[1] Kalbas kangay ngiitan in osai kay ka angil maeyat aglompot batang sa langit. Siyo agislen libo, osai apo balangaw sa kansiyo olo. In kansiyo panrosayan agrawa kataw in ibeng. In kansiyo bitis kataw igang agitaydek.
[2] Osaite ka aklat in kansiyo piyagatang agibolwat. In pamalang pag bitis kansiyo piyalaed sa dagat, in tagwala agbangen sa diya.
[3] Siyo mango. In kansiyo agiplaong kagwali agana lakoy liyon. Apo somagot pito ka dalegdeg.
[4] Paka kalbas in pito ka dalegdeg, ako nges batay agsolat, kamay ako karengey in osai ka agiplaong batang sa langit keyen, Kaimo betangen in siyabi in pito ka dalegdeg, ayaw agsolaten.
[5] Kalbas in angil in kangay ngiitan aglaed sa dagat osai sa diya, kansiyo pamalang agtoldo sa ogbos.
[6] Siyo agsabi keyen, In Diyos in agkaboway anggan idapo kalobosan, siyo in agpangwat in langit osai in kobat, anggan in dagat, kadayo in boo agkaboway asin. Kamayba wakay sa Diyos, totoo in kangay piyagsabi, idwa dogay.
[7] No piyagana in kapito ka angil in kansiyo bodyong, na piyangwat wa in Diyos in kansiyo remrem piyagbetang, kataw in siyabi siyo sa kansiyo mga poropita.
[8] Paka kalbas, tagoli wakay manggisodan sa kangay in batang miplaong sa kangay batang sa langit keyen, Kao pasabangen sa angil agtaydek sa dagat osai sa diya. Kaimo kowaen in kansiyo piyagatang aklat agibolwat.
[9] Kalbas ako pasabangen sa angil, kangay yaayay in aklatte. In siyabi siyo sa kangay keyen, Anda kaimo kowaen, kaimo komanen. Batay mapait sa kaimo boyon, kamay sa kaimo bibi masadap, kasadap daiket.
[10] Kangay kiyowa in aklatte sa kansiyo bakwaw, kangay kiyoman. Masadap ngani sa kangay bibi, kamay paka matelen wa mapait sa kangay boyon.
[11] Kalbas apo siyabi sa kangay keyen, Kailangan kaimo wakay sabiyen in mga batay rateng sa mga manyan, sa mga bayan, mga agiplaong, osai sa mga poon lakoy.