[1] Paka siida in Bodang Topa in kapito ka kandado idapo wano agiplaong sa langit kadogay agtongtong begas.
[2] Paka kalbas ina, ako kangitan pito ka angil agitaydek sa adap Diyos. In baatte osai piyakan bodyong.
[3] Rateng in osai kay ka angil, apo piyagbaba pagsonogan mala masadap. Ina ginto. Kalbas siyo tomaydek sa bangen in pagpangandogan. Siyo piyakan aronaw wano pag mala masadap matang piyaagem sa mga pandalangin in mga iidang Diyos. Kalbas ina kansiyo piyaandog sa pagpangandogan ginto sa adap in pagpanokkawan lakoy.
[4] Batang sa piyagatang in angil in elep mala masadap, osai in mga pandalangin in mga iidang Diyos mitaydek agonaik sa adap Diyos.
[5] Kalbas in angil komwa baya sa pagpangandogan, piyabolalang sa pagsonogan mala masadap, kalbas biyenglay sa kobat. Toloy agdalegdeg lakoy, agaleng, agpangkilat, osai lomoni.
[6] Kalbas in pito ka angil agsandata matang agpagana in bodyong.
[7] Paka piyagana in tokaw pag angil in kansiyo bodyong, toloy omodan batang sa langit in odan kagwali bato, osai baya, apo din agiyagem daya. Masonog wa in diya in katolo ka baslag, kadayo in baatte katolo ka yangaw, osai in boo mga mabolaw kay pag lalosen.
[8] Paka piyagana in kadowai ka angil in kansiyo bodyong, toloy biyenglay sa dagat in osai ka kagwali boksor lakoy agkatebed. Daya wa toloy in katolo ka dodo dagat.
[9] Matay wa din in katolo ka agkaboway sa dagat. Osai masida wa din in baatte katolo ka sakayan sa dagat.
[10] Paka piyagana in katolo ka angil in kansiyo bodyong, toloy malabo batang sa langit in osai ka magirem lakonaw wano agigang kagwali tinglaw, mitomrag sa baatte katolo ka sapa, osai sa baatte katolo ka bokal.
[11] Ina pag magirem piyagawit Mapait. Mibaloy wa mapait in baatte katolo ka sapa, kalbas aronaw pag mga mangyan in matay in siro minem ina.
[12] Paka piyagana in kaopat ka angil in kansiyo bodyong, toloy masida in ibeng in katolo ka dodo, kadayo in bolan, osai in mga magirem. Matang maidapo in kansiro rawa in katolo. No piyagdodo in ibeng, in katolo ka dodo lened. Kadayo yabi, idapo agrawa sa katolo ka dodo.
[13] Paka kalbas osai ka kagwali lakoy lawin kangay ngiitan agilayogan sa ogbos. Ako karengey agpango keyen, Maidap, maidap, maidap in mga batay rateng kaidapan sa mga agbalay sa kobat, no piyagana in tolo kay ka angil in kansiro mga bodyong.