[1] Filisteonakax Israel markaruw nuwantäna, israelitanakasti jupanakat jaltxapxänwa, ukampis Guilboa qullun jupanakarux jiwarayäna.
[2] Filisteonakasti Saúl reyimpiru, yuqanakapampir arktañatakiw sarapxäna, ukatsti Jonatán, Abinadab, Malquisúa jupanakaruw jiwarayäna.
[3] Ukatsti Saúl reyir katuntañatakiw tantachasipxäna, mich'inak antutt'irinakax mich'inakamp wakt'ayasaw usuchjäna.
[4] Ukhamasti Saúl reyix yanapiriparuw säna: “Espadam apsusim, ukamp jiwayita, aka jucharar jaqinakan nayat jan larusiskañapataki” sasa. Ukampis yanapiripax janiw jiwayañ munkänti, wal axsaräna. Ukhamasti Saúl reyix espadap katusaw espadapxar liwxattäna.
[5] Kunapachatix yanapiripax Saúl reyir jiwat uñjän ukkhaxa, jupax uka kipkarakiw espadapxar liwxattas jiwäna.
[6] Ukhamaw khä urux Saúl reyimpi, kimsa yuqapampi, utapankir wila masinakapampix jiwarapxäna.
[7] Qhirwan jakapkän uka israelitanakax jupanakan jaltxatapa, Saúl reyir kimsa yuqanakapamp jiwarat uñjasax markanakap jaytanukusin jaltxapxäna. Ukatsti filisteonakax uka apanukut markanakar mantasaw utjantasipxäna.
[8] Qhipürusti, kunapachatix filisteonakax jiwatanakan yänakap apaqir sarapkän ukkhaxa, Saúl reyiru, yuqanakapampirux Guilboa qullun jiwarat jikxatapxäna.
[9] Ukatsti Saulurux p'iqip apaqapxäna, nuwasiñ yänakap katuntasipxäna, ukatsti filisteo uraqpacharuw yatiyirinak khithapxäna, jaqinakaru, diosanakaparu yatiyanipxañapataki.
[10] Saúl reyin nuwasiñ yänakap diosanakapan temploparuw uchapxäna, p'iqipsti Dagón sat diosan temploparuw warkkatapxäna.
[11] Kunapachatix Galaadankir Jabés chiqan jakirinakax filisteonakan Saúl reyir ukham lurapxatap yatipxän ukkhasti,
[12] taqi jan axsarir jaqinakax mayaki sum amtasisinxa, Saúl reyimpina, yuqanakapampin jiwat janchip katusax Jabés markaruw apasxapxäna. Ukansti encina sat quqa thiyaruw jiwat janchinakap imt'xapxäna. Ukatsti paqallq uruw ayuno lurapxäna.
[13] Ukhamaw Saúl reyix jan wali luratap laykux jiwäna, Tatitur jiskt'askamayax mä yatir layqa warmiruw
[14] jiskt'asïna. Ukat Tatitux jakañap apaqäna, reyi kankañapsti Jesé chachan David yuqaparuw churxäna.