[1] Kunapachatix Davidax Quis chachan Saúl yuqapan nayraqatapat apanukutäkän ukkhaxa, mä tama jan axsarir nuwasirinakaw Siclag chiqan Davidar jaqkattäna, nuwasiñanakan yanapt'añataki.
[2] Aka nuwasirinakasti mich'inak antutt'añampi wakicht'atäpxänwa, jupanakax kupi jan ukax ch'iqa amparampi mich'inak antutt'añsa, qalanak q'urawt'añsa sum yatipxäna. Jupanakasti akanakänwa: Benjamín ayllutxa Saúl reyin wila masinakapa:
[3] Ahiézer, jupasti irpirïnwa, Joás, Semaá chachan yuqanakapa, jupanakasti Guibeá markankirïnwa; Jeziel, Pélet, Azmávet chachan yuqanakapa; Beracá, Jehú jupanakax Anatot markankirïnwa;
[4] Ismaías, gabaonita jaqix kimsa tunka jan axsarir chachanakat maynïrïnwa, jupanakan irpiriparakïnwa; Guederá chiqankir Jeremías, Jahaziel, Johanán, Jozabad jupanaka,
[5] Eluzai, Jerimot, Bealías, Semarías; Sefatías harufita;
[6] Elcaná, Isías, Azarel, Joézer, Jasobeam, coreíta jaqinaka;
[7] Joelá, Zebadías, Guedor chiqankir Jeroham chachan yuqanakapa.
[8] Gad ayllunkirit yaqhipanakax Davidaruw jaqkattapxäna, jupax wasaran utjki uka imantasiñ chiqankkän ukkha. Jupanakax jan axsarir nuwasirinakänwa, nuwasiñatakis suma yatichata, jark'aqasiña, lanza apnaqañatakis wakicht'atäpxänwa. Uñnaqanakapas leonanakar uñtatänwa, tarujanakjamaw qullunakan jalnaqapxäna.
[9] Jupanakasti: Éser, jupax nayrirïnwa; payïrix Abdías; kimsïrix Eliab;
[10] pusïrix Mismaná; phisqïrix Jeremías;
[11] suxtïrix Atai; paqallqürix Eliel;
[12] kimsaqallqürix Johanán; llatunkïrix Elzabad;
[13] tunkïrix Jeremías; tunka mayanïrix Macbanai.
[14] Gad chachat saraqir wawanakapax ejerciton jilïr irpirinakänwa. Jupanakat sullkïri sapakiw patak jaqinakaru, jilïristi waranqa jaqinakar katuntäna.
[15] Jupanakarakiw qallta phaxsin Jordán jawir makhatapxäna, kunapachatix umax jawirat jilarkän ukapacha, ukatsti qhirwankirinakarux taqiniruw inti jalanta tuqiru, inti jalsu tuqiru jaltayapxäna.
[16] Ukhamarus Benjamín, Judá ayllunakat yaqhip jaqinakax Davidamp mayacht'asiriw imantasiñ chiqar sarapxäna.
[17] Davidasti jupanakar katuqir mistunisax sänwa: “Jumanakatix sumampik nayar yanapir jutapxsta ukaxa, nayax taqi chuymaxampiw nayampïpxañamatak katuqapxsma; ukampis jumanakatix nayar sallqjiri, uñisirinakaxar katuyir jutapxstaxa, nayan jan kuna ñanqha luratax utjkipansa, ¡nayra awkinakasan Diosapay uñjasin jumanakar mutuypan!” sasa.
[18] Ukhamasti Amasai sat kimsa tunka jaqinakan irpiripax Tatitun ajayupan phuqhantatax akham sasaw art'asïna: “¡David, Jesé chachan yuqapa! ¡Sumankañax jumatakïpan! ¡Sumankañax jumampïpan! ¡Sumankañax jumataki, yanapirinakamampitakïpan, Diosamaw jumarux yanapasktam!” sasa. Davidasti jupanakarux katuqänwa, ukatsti jilïrinak taypin lurañanak churäna.
[19] Kunapachatix Davidax filisteonakampi jakir sarkäna, Saúl reyimpi nuwasiñataki ukkhaxa, Manasés ayllut yaqhipanakax Davidaruw jaqkattapxäna. Davidax janiw filisteonakar yanapañ amtanïkänti, jupan jilïrinakapax tantacht'asisin khithanukuñ amtapxäna, sapxänwa: “Jiwasïpan Saulurux jaqkattani” sasa.
