[1] Paka piyagana in kalima ka angil in kansiyo bodyong, ako kangitan malabo sa kobat osai ka magirem, piyakan sosi sa langa idapo potok.
[2] Kansiyo biyoswang in langa idapo potok, lomwas in elep kaloba in elep lakonaw lakoy pag timbon, anggan lomened wa in ibeng, osai in kiwang.
[3] Maypanlowas mga doron batang asina pag elep, komalat sa boo kobat. Siro piyakan kabaloyan agpangwat kataw banayaw lakoy.
[4] Siyabi sa kansiro ayaw agsidaen in mga lalosen, in mga yangaw, kamayba nakay pag togda. In mga mangyan waget idapo tanda in Diyos sa kiray in kayaten.
[5] Siro yewed piyakan kabaloyan agbono sa kansiro, dayem pakaskitanen waget anggan lima ka bolan, in maskit kaskit in kayat banayaw lakoy.
[6] Ina pag lima ka bolan in mga kiyayat agpamangkit sa katayan, kamay idbatay kansiro ngiitan. Beet nges siro matay wa, kamay idbatay daan matay.
[7] In mga doron kagwali mga kabayo sandata batay aggira. Siro apo mga kagwali sarikaw ginto, in kansiro panrosayan kagwali panrosayan mangyan.
[8] Kansiro abok kagwali abok kagbaiyan, in ngipen kagwali ngipen liyon.
[9] In kansiro barosen piyagtabon kagwali bakal, in agaleng kansiro lagay kagwali in agaleng mga sakayan piyaggoyod kabayo agsonggab sa gira.
[10] Kansiro ikoy apo sisir kataw in sa banayaw. Sa ikoy agbangen in kansiro kabaloyan agpakaskit sa mga mangyan lima ka bolan.
[11] In kansiro poon in angil in agdamay sa langa idapo potok. Abadon in kansiyo ngaran sa agiplaong Ibriyo. No sa agiplaong wakay Girigo, na Apolyon, in beet siyabi Agpansida.
[12] Kadalan wa in tokaw pag kaidapan. Dowai kay in agrateng.
[13] Paka piyagana in kaenem ka angil in kansiyo bodyong, ako karengey osai ka agiplaong batang sa mga sokol in ginto pagpangandogan sa adap Diyos.
[14] Miplaong sa kaenem ka angil apo bodyong keyen, Kaimo lowaten in opat ka angil piyagbakos sa balabaan in sapa lakoy Yopratis.
[15] Siro datiyan piyagsandata asin pag kabetek, asin pag ibeng, asin pag bolan, asin pag dagon. Kalbas piyalpas in opat ka angil, matang agbono sa baatte katolo ka mangyan.
[16] Siyabi sa kangay in bilang mga mangyan agsakay sa kabayo. Siro dowai ka daan ka milyon (200,000,000).
[17] In kangay taynep ako kangitan in mga kabayo, in mga agsakay asin apo bakal sa barosen, in kolay kataw baya, osai kataw langit, osai madilaw kataw kasopri. In olo kabayo kagwali in mga olo liyon, aglowas sa kansiro bibi in baya, osai elep, osai kasopri.
[18] Kalbas baatte katolo ka mangyan matay asin pag tolo ka pandalan, sa baya, osai elep, osai kasopri batang sa mga kabayo bibi.
[19] In kabaloyan in mga kabayo sa kansiro bibi, osai sa ikoy. In ikoy kagwali olay apo olo, ina in agkayat.
[20] In mitera mga mangyan, ina in mga yewed matay asin pag mga pandalan, siro yewed mga agbenglay, yewed agpaawak, yewed din agempet sa agsamba sa mga mamaw, osai sa kansiro waget mga piyangwat rarawan ginto, pilak, osai tanso, bato, osai yangaw. Ina yewed batay kangitan, yewed din karengey, yewed kapanaw.
[21] Siro yewed din agrega in kansiro ogali mga agpamono mangyan, in agsalimangka, agpanggaraw, agpanakaw din.