[1] Sa angil barkadaan mga bodang Diyos sa Ipiso kaimo solaten keyen, Anda in piyagsabi in agipanawan sa kagwaraan in pito ka tinglaw ginto, in apo piyagatang sa kansiyo pamalang pito ka magirem.
[2] Ako katawan kao agpilit agpanawen maal, in kao yewed aglimbang. Ako katawan din kao agkadaetan sa mga agpamangwat daet. Kaimo tiyepeng in mga agpakagwali mga katiwala Isos, kalbas kaimo ngiitan siro mga bosliyen.
[3] Ako katawan din in kao yewed aglimbang, kamayba aronaw kaidapan kao agaway kay agtiis panawen sa kangay, kao yewed manromir.
[4] Kamay ako apo ngiitan daet sa kaimo, ako idwa gayed kaimo piyagkabeet kataw tangona.
[5] Kao manremrem wakay sa kaimo maalno pag ogali tangona. Benglayen wa in kaimo mga daet. Ngona kao agogali wakay kataw tangona in kaimo maal pag ogali. No kao idbatay agbait na ako batay wa asin, kangay wa piyagkowa in kaimo tinglaw sa kansiyo pagibolalangan.
[6] Kamay ako apo din piyagkaanggay sa kaimo, in kao kataw daan ako agkagalit sa piyagpangwat in mga Nikolayta.
[7] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg sa daet kangay batay piyagpakoman in raweg yanaw agpamaboway sa alamanan Diyos.
[8] Sa angil barkadaan mga bodang Diyos sa Ismirna kaimo solaten keyen, Anda in piyagsabi in parakayan osai kalobosan, in batang matay kalbas boway wakay.
[9] Ako katawan kao diyalan mga kaidapan, kangay atawanan kao maidap. Kamay yewed kataw ina, kao in mayaman. Kangay din atawanan in agpanlibak sa kaimo. Siro agpakagwali mga Odyo, kamay yewed, siro barkadaan mga sakop Katanas.
[10] Ayaw agkalimo sa mga agrateng kaidapan sa kaimo. Amba, ayaw agkanawey anda, in amat sa kanyo batay siyoroy Katanas sa bilanggowan matang kamo tiyepeng Katanas. Kamo batay piyagpaidapan sampo ka ibeng. No kao agaway kay agpaniwala sa kangay kamayba wa matay, na sa kaimo kangay piyagtaboy in sarikaw tandaan siyo apo kangay boway.
[11] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg idbatay wa domalan sa kadowai ka katayan.
[12] Sa angil barkadaan mga bodang Diyos sa Pirgamo kaimo solaten keyen, Anda in piyagsabi in apo pisaw idapo sikil, tanan apo tarem.
[13] Ako katawan kao piyagrongrongan in pagtokkawan Katanas. Kamaybawa kataw ina kao agaway kay agpaniwala sa kangay. Antipas, in kangay yewed aglimbang pag sogowan, siyo biyono asin sa kobat pagbalayan Katanas. Kamay kamayba ina pag mga ibeng yewed kaimo biyenglay in agpaniwala sa kangay.
[14] Kamay ako apo ngiitan mga daet sa kaimo, in kalaati sa kanyo agpaniwala sa piyatoldo Balaam. Siyo in agpatoldo kay Balak agakay sa mga bodang Israil agpangwat daet. Panawen ina siro agpamangan wa in pamangnen piyasola, osai siro manggaraw.
[15] In kalaati sa kanyo agpaniwala wa din sa mga piyagpatoldo in mga Nikolayta.
[16] Amba ngani, benglayen wa in kanyo mga daet. No kamo idbatay, na idwa dogay ako batay asin, kalbas kamo kangay batay piyagarabas in kangay pisaw sa kangay bibi.
[17] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg kangay batay piyagpakoman pamangnen in mana agibetang. Baatte osai kangay din batay piyagpakan bato motya, apo agisolat ngaran, bayo wakay pag ngaran, idapo batay roma kabasa in siyolat no yewed in piyakan.
[18] Sa angil barkadaan mga bodang Diyos sa Tiyatira kaimo solaten keyen, Anda in piyagsabi in Bodang Diyos, in apo mata agigang kagwali baya, in apo bitis agkilat kagwali tanso yaasa.
[19] Ako katawan in kaimo mga panawen, in kao agpanolong, osai agtiis. Ako katawan in kaimo mga panawen ngona labi kay kalakoy in tangona.
[20] Kamay ako apo ngiitan daet sa kaimo. Yewed kaimo biyoyaw Isabil, in kagbaiyan agpakagwali sogo Diyos. Siyo agpadaya, osai agpatoldo daet sa kangay mga sogowan matang siro agpanggaraw. Osai siyo agakay din agkoman pamangnen piyasola.
[21] Siyo piyakan kabetek agbenglay in kansiyo marames pag ogali, kamay siyo yewed agbenglay.
[22] Kaimo pangkiten, no siro yewed agbenglay ina pag kansiyo panawen kataw ina, na kadayo siyo, kadayo in mga agpanggaraw sa kansiyo, siro boo batay kangay piyagpakaskitan maloba, batay piyalageman sa kaidapan.
[23] Kadayo kansiyo mga bodang kangay batay piyagpamono matang in mga barkadaan mga bodang Diyos katawan ako in agroris sa galem remrem mangyan. In baatte osai sa kanyo kangay batay biyayadan no nangkataw in kansiyo panawen.
[24] Kamay kamo in amat mga taga Tiyatira, in yewed maniwala sa piyagpatoldo Isabil, osai yewed agadar sa piyagawit in lakonaw pag adar Katanas, na ako idapo wa maidap piyagtaboy sa kanyo.
[25] Kamay in kanyo piyagpaniwalaan ngona kanyo alapeten anggan ako rateng wakay.
[26] In mga agpandaeg, in mga agaway kay agpangwat in kangay beet anggan sa kalobosan, na siro kangay batay piyagpangwat poon sa mga tiribo.
[27] Siyo batay agsakop sa kansiro, batay agpoon lakoy, in pamogbog bakal, kataw bakal agpamaslag sa keden. Siyo kangay piyagpangwat poon kataw daan ako piyangwat poon kangay Amang.
[28] Kangay din piyagtaboy sa kansiyo in tagorabas.
[29] In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.