[1] Samuelusti uka arunak Israel markpacharuw yatiyäna. Khä urunakansti filisteonakax israelitanakampi nuwasiñatakiw tantacht'asipxäna, ukat israelitanakax uka filisteonakamp nuwasir misttanipxäna, jupanakasti Eben-ézer sat chiqaruw utjnuqtapxäna. Filisteonakasti, Afec sat chiqaruw utjnuqtapxarakïna,
[2] israelitanakar nuwantañatak wakicht'asisa, uka nuwasiñansti filisteonakaw israelitanakar atipt'äna, pusi waranqa jaqinakap jiwarayasa.
[3] Kunapachatix israelitanakan ejercitopax campamentor kutt'xän ukkhasti, Israel markan jilïrinakapax akham sapxäna: “¿Kunatsa Tatitux jichhürun filisteonakampi atipjaypachïstu? sasa. ¡Jichhax Siló chiqat Tatitun arust'äwi arcap aptir sarañäni, ukhamat jupax jiwasamp chikäñapataki, uñisirinakasat qhispiyañapataki!” sasa.
[4] Ukatsti, Israel markax mä qawqha jaqinakaruw Siló chiqar khithäna Tatitun arust'äwi arcap aptaniñataki, Tatitusti uka arcan querubines sat chhiqhaninak taypinkänwa. Elí sacerdoten Hofní, Finees sat yuqanakapasti Tatitun arust'äwi arcap chikäskarakïnwa.
[5] Kunapachatix Tatitun arust'äwi arcapa campamentor puriyanxapxän ukkhasti, israelitanakax kusisiñat wali jach'at art'asipxäna, uraqsa khathatiyapxänwa.
[6] Filisteonakasti, uka arnaqasitanakap ist'asax jiskt'asipxänwa: “¿Kunatarak uka israelitanakasti ukham arnaqasipxisti?” sasa. Ukampisa, Tatitun arust'äwi arcap campamentor puriyanipxatap yatisinxa,
[7] walpun axsarthapipxäna, sapxarakïnwa: ¡Ay kunakïkani! “¡Diosax israelitanakan campamentoparuw purini! ¡Janipuniw kunapachas ukhamïrïkiti!
[8] ¡Ay kunakïkan jiwasatakixa! ¿Khitirak jichhasti uka taqi ch'aman Diosan amparapat qhispiyistanisti? ¡Jupaw egipcionakarux wasaran kunayman mutuyäwinakamp tukjäna!
[9] ¡Filisteo soldadonaka, jan kun axsarasay wakichasipxam, ukatsti taqi chuymampi nuwasipxam, ukhamat israelitanakan t'aqhisiyata jaqinakapar jan tukuñasataki, kunjämtix jupanakax jiwasan t'aqhisiyatänxa ukhama!” sasa.
[10] Filisteonakasti israelitanakarux nuwantasin atipt'apxäna, jupanakasti campamentoparuw jaltxapxarakïna. Jiwaratanakax walt'atapunïnwa, kimsa tunk waranq israelit soldadonakaw jiwaräna, ukat jilt'irinakasti utanakaparuw jaltxapxäna.
[11] Ukatsti, filisteonakax Diosan arust'äwi arcap katuntasipxäna, ukatxa Elí sacerdoten Hofní, Finees sat yuqanakaparus jiwayapxarakïnwa.
[12] Ukampisa, Benjamín ayllunkir mä soldadow nuwasïwit jaltxäna, t'ijukamakiw Siló chiqarux purïna, isinakapas ch'iyanuqata, p'iqipas laq'akamakiraki.
[13] Kunapachatix uka soldadox purkän ukkhasti, Elí sacerdotex punku jak'an mä qunuñan qunt'ataw thakhi uñch'ukiskäna, jupasti Diosan arcapat wali llakt'atäskänwa. Uka jaqisti markar mantasin kunatix luraskatayna uk yatiyäna; ukanak ist'asinsti markachirinakax ukspachaw uxtapxäna.
[14] Elí sacerdotex uka uxtiri ist'asinxa jiskt'arakïnwa: —¿Kunatsa jaqinakax ukataq uxtapxi? —sasa. Uka jaqisti jank'akiw Elí sacerdoterux kunanakatix luraskatayna ukanakat yatiyarakïna,
[15] uka urunakansti Elí sacerdotex llätunk tunka kimsaqallqun maranïxänwa, ukhamarus wali juykhüxarakïnwa.
[16] Uka jaqisti Elí sacerdoterux sänwa: —Jichhakiw nuwasïwit jaltanisin purinta —sasa. Elí sacerdotex jiskt'änwa: —Waway, ¿kunarak kamachisti? —sasa.
[17] Uka jaqisti sarakïnwa: —Filisteonakax nuwasïwin atipt'apxitu, ukatsti Diosan arust'äwi arcap apasxapxi. Waljanipuniw jiwasanakat jiwarapxi, Hofní, Finees yuqanakamas jiwaratawa —sasa.
[18] Diosan arust'äwi arcapat jan wali ist'asinsti, Elí sacerdotex qunuñat qhipäxar punku jak'ar jaqukiptasaw p'iqit puris jiwt'awayxi. Jupasti Israel markarux pusi tunka maraw irparakitayna.
[19] Elí sacerdoten yuxch'apasti, kawkïritix Finees chachan warmipäkän ukax usur jaqïnwa, wawachasiñapax jak'ankarakïnwa. Tatitun arust'äwi arcap filisteonakan apasxapxatapa, awkch'ipasa, Finees chachapas jiwatätapa yatisinxa; wawachasiñ usuw waytäna, t'aqhisisarakiw wawachasïna.
[20] Usuyir warminakasti, jupar jiwañampïskir uñjasax sapxänwa: “Jan axsaramti, mä yuqall wawa wawachastaxa” sasa. Ukampis warmix janiw arskänti janirakiw yäqkänsa;
[21] uka wawarusti Icabod sasaw sutichäna, akham sarakïnwa: “Israel markax jisk'achjatawa, Diosan arust'äwi arcap apaqayasipxatap layku” sasa. Uka arunakampix filisteonakan Diosan arcap apasxatapata, Elí awkch'ipana, chachapampin jiwatapat parlaskäna.