[1] Tatitun arcapasti, Davidax uka amtampi lurkatayna uka chhujllar uchatänwa. Ukspachaw Dios nayraqatan nakt'at luqtäwinaka, sumankañ wilañchanak luqtäna,
[2] kunapachatix Davidax waxt'äwinak luqtañ tukt'ayxän ukkhasti, Tatitun sutipxaruw markatakix aski arunak arsüna,
[3] ukatsti taqi israelitanakaru, chachanakaru, warminakarux mä t'ant'ampi, palmera alin achupat lurat muxsa t'ant'ampi, waña uvat lurat t'ant'amp churäna.
[4] Davidasti levitanak taypit Tatitun arcap nayraqatan luqtapxañapatakiw utt'ayäna, jupanakarusti Israelan Diosapar luqtañataki, yuspagarañapataki, jach'anchañapatakiw uchäna.
[5] Jilïri irpirix Asaf chachänwa, jupxarusti Zacarías chacharakïnwa; uka qhipatsti Jeiel, Semiramot, Jehiel, Matatías, Eliab, Benaías, Obed-edom, Jeiel jupanakänwa, jupanakansti toct'añ yänakapa, salterionakapa, arpanakapaw utjäna. Asaf chachax platillonak toct'irïnwa,
[6] Benaías, Jahaziel sacerdotenakasti, Diosan arust'äwi arcap nayraqatan trompetanak phust'apxäna.
[7] Davidax uka pachpa uruw Asaf chachampiru, masinakapampirux nayrïr kuti yatiyäna, jupanakax Tatitur akham yuspagarañapataki:
[8] “¡Tatitur yuspagarapxam! ¡Jupan sutip arsupxam! Luratanakapat markanakar yatiyapxam.
[9] Jupar jach'añchas q'uchupxam. ¡Jach'a luräwinakapat arsupxam!
[10] “Qullan sutipat jach'achasipxam. ¡Tatitur thaqhir chuymanakax kusispan!
[11] Tatituru, ch'amapampir thaqtapxam, Tatiturux taqi pachan thaqtapxam.
[12] Muspharkañ jach'a luräwinakapat amtasipxam, kamachi arunak arsutapampita;
[13] Israel luqtiripat saraqir wawanaka, jupan chhijllat Jacobun wawanakapa,
[14] “Jupaw jiwasan Tatit Diosasaxa; ¡jupaw taqi uraqpach apnaqi!
[15] Waranqa wawanakan wawanakapasay mäkipaskpan, arust'äwipan arsutanakapax janiw armatäkaniti,
[16] Abrahamampi arust'äwi luratasa, Isaacampi juramento luratasa,
[17] Jacobutaki kamachjam utt'ayäna, Israelatakis wiñay arust'äwïñapataki,
[18] kunapachatix siskäna: ‘Nayax Canaán uraqi churäma jumar wakt'ir churäwimjam katuyxäma’ sasa.
[19] “Jupanakax juk'anikïpkchïn ukasa, yaqha markankir jaqinakäpkchïn ukasa,
[20] markat marka muyupkchïn ukasa, reyin apnaqat markat marka sarnaqapkchïn ukasa,
[21] Diosax janiw khitin t'aqhisiyañapsa munkänti; reyinakarus akham sasaw iwxt'äna:
[22] ‘Ajllitanakaxarux jan llamkt'apxamti, profetanakaxarus janirak t'aqhisiyapxamti’ sasa.
[23] “Aka uraqin jakirinaka, Tatitur q'uchupxam; qhispiyasiñapatsti sapürurak yatiyapxam.
[24] Aytat kankañapat markanakar yatiyapxam, muspharkañ luräwinakapat taqi jaqinakar parlapxam,
[25] Tatitux taqi ch'amaniwa, yupaychatäñapax wakisipuniwa, ¡taqi diosanakat sipansa wali axsarkayawa!
[26] Yaqha markanakan diosanakapax janiw kunäkisa, ukampis Tatitux alaxpach luririwa.
[27] ¡Aytat kankañampi, lliphipkir qhanampiw nayraqatapanki! ¡Ch'amampi, muspharkay kankañampiw qullan utapanki!
[28] “Taqi markankir jaqinaka, Tatitur jach'añchapxam, ch'amsa, jach'a kankañsa Tatitur luqtapxam;
[29] Tatitun qhapaq sutip waqaychapxam; qullan uta anqäxaparux luqtanakampi mantapxam, muspharkañ qullan utapan Tatitur yupaychapxam.
[30] ¡Taqi jaqinakax jupa nayraqatan khathatpan! Tatituw aka uraqi jan unxtañapatak utt'ayi.
[31] ¡Alaxpachasa, akapachasa kusisipxpan! ‘Markanakax arsupxpan: ¡Tatituw reyisaxa!’ sasa.
[32] ¡Lamar qutas qhuthutpan, ukan utjirinakas kusisipxpan! ¡Pampanakasa, kunatix ukan utjki ukanakas kusisipxpan!
[33] ¡Ch'uminkir quqanakas Tatitun nayraqatapan kusisiñat art'asipxpan, jupax akapach apnaqiriw juti!
[34] “Tatitur yuspagarapxam, jupax aski sumawa, munasiñapax wiñayatakiwa.
[35] Sapxamaya: ¡Tatit Diosaxay, qhispiyapxakitaya! ¡Markanak taypit irpthapxapxita, qhispiyapxarakita, qullan sutim yupaychapxañaxataki, kusisit jumar yupaychapxañaxataki!
[36] ¡Israelan Tatit Diosapax qullanäpan wiñayan wiñayapataki!” Ukatsti taqi markpachaw säna: “Ukhamäpan” sasa, ukatsti Tatituruw yupaychäna.
[37] Ukhamaw David reyix Tatitun arust'äwi arcap nayraqatar Asaf chachampiru, masinakapampirux jaytäna, jupanakax sapüru wakisitarjam jan inakt'as luqtapxañapataki.
[38] Punku uñjirinakasti Obed-edom, Hosá jupanakänwa, jupamp chikasti Jedutún chachan yuqapa, jupasti Obed-edom satarakïnwa, ukatsti suxta tunka kimsaqallqun masinakapampi.
[39] Sadoc chachampiru masinakapampirusti Tatitun chhujllap nayraqataruw jaytäna, Gabaón chiqankir qullan chiqaru,
[40] jupanakan sapüru nakt'ayañ altarxan waxt'äwinak Tatitur luqtapxañapataki, willjtasa, jayp'usa kunjämatix Tatitun kamachipan qillqatäki ukhamaru, juparakiw uka kamachir phuqhañatakix Israel markar jaytäna.
[41] Jupanakamp chikasti Hemán, Jedutún jupanakaruw jaytarakïna, maynïr ajllitanakarux sutitkam q'uchuñatak utt'ayatänwa: “Tatitur yuspagarapxam, munasiñapax wiñayatakiwa” sasa.
[42] Jupanakax trompetanakampi, platillonakampi, yaqha toct'añ yänakampiw Diosar q'uchupxäna. Jedutún chachan yuqanakapasti punku uñjañatak uchatänwa.
[43] Uka qhipatsti taqiniw utanakapar kutt'xapxäna, ukhamarakiw David reyix utapar kutt'xäna, wila masipar askinak churañataki.