[1] Uka qhipatsti, Davidax filisteonakaruw atipt'äna, jupanakarux munañaparuw apnaqäna, ukatsti Gat marksa, jisk'a markanakapamppach aparäna.
[2] Moabitanakarus atipjänwa, jupanakax ukhamaw Davidan apnaqat uñjasipxäna, qullqsa juparuw churapxarakïna.
[3] Davidax Hamat chiqana, Sobá markankir Hadad-ézer reyiruw atipjäna, kunapachatix jupax Éufrates jawir uraqinak katuntasir sarkatayna ukapacha.
[4] Jupanakatsti, Davidax waranqa nuwasiñ carronak katuntasïna, paqallq waranqa caballería soldadonaka, pä tunka waranqa kayuk sarantir soldadonak katuräna; ukhamarus nuwasiñ carronakankir caballonakapan kayunakap p'akiräna, ukampis kawkïr caballonakatix patak carrotakjamäki ukanakak jan kamachkänsa.
[5] Ukatsti Damasco markat Siriankir soldadonakaw purinipxäna, Sobá chiqankir Hadad-ézer reyir yanapt'iri, ukampis Davidax sirionakarux atipjänwa, pä tunka payan waranqa jaqinak jiwarayäna.
[6] Ukspachaw Davidax Siriankir Damasco markarux uñjir soldadonak uchäna, sirio jaqinakasti ukham apnaqat uñjasisax Davidaruw qullqi irsuñäki uk churapxäna. Tatitux ukham Davidarux atipjayäna, kawkharutix jupax sarkän ukkhana.
[7] Uka qhipatsti Davidax Hadad-ézer reyin soldadonakapan qurit lurat jark'aqasiñanakap katuntasïna, ukat Jerusalenaruw apxäna.
[8] Ukhamarakiw Hadad-ézer reyin Tibhat, Cun markanakapan broncenakap katuntasïna. Salomonax uka broncempiw Tatitun utapatak uma uchaña, uta pirqa katxäsirinaka, yaqha yänakamp lurayäna.
[9] Kunapachatix Hamat chiqankir Toi sat reyix Davidan Sobá chiqankir Hadad-ézer reyin ejercitopar atipjatap yatïna ukkhaxa,
[10] Adoram sat yuqaparuw khithäna, qurita, qullqita lurat yänakampi David reyir aruntiri, jallallt'iri, Hadad reyimpi nuwasis atipjatapata, Toi reyisa jupampix nuwasiñankarakitaynawa.
[11] Davidasti taqi uka yänak Tatituruw luqtäna, Edom, Moab, amonita, filisteo, amalecita markanakat quri, qullqi aparkatayna ukanakamppacha.
[12] Ukhamarus Abisai, Seruiá chachan yuqapax tunka kimsaqallqun waranqa edomitanakaruw Jayu qhirwa sat chiqan atipjäna.
[13] Ukspachaw Davidax Edom markan soldado tamanak uchäna, ukatsti taqi edomitanakaw jupan apnaqat uñjasïna, Tatitusti kawkharutix jupax sarkän ukkhan atipt'ayäna.
[14] Davidasti taqpach Israel marka apnaqäna, chiqapar uñjasa, markaparux sumar uñjasa.
[15] Ejerciton jilïripax Joab chachänwa, jupax Seruiá chachan yuqapänwa; Josafat, jupax Ahilud chachan yuqapänwa, jupasti reyin qillqiripänwa.
[16] Sadoc, jupax Ahitub chachan yuqapänwa, Ahimélec, jupax Abiatar chachan yuqapänwa, jupanakax sacerdotëpxänwa; Savsá chachax qillqirïnwa,
[17] ukatsti Benaías, jupax Joiadá chachan yuqapänwa, quereteo, peleteo uñjirinakan jilïripänwa. David reyin wawanakapasti jupan wakiskir yanapirinakapänwa.