[1] Davidax soldadonakan jilïrinakaparu, capitananakaru, taqi jilïrinakaruw jiskt'äna,
[2] uka qhipatsti taqi Israel markaruw säna: “Aka amuyutix jumanakatak walïchi, ukat Tatit Diosat wakisirakchi ukaxa, Israel uraqpachan qhiparapki uka marka masinakasar yatiyir khithapxañäni, ukatsti taqpach sacerdotenakaru, levitanakaru, khitinakatix markanakapan awatiñ uraqinakapan jikxatasipki ukanakar jawsayaniñäni, jiwasar jaqkattañapataki,
[3] ukhamat Diosasan arcap aptasinxañasataki, uka arcasti Saúl chachax reyïkan ukkhatpach armatawa” sasa.
[4] Ukatsti taqi markpachaw “Walikiwa” sapxäna, ukhamasti uka amuyt'ax taqinitak askïnwa.
[5] Davidax Israel markpacharuw tantacht'äna, Sihor chiqata Egipto qurpäki ukkhata Hamat chiqan mantañapkama, Tatitun arcap Quiriat-jearim chiqat aptanxañataki.
[6] Ukatsti Davidax taqi israelitanakamp chikt'atax Quiriat-jearim chiqaruw makhatäna, uka chiqax Judá markankir Baalá satarakïnwa, ukawjat Tatitun arcap aptanxañataki. Uka arca tuqiw Tatitun sutipax art'asi, qunuñapas querubines sat chhiqhaninak taypinkiwa.
[7] Arcsti mä machaq carretxaruw uchapxäna, ukatsti Abinadab chachan utapat apasxapxäna. Uzá, Ahió chachanakaw uka carreta apasipkäna.
[8] Ukañkamax Davidampi taqi Israel markampix Diosan nayraqatap sarapxäna, taqi ch'amanakapamp q'ucht'asisa, thuqt'asisa, arpanakampi, salterionakampi, platillonakampi, trompetanakamp toct'asisa.
[9] Kunapachatix Era de Quidón sat uñt'at chiqar puripkän ukkhaxa, carreta qatatipkän uka urqu vacanakaw lanktasipxäna, ukatsti Uzá chachaw arcan jan tinkuñapatak katthapïna.
[10] Ukampis Tatitutakix Uzá chachan arcar llamkt'atapax janiw askïkänti, ukat Tatitux ukawjanpach jakañap apaqäna.
[11] Davidasti Diosan Uzá chachar jakañap apaqatapat wal mayjt'asïna, ukat uka chiqarux Peres-uzá sas sutichäna, jichhakamas uka sutinïskiwa.
[12] Ukampis Davidax uka pachpa urux Dios nayraqatan wal axsaräna, ukatsti jach'at art'äna: “¡Diosan arcapax janiw utaxar apasiñjamäkiti!” sasa.
[13] Uka arcasti janiw Davidan Markapar apatäkänti, jan ukasti Gat chiqankir Obed-edom sat chachan utapar apañatakiw arsüna.
[14] Tatitun arcapax kimsa phaxsiw Obed-edom sat chachan utapankäna, Tatitusti Obed-edom chachan wila masiparu, taqi yänakapampiruw askinakampi phuqt'äna.