataki.
[11] ¿Kunjämtix nayax yatkta ukhamarjamax Saúl reyix nayar katjirix jutapunpachäniti? ¿Queilá markankirinakasti Saúl reyin amparaparut katuyapxpachïtani? ¡Tatay, Israelan Diosapa, aka luqtirimar yatiyañamatakiw achikt'assma! —sasa. Tatitusti sarakïnwa: —Saúl reyix jutapuniniwa —sasa.
[12] Ukat Davidax jiskt'askakïnwa: —¿Queilá markankirinakasti nayarusa, jaqinakaxarus Saúl reyin amparaparut katuyapxitani? —sasa. Tatitusti sarakïnwa: —Jïsa, katuyapxätamwa —sasa.
[13] Ukhamasti Davidampi, jaqinakapampix niya suxta patakanïpxänwa, Queilá markat mistuwayasinti kawksarus sarxapxakïnwa. Ukatsti Saúl reyix Davidan Queilá markat jaltxatap yatisinxa, janiw arktañatakix juk'amp kunsa lurkxänti.
[14] Ukhamaw Davidax Zif wasarana, mä qullun imantasiñax utjkäna uka chiqan jakañatakiw qhiparäna. Saúl reyisti sapüruw thaqhäna, ukampis janiw Tatitux amparapar katuykänti.
[15] Ukampis Saúl reyin jiwayañ amtatapatxa, Davidax axsaränwa. Ukat Zif wasaran Hores chiqar qhiparäna.
[16] Mä urusti, Saúl reyin Jonatán yuqapax Hores chiqaruw Davidar uñjir saräna, jupar chuymacht'iri, Tatitur taqi chuyma katuyasiñapatak ch'amacht'iriraki.
[17] Jupax sarakïnwa: —Jan axsaramti. Saúl awkixax janiw jikxatkätamti. Jumasti mä urux Israelan reyipaw tuküta, nayasti jumar arktiri jilïrirakïyäwa. Aksti, Saúl awkixax askiw yati —sasa.
[18] Ukhamasti panpachaniw Tatitun nayraqatapan mä amtäwi lurapxäna. Uka qhipatsti Jonatanax utaparuw kuttanxäna. Davidasti Hores chiqan qhiparxarakïna.
[19] Ukampis Zif chiqan utjiri jaqinakax Saúl reyimpi parliriw Guibeá chiqar sarapxäna, juparusti sapxänwa: —Davidax nanakan uraqixan imantasitäskiwa, Hores tuqina, Haquilá siski uka qulluna, kawkïri imantasiñanakatix aynach wasar tuqin utjki ukana.
[20] Ukhamasti kunapachatix juma munañan reyix jutañ munkäta ukkhaxa, jutaskakim. Nanakasti juparux katuyapxämawa —sasa.
[21] Saúl reyisti sarakïnwa: —¡Tatitux jumanakar jach'añchpan nayat khuyapt'ayasipxatamata!
[22] Achikt'asipxsmawa, jichhax sarapxam, ukatsti kawkhanpunsa jikxatasi uk sum uñaqanipxam, jupan wali sallqätap yatiyapxitu.
[23] Kawkïri imantasiñanakarutix imantaskaspa uk sum uñaqanipxam, ukatsti nayar yatiyir kuttanipxam. Ukat nayax jumanakamp sarä. Chiqpachapuni uka tuqin jikxatasin ukkhaxa, juparux katuntäwa, Judá uraqinkir wila masinak taypinsa k'uchut k'uchu thaqsü —sasa.
[24] Zif chiqan utjir jaqinakasti Saúl reyit mä suma arumpi mayt'asisaw markapar kuttawayxapxäna. Ukchañkamasti Davidampi jaqinakapampix Maón siski uka wasarata aynach tuqi pampan jikxatasipxäna,
[25] Saúl reyimpi, jaqinakapampix jupar thaqhiriw sarapxäna. Kunapachatix Davidar yatiyapkän ukkhaxa, jupax Maón wasarana qarqa tuqiruw saraqanxäna. Saúl reyisti uk yatisax Maón wasar tuqirurakiw saräna Davidar arktañataki.
[26] Saúl reyimpi jaqinakapampisti, qullu thiyanjam jutantapxäna, Davidampi jaqinakapampisti maysa thiyanjam jank'akiw sarapxarakïna, Saúl reyit jayarst'añataki. Kunapachatix Saúl reyimpi jaqinakapampix Davidaru, jupampïkän ukanakampir muyuntasipkäna, ukatsti niya katuntañampïxarakïna ukkhaxa,
[27] mä khithat jaqiw Saúl reyin ukar purïna jupar sañataki: —¡Munañan rey, jank'ak kuttxam, filisteonakaw markasar mantantanipxi! —sasa.
[28] Ukhamasti Saúl reyix janiw Davidar juk'amp arknaqkxänti, ukatsti filisteonakampi nuwasiriw saräna. Ukat uka chiqax “Jaljtañ Qarqa” sataxa.
[29] Uka chiqatsti, Davidax En-gadi sat chiqan utjki uka imantasiñanakar jakiriw sarxäna.