[1] Uka qhipatsti Davidampi, Tatitun utap apnaqirinakan jilïrinakapampix Asaf chachan wawanakaparu, Hemán, Jedutún jupanakaruw aski luräwinak lurapxañapatak utt'ayapxäna, jupanakaw jutir urunakat arpampi, salteriompi, platillonakampi toct'asis yatiyapxäna. Ukanak luririnakan sutinakapasti akanakawa:
[2] Asaf chachan wawanakapata: Jacur, José, Netanías, Asarela. Asaf, jupan awkipaw reyin mayitaparjam jutir urunakat yatiyäna.
[3] Jedutún chachan suxta wawanakapa: Guedalías, Serí, Isaías, Simí, Hasabías, Matatías. Jedutún awkipaw jupanakarux sarayäna, jutir urunakatsa yatiyäna, arpa toct'asis Diosar yuspagarasa, yupaychasaraki.
[4] Hemán chachan wawanakapa: Buquías, Matanías, Uziel, Sebuel, Jeremot, Hananías, Hananí, Eliatá, Guidalti, Romamti-ézer, Josbecasa, Malotí, Hotir, Mahaziot.
[5] Taqi jupanakaw Hemán chachan wawanakapänxa, reyin amuyt'ayir luqtiripänwa, kunjämtix Tatitux jupar wali ch'aman tukuyañat arskatayna ukhamaru; ukatsti Tatitux Hemán chachar tunka pusin yuqall wawampi, kimsa imill wawamp churäna.
[6] Taqi jupanakarux awkipaw sarayäna, kunapachatix Tatitun utapan platillonakampi, salterionakampi, citaranakampi q'uchupkän ukkhaxa. Asaf, Jedutún, Hemán chachanakax reyin arsutaparjamaw sarnaqapxäna.
[7] Suma yatxatat toct'irinakampi, Tatitur q'uchurinakampix pä patak kimsaqallq tunka kimsaqallqunïnwa.
[8] Ukhamasti suertetkam maykip lurañatakix jalanuqasipxäna, jach'äpasa, jisk'äpasa, yatichirïpasa, yatiqirïpas taqiniruw wakt'äna.
[9] Suertet apsusax mayat pä tunka pusinkamaxa, maykip lurañanakax akïrinakaruw wakt'äna: José Guedalías Zacur Isrí Netanías Buquías Jesarela Isaías Matanías Simí Azarel Hasabías Subael Matatías Jeremot Hananías Josbecasa Hananí Malotí Eliatá Hotir Guidalti Mahaziot Romamti-ézer jupanaka. Sapa mayni jupanakax jilanakapampi, wawanakapampix tunka payanïnwa.