[1] Ako kangitan in pito ka kandado, in tokaw siida wa in Bodang Topa. Ako karengey miplaong in osai sa opat ka agkaboway, in kaksenen kaksen dalegdeg keyen, Aywawa.
[2] Paka ako mangkit kangay ngiitan osai ka kabayo pilak, in agsakay apo piyagatang pana. Siyo piyakan sarikaw, kalbas siyo panaw agpandaeg, batay wakay mandaeg.
[3] Paka siida in Bodang Topa in kadowai ka kandado, ako karengey in kadowai ka agkaboway keyen, Aywawa.
[4] Osai wakay ka kabayo mapola in lomwas, in agsakay asin piyakan kabaloyan agpagira sa kobat, matang in mga mangyan agpalbonowan. Osai lakoy ka pisaw in tiyaboy sa kansiyo.
[5] Kalbas in Bodang Topa agsida sa katolo ka kandado. Ako toloy karengey in katolo ka agkaboway keyen, Aywawa. Osai wakay ka kabayo maitem in kangay ngiitan, in agsakay apo piyagatang timbangan.
[6] Kalbas ako karengey apo tomag agiplaong batang sa opat ka agkaboway keyen, Osai waget ka gatang paray in abel bayad boo ibeng agpanawen. No mais na tolo ka gatang boo ibeng agpanawen. Kamay ayaw agsida in langis osai alak.
[7] Paka siida in Bodang Topa in kaopat ka kandado, ako karengey in kaopat ka agkaboway keyen, Aywawa.
[8] In kangay wakay ngiitan osai wakay ka kabayo agkaborayen, in agsakay asin agpalsadodo, in osai in ngaran Katayan, in osai in Balayan mga matay. Siro piyakan kabaloyan sa doros kobat matang agpamono sa gira, sa panyawes, sa pandalan, osai mga matapang pag mga ayop.
[9] Paka siida in Bodang Topa in kalima ka kandado, kangay ngiitan sa galem in pagpangandogan in abyan in mga biyono panawen sa agpatoldo in Agiplaong Diyos, osai panawen sa kansiro piyagpangwat totoo.
[10] Siro mango anggan keyen, Kapwan Kabaloyan, kao maal wano, osai betek. Nangkadogay kay kami agpanaya? Nangkadogay batay mibaloy in kaimo remrem agparosa sa mga mangyan agbono sa kanyam?
[11] In baatte osai sa galem pagpangandogan piyakan maboksi pag lambong. Siyabi sa kansiro keyen, Kamo agpainga kay ngonate anggan mibaloy wa in bilang kanyo mga belag osai mga sogowan Kiristo, in mga batay kay din piyagbono kataw daan kamo.
[12] Kalbas siida in Bodang Topa in kaenem ka kandado. Lomoni wa anggan. Toloy wa maitem in ibeng kataw damit maitem. In bolan wakay kataw daya, mapola.
[13] In mga magirem sa langit mangaragrag wa, kataw in raweg igos moda kay, biyagyo, mangaragrag in galem.
[14] Maidapo in langit kataw aklat bigla mibaroron. In mga boksor panaw wa sa kansiro betek, osai in mga poro.
[15] In mga poon sa kobat, osai in mga koyay, osai in mga kapitan, in mga mayaman, in mga apo kabaloyan, in boo mangyan kamayba sogowan, kamayba agipalpas, siro boo malpamatago sa mga leyang, sa mga paywaraan bato, sa mga boksor.
[16] kalbas siro agberya sa mga boksor, sa mga bato keyen, Kami tabonen matang kami ayaw ngiitan in agitokkaw sa pagpanokkawan lakoy, osai matang yewed rateng sa kanyam in agparosa in Bodang Topa.
[17] Angkataw rateng wa in makalimo wano pag ibeng, in kami batay piyarosa in bodang Topa osai in agitokkaw sa pagpanokkawan lakoy. Nakay kay pag mangyan in batay yewed biyono?