[20] Kunapachatix Siclag chiqar sarapkän ukkhaw Manasés ayllunkir jaqinakax Davidar jaqkattapxäna: Adná, Jozabad, Jediael, Micael, Jozabad, Elihú, Siletai. Jupanakasti Manasés soldadonakan jilïrinakapänwa.
[21] Jupanakaw Davidarux nuwasiñan yanapapxäna, jupanakax taqiniw jan axsarir nuwasirïpxäna, ejerciton jilïrinakapat uskt'atarakïnwa.
[22] Urut urutjamaw Davidar yanapt'irix juk'ampi purinipxäna, ukatsti mä jach'a ejército tamaw tuküna.
[23] Hebrón chiqan nuwasiñatak wakicht'atax akanakaw Davidampix mayacht'asipxäna, Saúl reyin marka apnaqañap katuyxañataki, kunjämtix Tatitux siskän ukhamaru:
[24] Judá ayllutsti, suxta waranqa kimsaqallqu patakan chachanakänwa, jark'aqasiñanakampi, lanzanakampi nuwasiñatak wakicht'ata.
[25] Simeón ayllutsti, paqallqu waranqa patakani jan axsarir nuwasirinaka, nuwasiñatak suma wakicht'atänwa.
[26] Leví ayllutsti, pusi waranqa suxta patakani,
[27] Aarón wila masipatsti kimsa waranqa paqallqu patakanimpi, Joiadá irpiripamp kuna,
[28] Sadoc jan axsarir nuwasir waynampi, wila masinakapan pä tunka payan irpirinakapamp kuna.
[29] Benjamín ayllutsti, Saúl reyin pachpa ayllupa, kimsa waranqa chachanaka, uka urunakkamax jilpachanix Saúl reyimpïpxänwa.
[30] Efraín ayllutsti, pä tunka waranqa kimsaqallqu patakan wila masipat jan axsarir wali aytat nuwasirinaka.
[31] Manasés ayllutsti, tunka kimsaqallquni waranqa chachanaka, khitinakatix David reyir utt'ayir sarañatak chhijllatäkatayna jupanaka.
[32] Isacar ayllutsti, pachanak amuyt'ir jaqinaka, kuntix Israel markax lurañapäki uk yatirinaka, ukanakasti pä patak jilïrinakänwa, ayllupat taqi jaqinakapamppacha jupanakan apnaqata.
[33] Zabulón ayllutsti, phisqa tunka waranqa soldadonaka, Davidar yanapt'añ amtampix kunayman nuwasiñ yänakanïpxänwa.
[34] Neftalí ayllutsti, waranqa jilïrinaka, kimsa tunka paqallquni waranqa chachanakampi, ukanakasti lanzanakampi, jark'aqasiñanakampi wakicht'ata.
[35] Dan ayllutsti, pä tunka kimsaqallquni waranqa suxta patakani soldadonaka.
[36] Aser ayllutsti, nuwasiñatak wakicht'at pusi tunka waranqa soldadonaka.
[37] Jordán jawira maykatatsti, Rubén, Gad, ayllunakata, ukhamaraki Manasés ayllunkir chikat jaqinakapat patak pä tunka waranqa chachanaka, jupanakasti kunayman nuwasiñ yänakampi wakicht'atäpxänwa.
[38] Taqpach aka nuwasirinakasti, nuwasiñatak wakicht'ataw Hebrón markar sarantapxäna, Davidar Israel markan reyit utt'ayañ amtampi; maynïr israelitanakas uka pachpa lurañ amtapxarakïna.
[39] Davidampix kimsa uruw manq'asa, umasa ukawjankapxäna, jupanakan marka masinakapaw ukham wakichapxäna.
[40] Ukhamarak jak'ankir masinakapasa, Isacar, Zabulón, Neftalí jupanakas asnonakata, camellonakata, mulanakata, urqu vacanakat manq'anak apapxäna. Kunayman manq'añanak apapxäna: jak'u, higot lurat t'ant'anaka, wañachat k'isanaka, vino, aceite, urqu vacanaka, ovejanaka; taqi kunas jilarkirïnwa, Israel markansti wali kusisiñaw utjäna.