[1] Kalbas ako kangitan agonaik batang sa dagat in osai ka ayop lakoy. Apo pito ka olo, osai sampo ka songay. In baatte songay apo sarikaw. Sa baatte dayem olo apo solat osai ka ngaran agkairis sa Diyos.
[2] In ayop lakoy kangay ngiitan kagwali laog lakonaw wano, in kansiyo bitis kagwali bitis oso. In kansiyo ngoso kagwali ngoso liyon. Tiyaboy in daragon sa ayop lakoy in kansiyo eyat, osai kabaloyan, osai in maslang pag sakopan.
[3] In osai sa kansiyo mga olo tomag apo sogat makakatay, kamay maoraw wakay. In boo mga mangyan somoyo, siro miyanggat sa ayop.
[4] In daragon siyamba in boo mangyan angkataw kansiyo wa tiyaboy in kansiyo kabaloyan sa ayop lakoy. In ayop din kansiro siyamba keyen, Idapo katolad sa ayop lakoy. Idapo batay kalaban sa kansiyo.
[5] In ayop lakoy yewed piyagayaw agsabi daet, agkairis sa Diyos, osai agpoon lakoy apatnapot dowai ka bolan.
[6] Kansiyo ngani siyabiyan daet in Diyos, anggan in ngaran Diyos, kadayo in kansiyo balay, osai in boo ista agbalay.
[7] Siyo yewed din piyagayaw aggira sa mga iidang Diyos, anggan siro diyaeg. Siyo piyakan kabaloyan sa baatte tiribo, bayan, agiplaong, osai kobat.
[8] Batay agsamba sa kansiyo in boo mangyan atai sa kobat. In mga waget agisolat in kansiro ngaran sa aklat, na siro in idwa somamba. In yewed kay piyangwat in kobat, kansiro mga ngaran siyolat wa in Bodang Topa in batang biyono sa kansiyo aklat listaan in mga agkaboway.
[9] No siyo apo talinga na mamarengey wa.
[10] No siyo in batay piyagbiyag, na batay ngani piyagbiyag. No siyo in batay piyagbono, na batay ngani piyagbono. Matang kailangan in mga iidang Diyos agpakarigen in paniwala.
[11] Kalbas kangay ngiitan osai kay ka ayop lakoy lomwas batang sa diya. Apo dowai ka songay kataw songay osai ka bodang topa, kamay in kansiyo agiplaong kataw in agiplaong daragon.
[12] Ina in sogowan in tokawan pag ayop lakoy, apo in boo kansiyo kabaloyan. In boo mga mangyan sa kobat kansiyo piilit agsamba sa tokawan pag ayop lakoy apo sogat lakoy kamay maoraw wa.
[13] Makasoyo in mga piyangwat in kadowai ka ayop lakoy. Siyo agpalompot baya batang sa langit sa pangkit mga mangyan.
[14] In mga mangyan sa kobat kansiyo piyadaya panawen sa kansiyo mga piyangwat makasoyo sa adap in tokawan pag ayop lakoy. Kansiyo siyogo in mga mangyan agpangwat rarawan in tokawan pag ayop lakoy, in batang piyalang kamay agkaboway.
[15] In kadowai ka ayop piyayagan din agtaboy payeng sa rarawan in tokawan pag ayop lakoy. Ngona kaiplaong in rarawan osai piyagbono in boo dayo somamba sa kansiyo.
[16] In boo mangyan piilit in ayop agpatanda sa pamalang no yewed sa kiray. In boo mga mangyan lakonaw, kamayba kalakoyte, mayaman, maidap, kamayba alapet sogowan, kamayba yewed.
[17] Idapo batay kabili, kamayba agpabili, dayem apo tanda in ngaran in ayop lakoy, no yewed in bilang kansiyo ngaran.
[18] Kailangan asin in maronong. No siyo in maronong, na kansiyo batay atawanan in bilang ngaran in ayop, angkataw ina ngaran osai ka kaliyakiyan. In bilang 666.