[1] Kimsüru saraqatarusti, Davidampi jaqinakapampix Siclag markaruw puripxäna, ukansti amalecita jaqinakan Néguev sat uraqir mantantapxatapa, Siclag markar t'unjapxatapa, ninampi phichhantapxatap jikxatapxäna.
[2] Ukhamarakiw uka markan utjiri warminakaru, wawanakaru, chachanakarus katuntat apapxatayna, ukampis janiw maynirus jiwayapkataynati.
[3] Kunapachatix Davidampi jaqinakapampix markaru puripkän ukkhaxa, markarux nakhantat uñjapxäna, ukhamaraki warminakarusa, wawanakarus katuntat apasxapxatayna,
[4] ukatsti wali jach'at jachapxäna, thayjtañkamaw wararipxarakïna.
[5] Warminak taypitsti, Ahinóam, Abigail warminakaru, khitinakatix Davidan warminakapäkän ukanakaruw katuntat apapxarakitayna.
[6] Davidasti wali llakt'ataw jikxatasïna, jaqinakasti qalampiw juparux k'upjañ munapxäna, wawanakapar ukham apapxatapatxa taqiniw wali mayjt'atäpxäna. Ukampis Davidax Tatitu Diosaparuw katuyasïna,
[7] ukatsti Abiatar sacerdoteruw achikt'asis säna: —Efod isi apanirapita —sasa. Abiatar sacerdotesti Davidatakix jank'akiw uka isi aparapïna,
[8] Davidasti Tatituruw jiskt'asïna: —¿Uka lunthat tama jaqinakarux arktiristti? ¿Arktasin jupanakarux jikxatiristti? —sasa. Tatitusti sänwa: —Arktaskakim, jikxatätawa, uka katuntat jaqinakarus kuttayanxarakïtawa —sasa.
[9] Davidasti jank'akiw uka suxta patak jaqinakapampix sarxaruwayäna, ukatsti Besor sat jawira thiyaruw puripxäna.
[10] Pä patak jaqinakapasti wali qariratäpxänwa, ukat jawir khurkatarux jan makhatapkänti, jan ukasti, uka chiqaruw qhiparapxäna, Davidasti yaqha pusi patak jaqinakampix arktaskakïnwa.
[11] Mä juk'ampjarusti mä egipcio jaqiruw thakhin jikxatapxäna, ukatsti uka jaqirux Davidan ukaruw irpapxäna, nayraqatax manq'ampi, umampi churapxäna;
[12] higot lurat t'ant'ampi, waña uvat lurat pä t'ant'ampi. Uk manq'antasinsti egipcio jaqix kutitatxänwa, kimsa urumpi kimsa arumampiw jan kunsa manq'kataynati.
[13] Ukat Davidax jiskt'äna: —¿Khitis uywirimaxa? ¿Kawkitsa jutta? —sasa. Egipcio jaqisti sänwa: —Egiptonkirïtwa, mä amalecita jaqin uywatapätwa, usuntatax laykuw uywirixax niya kimsa uru jaytanukxitu,
[14] nanakasti quereteos jaqinakan aynacha uraqipat lunthatsuriw sarapxta, ukhamarak Judá, Caleb tuqinkirinakata, Siclag markarusti ninampiw phichhantanipxta.
[15] Davidasti jiskt'askakïnwa: —¿Uka lunthata jaqinakan ukar irpitasmati? —sasa. Ukat egipcio jaqix sarakïna: —Jumatix Tatitun sutipxaru juramento lurarapitasma nayar jan jiwayañamataki, uywirixarus jan katuyañamataki, ukkhax nayax kawkhankapkitix jupanakax ukakamaw irpäma —sasa.
[16] Ukatsti, kawkhankapkäntix uka lunthatanakax ukakamaw irpäna, jupanakasti, taqi uka pampan aywitatatäsipkänwa, ukan manq'asipkäna, umasipkäna, ukhamarak jach'a phunchhäwi lurasipkäna, taqi kunanaktix jupanakax filisteonakan uraqipata, Judá uraqitsa lunthatanipkatayna ukata.
[17] Ukhamasti Davidax willjtat jayp'ukamaw jupanakarux q'al tukjäna, ukampis pusi patak waynanakakiw camellonakapar lat'xatawayasin jaltxapxatayna.
[18] Davidasti kuntix amalecitanakax lunthatjapkatayna taqi ukanak kutirayasxäna, pani warmipsa kutirayasxarakïnwa.
[19] Taqi kunanaktix amalecitanakax lunthatapkatayna ukanakat janiw mä juk'as chhaqhatäkänti, janirakiw mä wawasa, jach'a jaqis chhaqhatäkänti, Davidasti taqpach kutirayasxäna.
[20] Davidasti taqi ovejanakapa, vacanakap kutirayasïna, khitinakatix uka uywanak anakinipkän ukanakasti, “taqi akanakax Davidan jikxatataw” sapxarakïnwa.
[21] Davidax kawkhantix uka pä patak jaqinakax jikxataskäna ukkharuw purinïna, jupanakan qarjatätap laykusti janiw jupamp chik sarapkataynati, jan ukasti Besor jawir chiqaruw qhiparapxatayna; jupanakasti Davidampiru, jupamp chikäpki ukanakampir katuqiriw mistunipxäna. Davidasti jupanakar jak'achasisin aruntarakïna.
[22] Ukampisa Davidan jaqinakapat wali qhuru jaqinakaw utjäna, jupanakasti sapxänwa: —Khitinakatix jan jiwasanakamp chika sarapki ukanakarux janiw kunas churatäñapäkiti, jan ukasti warminakapa, wawanakap kutirayasisax sarxapxañapawa —sasa.
[23] Ukampis Davidax sarakïnwa: —Jila masinaka, jan ukham lurapxamti, ukhamarus Tatituw taqi kuns churistu, janirakiw jupax jiwarañasa munkänti, jan ukasti nuwantapkistäna uka lunthata jaqinakarux amparasaruw katuyistu.
[24] Jichhasti janiw khitis jumanakarux “walikiw” sapkiristamti. Jaljasiñansti taqiniruw wakt'istu, khitinakatix yänaka uñjañataki qhiparapki ukanakaru, ukhamarak khitinakatix nuwasiri sarapki ukanakarusa —sasa.
[25] Ukürut jichhürkamasti, israelitanakax ukhampun lurapxi.
[26] Davidasti Siclag uka chiqaru purkäna ukkhax, Judá uraqinkiri jilïr jaqinakaru, jupan jila masinakaparuw kuntix uñisirinakapat aparankatayna ukanak apayäna, akham yatiyäwimp kuna: “Aka churäwix jumanakatakiwa, kuntix Tatitun uñisirinakapat aparanipkta ukan mä chikatapa” sasa.
[27] Ukhamarakiw khitinakatix Betel chiqan utjapkän ukanakarux churäwinak apayäna, Néguev chiqan Ramot ukankirinakaru, Jatir,
[28] Aroer, Sifmot, Estemoa,
[29] Racal uka chiqanakan jakasirinakaru, uka kipkaraki Jerahmeel markanakana, quenitanakan markanakapan utjasirinakarusa,
[30] Hormá, Corasán, Atac,
[31] Hebrón, ukhamarak kawkhanakantix jupasa, jaqinakapasa sarnaqkatayna taqi uksankirinakaruw uka churäwinak apayäna.